බැසිල්ට කේන්ති ගිහින්! අගමැති කෝල් ආන්සර් කරන්නෙත් නෑ! සාකච්ඡාවේදී රනිල්ගේ ගුණ ගයයි! සාගලගේ වැඩ ගැන හිත ගිහින්

2023 ජූනි 16, පෙ.ව. 3:49

---

---

අග්‍රාමාත්‍ය දිනේෂ් ගුණවර්ධන මහතාට දුරකතන ඇමතුමකටවත් සම්බන්ධ කර ගත නොහැකි වී ඇතැයි ශ‍්‍රී ලංකා පොදුජන පෙරමුණේ ජාතික සංවිධායක හිටපු මුදල් අමාත්‍ය බැසිල් රාජපක්ෂ මහතා ප්‍රකාශ කර තිබෙනවා.

ආණ්ඩු පක්ෂය නියෝජනය කරන පක්ෂ වල නායකයන් සහ ජනාධිපති රනිල් වික්‍රමසිංහ මහතා අතර ජනාධිපති ලේකම් කාර්යාලයේදී පැවති සාකච්ඡාවකදී ඔහු මේ බව සඳහන් කර තිබෙනවා.

ජනාධිපතිවරයා රට ගොඩනැඟීමට ගෙන යන වැඩපිළිවෙළට පොදුජන පෙරමුණේ සහාය ඉදිරියටත් අඛණ්ඩව ලබා දෙන බවද බැසිල් රාජපක්ෂ මහතා එහිදී පවසා ඇතැයි වාර්තා වනවා.

ජනාධිපති කාර්ය මණ්ඩල ප‍්‍රධානී සාගල රත්නායක සහ ජනාධිපති ලේකම් සමන් ඒකනායක සමග වැඩ කිරීම ඉතා අපහසු බවත් ඔවුන් ඕනෑම අවස්ථාවක සාකච්ඡාවක් සඳහා ඇහුම්කන් දීමට සූදානම් බවත් බැසිල් රාජපක්ෂ මහතා සඳහන් කර තිබෙනවා.

නමුත් ඇතැම් අයට තනතුරු ලැබුනාම දුරකථන ඇමතුමක්වත් දීමට අවස්ථාවක් නැති බවත් අග්‍රාමාත්‍යතුමා කාර්යබහුල වූ ආකාරයක් පෙනී යන බවත් ඔහු දුරකථනයට සම්බන්ධ කර ගන්නත් අසීරු බවත් එහිදී බැසිල් රාජපක්‍ෂ මහතා ප්‍රකාශ කර ඇතැයි වාර්තා වනවා.

නමුත් ජනාධිපතිතුමා කොතරම් කාර්යබහුල වුවත් ඇමතුමක් ගත් මොහොතේම ඊට ප්‍රතිචාර දක්වන බවද ඊට ප‍්‍රශංසාව හිමි විය යුතු බවත් බැසිල් රාජපක්ෂ මහතා තවදුරටත් එහිදී ප්‍රකාශ කර තිබෙනවා.

ඉදිරියේදී ආණ්ඩුවේ වැඩසටහන් සඳහා පොදුජන පෙරමුණේ මන්ත්‍රීවරුන් කැඳවන්නේ නම් පළමුව පක්ෂය දැනුවත් කිරීමට එහිදී එකඟතාවකට පැමිණ ඇති අතර මසකට වරක් ආණ්ඩුවේ පක්‍ෂ එක්ව සාකච්චා කිරීමටත් තීරණයක් ගෙන තිබෙන බවද සඳහන්.

---