ආරුගම්බේ ගැන රුසියානු තානාපති කාර්යාලයෙනුත් දැනුම්දීමක්

2024 ඔක්‍තෝබර් 23, ප.ව. 6:02

---

---

ආරුගම්බේ ප්‍රදේශය සඳහා අමෙරිකානු තානාපති කාර්යාලය නිකුත් කළ අනතුරු ඇඟවීම මත පදනම්ව කොළඹ පිහිටි රුසියානු තානාපති කාර්යාලය විසින්ද විශේෂ දැනුම්දීමක් සිදුකර තිබෙනවා.

X පණිවුඩයක් නිකුත් කරමින් කොළඹ පිහිටි රුසියානු තානාපති කාර්යාලය සඳහන් කළේ මෙම අනතුරු ඇඟවීම සම්බන්ධයෙන් සිය පුරවැසියන්ට අවධානයෙන් පසුවන ලෙසයි.

එමෙන්ම විශාල ලෙස පිරිස් ගැවසෙන ස්ථානවලට යාමෙන් වළකින ලෙසට ද එමඟින් දැනුම් දී තිබෙනවා.

ඒ අනුව මේ වනවිට ආරුගම්බේ ප්‍රදේශය සඳහා ඇමෙරිකානු තානාපති කාර්යාලය විසින් නිකුත් කළ අනතුරු ඇගවීමේ නිවේදනය පදනම් කර ගනිමින් රටවල් කිහිපයක් ශ්‍රී ලංකාව සඳහා වූ සංචාරක උපදෙස් යාවත්කාලීන කර ඇති බවයි වාර්තා වන්නේ.

එක්සත් රාජධානිය, රුසියාව, නවසීලන්තය, ඔස්ටේලියාව සහ කැනඩාව යන රටවල්වලට මෙලෙස සංචාරක උපදෙස් යාවත්කාලීන කර ඇති බව සඳහන්.

එම සංචාරක උපදෙස්වලට අනුකූලව කටයුතු කරන ලෙසයි ඒ ඒ රටවල් තම පුරවැසියන්ට දැනුම් දී ඇත්තේ.

ආරුගම්බේ ප්‍රදේශයේ සංචාරක මර්මස්ථාන ඉලක්ක කර ගනිමින් යම් ප්‍රහාරයක් එල්ල විය හැකි බවට බුද්ධි තොරතුරු ලැබී ඇති බැවින් එම ප්‍රදේශයේ සංචාරය කිරීමෙන් වළකින ලෙස ශ්‍රී ලංකාවේ අමෙරිකානු තානාපති කාර්යාලය අද (23) මෙරට රැඳී සිටින අමෙරිකානු ජාතිකයින්ට දැනුම් දුන්නා.

ශ්‍රී ලංකාවේ අමෙරිකානු තානාපති කාර්යාලය සඳහන් කළේ කිසියම් හෝ සැකකටයුතු කටයුත්තක් දුටුවහොත් 119 යන ක්ෂණික දුරකථන අංකයට දැනුම්දෙන ලෙසයි.

---