September 29, 2021

ආණ්ඩුවේ තවත් ලොක්කෙක් ඉල්ලා අස්වෙයි Featured

September 15, 2021

රජයේ තවත් ආයතන ප්‍රධානියෙකු සිය ධූරයෙන් ඊයේ(14) ඉල්ලා අස්වී තිබෙනවා.

ඒ වී අලෙවි මණ්ඩලයේ සභාපතිවරයා ලෙස කටයුතු කළ ආචාර්ය ජටාල් මාන්නප්පෙරුම මහතායි.

ඉල්ලා අස්වූ හේතුව

වත්මන් ආණ්ඩුව බලයට පත් වීමත් සමග 2019 වසරේ දී තුන් වසරක කාලයක් සඳහා සභාපති ධුරය භාරගත් ඒ මහතා වසර විස්සකට අධික කාලයක් එම මණ්ඩලයේම සේවා අත්දැකීම් සහිත ඉංජිනේරුවරයෙකි.

මණ්ඩලයේ සේවය කිරීමෙන් පසු ඇමරිකා එක්සත් ජනපදයට ගොස් ආචාර්ය උපාධිය ලබා යළි පැමිණ මෙම තනතුර භාරගෙන ඇත්තේ රටට සේවයක් කිරීමේ අරමුණිනි.

සභාපතිවරයා සිය ධුරයෙන් ඉවත් වී ඇත්තේ පෞද්ගලික හේතු මතය.

මාසික වැටුප සේවකයින්ට දීලා

මණ්ඩලයෙන් තමන්ට ලැබෙන මාසික වේතනය එකතු කර 199 දෙනකු වන සියලුම සේවකයන්ට පසුගිය වසරේදී දිරි දීමනා ලබා දීමට කටයුතු කළ සභාපතිවරයා සිය පෞද්ගලික වියදමින් මණ්ඩලයට අයත් ගොඩනැගිලි පවා අලුත්වැඩියා කළ බව එහි සේවකයින් පෙන්වා දෙනවා.

දිරිදීමනා ලබා දීමට රුපියල් දසලක්ෂයක් අවශ්‍ය වී ඇති අතර සභාපතිවරයාගේ වසරක වැටුප ඒ සඳහා ප්‍රමාණවත් වී නැත. ඒ අනුව ඉතිරි මුදල ද පෞද්ගලිකව ලබා දීමට සභාපතිවරයා කටයුතු කළ බවයි සේවකයින් සඳහන් කරන්නේ.

වී වේලන තාක්ෂණයක පේටන්ට් අයිතියත්

එමෙන්ම වී වේලන තාක්ෂණයක පේටන්ට් අයිතිය හිමි ඒ මහතා අම්පාර, කිලිනොච්චිය, නිකවැරටිය, අනුරාධපුරය සහ පොළොන්නරුව යන ප්‍රදේශවල වී වේලන මධ්‍යස්ථාන සිය පෞද්ගලික ධනයෙන් ඉදි කර වී අලෙවි මණ්ඩලයට භාර දී තිබෙනවා. එම මධ්‍යස්ථානවලින් තමන්ගේ වී නොමිලේ වේලා එම වී මණ්ඩලයට ලබා දෙන ලෙස ගොවීන්ගෙන් ඉල්ලීමක් ද කර තිබුණා.

එම මධ්‍යස්ථාන ඇති කිරීමට සභාපතිවරයා කටයුතු කර ඇත්තේ මණ්ඩලයට වී ලබා දීම සඳහා ගොවීන් පෙලඹවීමට බවත් එහි සේවකයින් සඳහන් කරනවා.

සභාපති තනතුර වෙනුවෙන් මණ්ඩලයෙන් ලැබෙන නිල නිවස, දුරකථන පහසුකම් ඇතුළු කිසිදු පහසුකමක් ඒ මහතා ලබාගෙන නොමැති බවයි වාර්තා වන්නේ.

Rate this item
(1 Vote)