ඔලිම්පික් ගිනිසිළුව රැගෙන ගිය පළමු ලාංකිකයා

2024 මැයි 12, ප.ව. 8:59

ශ්‍රී ලාංකිකයෙක් වන තර්ෂන් සෙල්වරාජා ඔලිම්පික් ගිනි සිළුව රැගෙන යාමේ ගෞරවයට පාත්‍ර වූ ප්‍රථම ශ්‍රී ලාංකිකයා වෙමින් ඉතිහාස පොත් අතරට එක්ව තිබෙනවා.

ඔහු ප්‍රංශයේ ජීවත්වන බේකරි ආහාර සඳහා ප්‍රසිද්ධියක් උසුලන සම්මානනීය ශ්‍රී ලාංකික සුපවේදියෙකු වන අතර ඔහු 2006 වසරේදී ප්‍රංශයේ පදිංචියට ගොස් ඇත.

සාමාන්‍ය පුද්ගලයන්ගේ සිට ප්‍රභූවරුන් දක්වා දසදහසකට පමණ ඔලිම්පික් ගිනි සිළුව රැගෙන යාමේ ගෞරවය හිමිවන අතර මෙවර ප්‍රංශයේ පැවැත්වෙන ඔලිම්පික් තරඟාවලියේදී එලෙස ගෞරවය හිමිවන පුද්ගලයන් 10000 අතරට තේරී පත්වීමට තර්ෂන් සෙල්වරාජා සමත්ව තිබෙනවා.

තර්ෂන් සෙල්වරාජා 2006 වසරේදී ප්‍රංශයට පැමිණි පසු අරක්කැමියෙකු ලෙස සේවය කර ඇති අතර ඉවුම් පිහුම් සඳහා තිබූ දක්ෂතාවය හේතුවෙන් සෙල්වරාජා මහතා පසුව නැගෙනහිර පැරීසියේ බේකරියක් විවෘත කර ඇත.

එහිදී ඔහු සිය දක්ෂතාවයන් වැඩිදියුණු කර ගැනීමට කටයුතු කර තිබූ අතර මේ වනවිට ලෝකයෙම ප්‍රසිද්ධ සුපවේදියෙකු බවට පත් තිබෙනවා.

මේ සම්බන්ධයෙන් ඔහු මාධ්‍ය වෙත මෙලෙස අදහස් පළ කර තිබුණා.

“මේක පුදුම සහගත දෙයක් මට. මේ වෙනුවෙන් මාව තෝරගත්ත එකට ස්තූතියි. ඔලිම්පික් කමිටුවේ හිටිය ක්‍රීඩා අමාත්‍යවරයා තමා මාව තෝරගෙන තිබුණේ. මේ ගැන හිතුවාම ගොඩාක් සතුටයි. ප්‍රංශයේ දහස් ගණන් ජනතාවක් ඉන්නවා. මම ගොඩාක් වාසනාවන්තයි මේ අවස්ථාව ලැබුණ එකට. කොහෙදී ද ගිනි සිළුව මට ලැබෙන්නේ කියලා මම දන්නේ නැහැ. නමුත් ජූලි මස 15වැනිදා ගිනි සිළුව පැරිසියට එනවා.”