සජිත් ඉන්දියාවේ ගියා කියා මා දැනගත්තේ පත්තරෙන්.. හර්ෂ කියයි

2025 නොවැම්‍බර් 12, පෙ.ව. 12:09

විපක්ෂ නායක සජිත් ප්‍රේමදාස මහතාගේ මෑතකාලීන ඉන්දීය සංචාරය පිළිබඳව තමන් ඇතුළු පක්ෂයේ කිසිවෙකුත් දැනුවත්ව නොසිටි බව සමගි ජන බලවේගයේ පාර්ලිමේන්තු මන්ත්‍රී, ආචාර්ය හර්ෂ ද සිල්වා මහතා ප්‍රකාශ කරයි.

රූපවාහිනී වැඩසටහනකට සහභාගී වෙමින් ඒ මහතා මේ බව ප්‍රකාශ කළේය.

විපක්ෂ නායකවරයාගේ මෙම සංචාරය පිළිබඳව තමන් ඇතුළු පක්ෂයේ සෙසු මන්ත්‍රීවරුන් දැනගනු ලැබුවේ පුවත්පත් මාර්ගයෙන් බව හර්ෂ ද සිල්වා මහතා එහිදී අවධාරණය කළේය.

මෙම සංචාරය සම්බන්ධයෙන් මාධ්‍යවේදීන් වැඩිදුරටත් ප්‍රශ්න කළ අවස්ථාවේදී, තමන් කිසිසේත්ම නොදන්නා කාරණයක් පිළිබඳව මින් ඉදිරියට පිළිතුරු ලබා දීමට නොහැකි බව පවසමින් මන්ත්‍රීවරයා එම ප්‍රශ්න මගහැර සිටියේය.

මන්ත්‍රීවරයාගේ මෙම ප්‍රකාශයත් සමඟ සමගි ජන බලවේගයේ අභ්‍යන්තර සන්නිවේදනය සහ තීන්දු ගැනීමේ ක්‍රියාවලිය පිළිබඳව දේශපාලන ක්ෂේත්‍රය තුළ කතාබහක් නිර්මාණය වී තිබේ.