ඔත්තේ ක්‍රමයට ඉන්ධන ලබාදීමේ වෙනසක්? හෙට සහ අනිද්දා දෙකම ඔත්තේ දින වීමෙන් තෙල් බෙදීමේ වෙනසක්

2026 මාර්තු 30, පෙ.ව. 10:05

---

---

ලංකා ඛනිජ තෙල් නීතිගත සංස්ථාව සඳහන් කර ඇත්තේ හෙට (31) සහ අනිද්දා (01), ඔත්තේ දිනයන් වීම හේතුවෙන් ඉන්ධන නිකුත් කිරීමේදී අනුගමනය කළ යුතු ක්‍රමවේදය පිළිබඳ සාකච්ඡා කරමින් සිටින බවයි.

ඒ සම්බන්ධයෙන් අද (30) දිනයේ අවසන් තීරණයක් ගන්නා බව එහි අධ්‍යක්ෂ ජනරාල් මයුර නෙත්තිකුමාර පැවසුවේය.

අංක තහඩුවේ අවසාන අංකය 0,2,4,6 සහ 8 නම් ඉරට්ටේ දිනවලත්, 1,3,5,7 සහ 9 යන අංක ඔත්තේ දිනවලත් ඉන්ධන නිකුත් කිරීමට ලංකා ඛනිජ තෙල් නීතිගත සංස්ථාව පසුගියදා තීරණය කළේය.

නමුත් හෙට (31) සහ අනිද්දා (01) යන දෙදිනම ඔත්තේ දිනයන් වීම මෙම ගැටලුවට හේතු වී ඇත.වත්මන් ඉන්ධන සැපයුම් පාලන පද්ධතියට අනුව, වාහන අංක තහඩුවේ අවසාන අංකය ඉරට්ටේ අංකයක් නම්, ඉන්ධන ඉරට්ටේ අංක සහිත දිනවල සපයනු ලැබේ.

වාහන අංක තහඩුවේ අවසාන අංකය ඔත්තේ අංකයක් නම්, ඉන්ධන ඔත්තේ අංක සහිත දිනවල සපයනු ලැබේ. මාර්තු 31 න් පසු බෙදාහැරීමේ ව්‍යුහය සහ මෙම ඇණවුම් ක්‍රමයේ වෙනස්කම් අවශ්‍යද යන්න අද පැවැත්වෙන උපදේශන රැස්වීමේදී තීරණය කෙරේ.

ඉන්ධන සැපයුම නිසි ලෙස කළමනාකරණය කිරීමට සහ පෝලිම් අඩු කිරීමට මෙම ක්‍රියා පටිපාටිය අනුගමනය කරන බැවින් මහජනතාවගේ සහයෝගය අවශ්‍ය බව ඔහු තවදුරටත් සඳහන් කළේය.

---