හැමෝගෙම තනි රැක්ක, ආදරේ ඩැහැ ගත්ත, “කළු” ගැන ඇහෙන කතාව

2025 ජූනි 26, පෙ.ව. 12:06

සෞන්දර්ය කලා විශ්වවිද්‍යාලය කියන්නේ සංගීත, නැටුම්, චිත්‍ර වැනි සෞන්දර්යය විෂයන්ට අතිදක්ෂ සිසු සිසුවියන් පිරිසක් උසස් අධ්‍යාපනය ලබන තැනක්.

මෙතැන ඉන්න සිසු සිසුවියන් බොහෝ සංවේදී පිරිසක්. විශේෂයෙන් සෞන්දර්ය කියන්නේ මේ රටේ නිර්මාණාත්මක පරපුරක් අධ්‍යාපනය හදාරණ තැනක්. මෙතැන පසුගිය දා ඉතා දුක්බර සිදුවීමක් වාර්තා වුණා. මේක සාමාන්‍ය සිදුවීමක් වුණත් ඉකුත් දින කිහිපය පුරා ෆේස්බුක් ඇතුළු සමාජ මාධ්‍යවල මෙය ඉතා ශීඝ්‍රයෙන් සංසරණය වුණා. මේක බල්ලෙක් සම්බන්ධයෙන් කතාවක්.

කළු කියන්නේ සාමාන්‍ය බල්ලෙක්. කළුගේ උපන් තැන කොහෙද කියන්න කවුරුත් දැන්නේ නැහැ. කළු කැම්පස් එකට එන්නේ අහම්බෙන්, ඒත් අවුරුදු 10ක විතර ඉඳලා කළු හිටියේ සෞන්දර්ය කලා විශ්වවිද්‍යාල භූමියේ. සංගීත පීඨයේ සිතාර්, තබ්ලා, ගිටාර් වාදන වගේම නර්තන පීඨයේ බෙර හඬට කළු එදා ඉඳලා ප්‍රිය කළා. සෞන්දර්යේ ළමයි එහෙම කියන්නේ කළු ඒ ඒ පන්ති පටන් ගන්න විට ඒ ඉස්සරට ඇවිත් ඉඳගෙන පන්තිය නිම වෙනකල්ම අහගෙන ඉන්න නිසා.

කළු කැම්පස් කොල්ලන්ට, කෙල්ලන්ට කෙතරම් එකතු වුණාද කියනවා නම් කළුගේ කරට ලස්සන රතු පාට පටියක් වැටුණා. කළු කියන නම වැටුණා. හවසට කට්ටිය එකතු වෙලා කැන්ටිමේ තේ බොන වෙලාවට කළු වෙනුවෙන් වන්ඩුවක් මිලදී ගෙන දෙන්න මේ අය අමතක කරන්නේ නැහැ.

දේශන ශාලවක, ප්‍රැක්ටිකල් පාඩමක පන්තියේ ඇතුළේ හරි දොර ළඟ හරි කළු වාඩි වෙලා බෙර සද්දේ මැද්දේ පොඩි නින්දක් දාන්නේ ඒ හඩ නින්දට බාධාවක් නෙවෙයි නින්දට තොටිල්ලක් කර ගෙන වගෙයි.

මේ ළමයි කියන්නේ කැම්පස් එකේ මොන උත්සවය තිබුණත් කළුගේ කෑම බීම වෙන් කරන එක ඒ අයගේ ප්‍රධානම රාජකාරිය කියලයි.

ඒ විතරක් නොවෙයි. කළු කම්පස් එකේ මුරකාරයා වගේ කටයුතු කරලා තිබෙනවා. කැම්පස් එක මුර කරන එක කළු තමන්ගේ වගකීමක් ලෙස හිතුව බව තමයි මේ ළමයි වගේම ආචර්යවරුත් කියන්නේ.

අධ්‍යාපන කටයුතු නිම වෙලා හවස් යාමයේ සෞන්දර්යයේ ළමයි ටික බස් හෝල්ට් එකට යන විට කළු එතනට ගිහින් බස් එකට ළමයි නැඟලා යනකල් ඉඳලා ආපහු හැරිලා කැම්පස් එකට එනවාලු. ඒ වගේම සමහරු වෙනත් වාහනවල යන්න ඉන්නවා නම් ඒ ළමයිත් යන කල්ම බලා ගෙන ඉන්නවාලු. ඒ අයගේ වාහනේ එනකල් කළු ගේට්ටුව ළඟ බලාගෙන ඉන්නවලු.

කළුට ළමයි විතරක් නෙවෙයි ආචාර්යවරු මහාචාර්යවරු, අනධ්‍යයන සේවක සේවිකාවන්ද දැඩිව ආදාරය කර තිබෙනවා. මල්ලිකා රාජපක්ෂ ආචාර්යවරියගේ වාහනේ කැම්පස් එකෙන් ඇතුළතට එද්දිම කොහේ හිටියත් කළු දුවගෙන එනවාලු. මල්ලිකා මිස් හැමදාමත් කළු වෙනුවෙන් බත් මුලක් වෙනමම ගේනවාලු. ඒ වගේම අනෙක් හැම ගුරුවරයකුම කළුට ඉතා දැඩි ලෙස ආදරය කරන බව තමයි මේ ළමයි කියන්නේ.

