කේ. සුජීවාගේ දැන් තත්ත්වය ගැන දියණිය අංජලී කියන කතාව

2024 සැප්‍තැම්‍බර් 26, පෙ.ව. 12:03

ප්‍රසංග වේදිකාවට හුඟක් හුරුපුරුදු කේ. සුජිවා “ඉඟි මරන තරු රෑන” ගීතයෙන් එක රැයකින් ජනප්‍රිය වුනු ගායිකාවක්.

ඉඟිමරන තරු රෑන කෝ.. කේ. සුජීවා එහෙම කියමින් කලක් රටම වසඟ කළ ඇය අදටත් ප්‍රසංග වේදිකාවේ රැඳී සිටින්නේ තව තවත් ජනප්‍රියට පත්වෙමිනුයි.

ඉතින් පසුගිය කාලයේ කේ. සුජීව ගැන කතා බහට ලක් වුණේ අතුරුගිරියේ වෙඩි තැබීමත් එක්ක.

අතුරුගිරිය ප්‍රදේශයේ ටැටූ ආයතනයක් විවෘත කිරීමට පැමිණි අවස්ථාවේ නාඳුනන තුවක්කුකරුවන් දෙදෙනෙකු සිදුකළ වෙඩි ප්‍රහාරයකින් සුරේන්ද්‍ර වසන්ත පෙරේරා නොහොත් ක්ලබ් වසන්ත ඇතුළු දෙදෙනෙකු මියගියා.

එහිදි ගායන ශිල්පිණී කේ. සුජීවා ඇතුළු සිව්දෙනෙකු තුවාල ලැබු අතර කලක් කොළඹ ජාතික රෝහලෙත් පසුව පෞද්ගලික රෝහලකත් නේවාසිකව ප්‍රතිකාර ලැබූ ඇය මේ වන විට නිවසට ගොස් තිබෙනවා.

කේ. සුජීවාත් ඇගේ දියණියන් දෙදෙනාත් සමාජ මාධ්‍යයේ සක්‍රීය චරිත ත්‍රිත්වයක්නෙ.

ඒ නිසාම කවුරුත් නොඉවසිල්ලෙන් පසුවෙනවා ‘කේ. සුජීවාට දැන් කොහොමද’ කියන කාරණය ගැන තොරතුරු දැනගන්න.

ඉතින්, සුජීවාට ආදරේ කරන ඒ කවුරුත් වෙනුවෙන් අංජලී සිය යූටියුබ් නාලිකාවට වීඩියෝවක් එක්කාසු කරලා තිබුණා.

ඒ, වීඩියෝව තවත් සුවිශේෂී වුණේ ඇය අම්මාව ප්‍රතිකාර සඳහා රැගෙන යන මොහොතක කළ වීඩියෝවක් වීම නිසාවෙන්.

ප්‍රතිකාරවලින් පස්සෙ අංජලී කාටත් කිව්වෙ, තුවාලය තරමක් විශාල වීම නිසා ම සුව වෙන්න කාලයක් ගතවන බවක්.

නමුත් තිබුණු තත්ත්වයට වඩා 80%ක් විතර මව සුවෙන් පසුවන බවත් අංජලී කියලා තිබුණා.

ඒ වගේම මාසයක විතර කාලයක් මේ කෙරෙන සුපුරුදු ප්‍රතිකාරවලින් පස්සෙ තවත් ශල්‍යකර්මයක් සිදුකළ යුතු බවත් ඇය වීඩියෝවේදී කියනවා.

ඒත් එක්කම කකුලට අවශ්‍ය ව්‍යායාම කරන බවත්, කකුල ඉවත් නොකර කෙසේ හෝ සුවකරගන්න තෝරාගැනීම අසීරු ම කාර්යයක් වුණත්, කෙසේ හෝ එය සාර්ථක කරගන්නා බවත් ඇය විශ්වාසයෙන් කාටත් කියලා තිබුණා.