2025 අප්‍රේල් 07, පෙ.ව. 12:04
ලාංකීය සංගීත කලාව තුළ සුවිශේෂී සලකුණක් වන, පේෂල මනෝජ් හට 04 වනදා සිය සංගීත ගමනෙහි විශිෂ්ට අවස්ථාවක් උදාවෙලා තිබුණා.
ඒ, ඔහුගේ නවතම නිර්මාණය වන “තාල නන්දශ්‍රී” ඉන්දීය අගමැති නරේන්ද්‍ර මෝදි වෙත පිළිගැන්වීමට අවස්ථාවක් සැලසීමයි.
පේෂල මනෝජ් මෙම නිර්මාණය සිදුකර තිබුණේ දිවංගත ගුරු, සංගීත් නිපුන් පී.වී. නන්දසිරි මහතාට උපහාරයක් ලෙස වීම විශේෂයි.
මෙම වටිනා කාර්යය ගැන පේෂල සමාජ මාධ්‍ය වෙත එක්කර තිබූ සටහනයි මේ…
“තාල නන්දශ්‍රී” සහ සංගීත ගමනෙහි විශිෂ්ට අවස්ථාවක්
මගේ රිද්මයානුකූල ගමනේ දී මට විවිධ විශිෂ්ට අවස්ථා ලැබුණි. එහෙත්, අද දිනය ඉතාම අරුත්පූර්ණ, පූජනීය සහ අභිමානවත් අවස්ථාවක් බවට පත්විය. ඒ සඳහා හේතුව වන්නේ, මෙදින මගේ නවතම නිර්මාණය වන “තාල නන්දශ්‍රී” (8½ මාත්‍රා චක්‍රය) ජනතාවට හඳුන්වාදීමයි.
මෙය මගේ දිවංගත ගුරු, සංගීත් නිපුන් පී.වී. නන්දසිරි මහතාට උපහාරයක් ලෙස කරන ලද නිර්මාණයකි.
මගේ නිර්මාණයට අගයක් එක්කරමින්, එය සංගීත කලා ක්ෂේත්‍රයට හඳුන්වාදීමටත්, පටිගත කිරීමටත්, බෙදා හැරීමටත් සහාය වූ ඉන්දියානු මහ කොමසාරිස්තුමන්ට, ඔහුගේ කාර්ය මණ්ඩලයට, එමෙන්ම ස්වාමි විවේකානන්ද සංස්කෘතික මධ්‍යස්ථානයේ අධ්‍යක්ෂතුමන්ට සහ කාර්ය මණ්ඩලයටත් මාගේ හද පිරි ස්තුතිය පළකරමි.
මගේ නිර්මාණය නරේන්ද්‍ර මෝදි මැතිතුමාට ඉදිරිපත් කරන විට, ඔහු ඒ සම්බන්ධයෙන් සත්‍යයෙන්ම සාවධානීව හිඳීම පුදුම සහගත ය. ජීවිතය පිළිබඳව මට උතුම් උපදෙස් ද ලබාදෙමින් මට ආශිර්වාද කිරීමට ද එතුමා නොපැකිලි විය.
මට අධ්‍යාපනය ලබාදුන්, මට නව පරිණාමයකට ලක් වීමට හේතු වූ, ලඛ්නඌ ඝරානාවේ ඛලීෆා, උස්තාද් ඉල්මාස් හුසේන් ඛාන් මාගේ ගුරුතුමාට ගෞරවය හා ස්තුතිය ප්‍රකාශ කිරීමට කැමැත්තෙමි.
අවසන් වශයෙන්, මෙම සියලු ක්‍රියාවලියේදී මා සමඟ දිවා-රාත්‍රි මහන්සිවී පුහුණුවීම් සහ පටිගත කිරීම් සිදු කළ මාගේ ශිෂ්‍යයන්ටද මාගේ ආභාරය පළකරමි.
සංගීත ක්ෂේත්‍රය තුළ නව ආයාමයක් නිර්මාණය කිරීම සඳහා, අනාගතයේ වැඩි වශයෙන් දායක විය හැකි යැයි බලාපොරොත්තු වෙමි.
ස්තුතියි!
Peshala Manoj
පේෂල දිගින් දිගටම පවතින ආණ්ඩුව විවේචනය කරපු පුද්ගලයෙක් වුණත් රජය විසින් මේ අවස්ථාව ඔහු වෙත ලබා දුන්නේ පක්ෂ පාට නොබලා යැයි බොහෝ දෙනෙක් සඳහන් කළා.
කෙසේවෙතත් ඒ සඳහා පේෂල සිය මුහුණුපොතේ වීඩියෝවක් එක් කරමින් සඳහන් කළේ ඉන්දියාවේ රජයෙන් මිසක් ලංකාවේ රජයෙන් නොවන බවයි.
