ඉන්ධන පිරවුම්හලක ගැටුමකින් අයෙකු මරුට

2022 ජූලි 08, පෙ.ව. 8:32

මාගාල්ල ඉන්ධන පිරවුම්හලේ ඉන්ධන ලබා ගැනීම සදහා පෝලිමේ සිටි දෙපිරිසක් අතර ඇති වූ ගැටුමක් දුරදිග ගොස් තියුණු ආයුධ වලින් පහරදීමෙන් එක් අයෙකු මියගොස් තවත් තිදෙනෙකු තුවාල ලබා කරාපිටිය ශික්ෂණ රෝහලට ඇතුලත් කොට ඇති බව ගාල්ල වරාය පොලීසිය පවසයි.

රෝහල්ගත කිරීමෙන් පසු මියගොස් ඇත්තේ ගාල්ල වංචාවල ප්‍රදේශයේ පදිංචි 25 හැවිරිදි තරුණයෙක්.

ඉන්ධන ලබා ගැනීම සදහා කාර් රථයකින් පැමිණි පුද්ගලයකු ඉන්ධන පෝලිමේ හිස් ස්ථානයක කාර්රථය ගාල් කිරීමට උත්සාහ කොට තිබෙනවා.

මෙම අවස්ථාවේ ඉන්ධන පෝලිමේ වැගන්ආර් වර්ගයේ රථයක සිටි තරුණයින් පිරිසක් සිය විරෝධය කාර්රථ හිමියාට පලකොට තිබෙනවා.

මෙම අවස්ථාවේ කාර්රථ හිමියා සහ වෑන් රථයේ සිටි තරුණයින් අතර ආරවුලක් ඇතිවී තිබෙනවා.

පසුව කාර් රථ හිමියා විසින් මෙම ගැටුම පිළිබද තම හිතවතුන්ට දැනුම් දී ඇති අතර කඩු රැගෙන පැමිණි පිරිසක් වෑන් රථයේ සිටි තරුණයින්ට පහරදි ඇති බව පරික්ෂණවලදී අනාවරණය වී තිබෙනවා.

තියුණු ආයුධවලින් පහර දීමෙන් කැපුම් තුවාල ලැබූ තිදෙනෙකු කරාපිටිය ශික්ෂණ රෝහලේ හදිසි ප්‍රථිකාර ඒකකයේ ප්‍රථිකාර ලබන අතර මෙම ඝාතනයට සම්බන්ධ සැකකරුවන් අත්අඩංගුවට ගැනීම සදහා ගාල්ල වරාය පොලීසිය පරික්ෂණ පවත්වයි.