BYD ගැන ජෝන් කීල්ස් දුන් තොරතුරු පිලිගන්න රේගුව බෑ කියයි

2025 සැප්‍තැම්‍බර් 05, පෙ.ව. 12:02

ශ්‍රී ලංකා රේගුව විසින් රඳවාගෙන සිටි BYD වාහන තොගයක් මුදාගැනීම සම්බන්ධයෙන් ජෝන් කීල්ස් සී.ජී ඔටෝ සමාගම (JKCG) විසින් සිය පාරිභෝගිකයින් සහ පාර්ශ්වකරුවන් වෙත නවතම තොරතුරු දැනුම් දෙයි.

අගෝස්තු 7 වන දින අභියාචනාධිකරණය හමුවේ ගොනු කළ රිට් පෙත්සමකට අනුව, අධිකරණය විසින් ශ්‍රී ලංකා රේගුවට සහ ශ්‍රී ලංකා රේගු අධ්‍යක්ෂ ජනරාල්වරයාට, බැංකු ඇපකරයක් මත රඳවාගෙන සිටි BYD වාහන 997න් 991ක් වහාම මුදාහරින ලෙස නියෝග කළේය.

මෙම වාහනවලින් කොටසක් මේ වන විටත් පාරිභෝගිකයින් වෙත බෙදාහැර ඇත. සමාගම පවසන්නේ, ඉතිරි වාහන මුල් මිලටම පාරිභෝගිකයින් වෙත ලබාදීමට කටයුතු කරන බවයි.

පසුව, අගෝස්තු 7 වන දින BYD හි තවත් වාහන තොගයක් ශ්‍රී ලංකා රේගුව විසින් රඳවාගෙන ඇත. මේවා ද රිට් පෙත්සමට අදාළ මාදිලියේම වාහන වේ. කෙසේ වෙතත්, 2025 සැප්තැම්බර් 3 වන දින, අභියාචනාධිකරණයේ නියෝගයකට අනුව, මෙම වාහනවලින් 506ක් ද බැංකු ඇපකරයක් මත මුදාහැරීමට නියෝග කර ඇත.

2025 සැප්තැම්බර් 3 වන දින පැවති නඩු විභාගයේදී, රේගුව වෙනුවෙන් පෙනී සිටි නීතිඥවරුන් ප්‍රකාශ කළේ, මීට පෙර කිසිදු නීතිමය උල්ලංඝනයක් හෝ වාණිජමය ආරවුලක් සම්බන්ධයෙන් හෝ වෙනත් හේතුවක් මත BYD වාහන රඳවාගෙන නොමැති බවයි. එමෙන්ම, විවිධ නඩු විභාග අවස්ථාවලදී ශ්‍රී ලංකා රේගුව, BYD විසින් සපයන ලද සාක්ෂි භාරගැනීම ප්‍රතික්ෂේප කර ඇති බව ද නීතිඥවරු සඳහන් කළහ.

සමාගම පවසන්නේ, BYD විද්‍යුත් වාහනවල තාක්ෂණික කාර්යසාධනය සම්බන්ධයෙන් පැතිර යන අසත්‍ය තොරතුරු මුළුමනින්ම ප්‍රතික්ෂේප කරන බවයි. මෘදුකාංග යාවත්කාලීන කිරීම් මගින් වාහනයේ ක්‍රියාකාරීත්වය වැඩිදියුණු කළ හැකි අතර, වාහනයේ මූලික සැලසුම හෝ එහි තාක්ෂණික කාර්ය සාධනය කිසිසේත් වෙනස් නොවන බව ද ඔවුහු අවධාරණය කරති.

ජෝන් කීල්ස් සී.ජී ඔටෝ සමාගම, අදාළ බලධාරීන් සමඟ සමීපව කටයුතු කරමින් සියලුම අවශ්‍ය තොරතුරු ලබා දී ඇති අතර, නීතිමය කටයුතු සඳහා පූර්ණ සහයෝගය ලබා දී තිබේ. සමාගම පාරිභෝගිකයින්ගේ විශ්වාසය ආරක්ෂා කිරීමට සහ සියලුම නීතිමය ක්‍රියාදාමයන්ට අනුකූලව විනිවිදභාවයෙන් කටයුතු කිරීමට කැපවී සිටියි.

අවසාන වශයෙන්, ජෝන් කීල්ස් සී.ජී ඔටෝ සමාගම ශ්‍රී ලංකාවට උසස් තත්ත්වයේ නව බලශක්ති වාහන ලබා දීම සඳහා කැපවී සිටින බවත්, හරිත හා තිරසාර ප්‍රවාහන පද්ධතියක් සඳහා දායක වීමට අපේක්ෂා කරන බවත් ප්‍රකාශ කරයි.