ඒ වගේම මේ ළමයින්ගේ විභාග කාලවලදී කළු කැම්පස් එක වටේ මුර සංචාරය තවත් වැඩි කරන්නේ ළමයින්ගේ ආරක්ෂාව ගැන තවත් හිතලා කියලා තමයි මේ අය කියන්නේ.

කැම්පස් එක පිරිසිදු කරන අයගේ පවා ආදරය ලබපු කළු ඒ අයගේ හඬ ඇහුණම කොහෝ හිටියත් දුවගෙන එනවා කියලා ළමයි කියනවා. පසුගිය දවසක කළු අසනීප වෙලා බෙහෙත් කරන්න එක්ක ගෙන ගියා. කළුට ඇවිද ගන්න බැරිව පැත්තට යන්න අරගෙන. මාසයකුත් දවස් ගණනාවක් කළු තමන්ගේ අසනීපෙට බෙහෙත් ගත්තා.

එතැන කළුට ආරක්ෂාව වගේම රැකවරණයත් ලැබිලා තියෙනවා. කළුගේ අත්වල, කකුල්වල තුවාල තිබිලා. ඒ වගේම මුත්‍රා නොයන ප්‍රශ්නයකුත් කළුට තිබිලා. ඒ ටිකේම කළු කැම්පස් එකේ ඉඳලා නැහැ. මුළු කැම්පස් එකම පාළුවට ගිහින්, කළු දවස් කිහිපයක් ආහාරත් ප්‍රතික්ෂේප කරලා තිබුණා.

ඒ දවස් ටිකේම කළුව කැම්පස් එකට ගෙනල්ලා නැහැ. ළමයි කළුට කළු ඉන්නේ කැම්පස් එකේ නෙවේ කියලා දැනෙන්න දීලා නැහැ. හැමදාම කළු බලන්න ගිහින් කළු ඉන්නේ කැම්පස් එකේ කියන හැඟීම කළුට දන්වලා තිබෙනවා. කළුගේ වියදම්, ප්‍රවාහන වියදම් සියල්ල කරලා තිබෙන්නේ කළු වෙනුවෙන් වෙන් කරපු කැටේ සල්ලිවලින් වගේම ඇතැම් අය ලබා දුන්නු පරිත්‍යාගවලින්. මේ ළමයි එකතු වෙලා කළුට උදව් කරන්න පුළුවන් අයගෙන් උදව් ඉල්ලුවා. පස්සේ කළු හොඳටම හොඳ වෙලා කැම්පස් එකට ගෙනල්ලා.

කළුගේ වෛද්‍යවරයා කළුව එවලා තිබෙන්නේ කළුට කෑම රැසක් තහනම් කරලා. මේ අතර කළුට ආයෙත් අසනීප වෙලා. කළුගේ බඩේ තුවාලයක් දාලා. මේකට බෙහෙත් කරන්න තමයි අවසන් වරට කළුව වෛද්‍යවරයා ළඟට අරන් ගිහින් තිබෙන්නේ. මේ සැරේ කළුට බැරි වුණා මාරයා පරද්දන්න. ළමයිනුයි මංගලිකා මිසුයි එකතු වෙලා කළු රැක ගන්න කොයි තරම් කැපවීමක් කළත් මාරයා ඉක්මන් වුණා.

මේ ගැන මංගලිකා රාජපක්ෂ ආචාර්යතුමිය අපිත් එක්ක කිවේ මෙහෙම කතාවක්.

”කළු කැම්පස් එකේ කාටත් හරිම ආදරෙයි. කළු අසනීප වෙලා මාසයකුත් දවස් ගාණක් අමාරුවෙන් හිටියා. කළුගේ බෙහෙත්වලට විශාල මුදලක් අපිට වැය වුණා. ගණේමුල්ලෙන් කළුට බෙහෙත් කළා. ප්‍රවාහන වියදම් සහ නවාතැන් අපහසුතා නිසා නැවත කොළඹට ගෙනත් ඩෝග් කෙයා එකක නවත්තගෙන වෛද්‍යවරයකු ළඟට කළුව දිනපතා ගෙන ගියා. මේ කාලය පුරාම කැම්පස් එකේ නර්තන, නාට්‍ය හා සංගීත පීඨවල අවසන් වසර සිසුන් වගේම ආදි සිසුන් බොහෝ දෙනකු කැපවීමෙන් කළුගේ දිවි බේරා ගැනීම වෙනුවෙන් කටයුතු කළා. ඒත් අවසානේ කළු අපි හැමෝම අතහැර ගියා. කළු මිය යන විටත් මම කළු ළඟ හිටියා.”

මුළු කැම්පස් එකේම ආදරය හිමි කරගත් කළු පසුගියදා නොඑන ගමන් ගියේ අවුරුදු 10ක් විතර ජීවත් වෙලා. හැමෝගෙම තනි රැක්ක කළු, හැමෝගෙම ආදරේ ඩැහැ ගත්ත කළු, අහිංසක බෝල ඇස්වලින් හිනා වුණු කළු, නැතිව අද මුළු කැම්පස් එකම පාළුයි කියලා තමයි ළමයි කියන්නේ.
උපුටා ගැනීම – දිනමිණ