ඇල්ල අනතුරේ දී සුව සැරිය ගිලන් රථ විනාඩි 7කින් ඇවිත්

2025 සැප්‍තැම්‍බර් 07, පෙ.ව. 11:11

ඇල්ල-වැල්ලවාය මාර්ගයේ ජීවිත 15ක් බිලිගත් මාරක බස් අනතුරේ දී 1990 සුව සැරිය ජාතික ගිලන්රථ සේවාව දැක්වූ හදිසි ප්‍රතිචාරය හේතුවෙන් ජීවිත ගණනාවක් බේරා ගැනීමට හැකි වූ බව ඒ පිළිබඳ එක්රැස් කළ දත්ත මගින් පෙනීගොස් ඇත.

සුව සැරිය පදනමට අනුව, සැප්තැම්බර් 4 වැනිදා අදාළ අනතුර දැන්වීමෙන් මිනිත්තු කිහිපයක් ඇතුළත පළමු ගිලන් රථය පිටත් කර හැර තිබේ.

මිනිත්තු හතක් ඇතුළත එම ගිලන් රථය 24 වැනි සැතපුම් කණුව අසල අනතුර සිදු වූ ස්ථානයට ළඟා වී තිබිණි.

ඇල්ල, බණ්ඩාරවෙල, බදුල්ල, බුත්තල, හාලි-ඇල, වැල්ලවාය සහ බඩල්කුඹුර ඇතුළු අවට ස්ථානවලින් තවත් ගිලන්රථ හයක් ද යොමු කර ඇත.

හදිසි වෛද්‍ය කාර්මිකයන්, ගිලන් රථ රියදුරන් සහ අණදෙන මධ්‍යස්ථාන කාර්ය මණ්ඩලය සම්බන්ධ වූ ඒකාබද්ධ උත්සාහයේ ප්‍රතිඵලයක් ලෙස, තුවාල ලැබූ මගීන් දහතුන් දෙනෙකු ස්ථාවර කර රෝහල් වෙත මාරු කිරීමට හැකි වී ඇත.

2016 සිට ක්‍රියාත්මක වන සුව සැරිය ශ්‍රී ලංකාවේ පැය 24 පුරා හදිසි වෛද්‍ය ප්‍රවාහන සේවා සපයයි.