2023 සැප්‍තැම්‍බර් 29, ප.ව. 1:51
පසුගිය දා පළවූ චැනල් 4 නාළිකාව ප්‍රචාරය කළ පාස්කු ප්‍රහාරය පිළිබඳ වීඩියෝ පටය නිසා හිටපු ජනාධිපති මහින්ද රාජපක්ෂ ඇතුළු රාජපක්ෂ පවුලේ කීර්ති නාමයට හානි වී ඇති නිසා චැනල් 4 නාළිකාවෙන් වන්දි අය කර ගැනීමට ශ්‍රී ලංකා පොදුජන පෙරමුණ සූදානම් වන බව වාර්තා වෙනවා.
මෙම වීඩියෝ පටය ව්‍යාජ බවට චැනල් 4 නාළිකාවේ අධ්‍යක්ෂ හා විධායක නිෂ්පාදක පසුගිය දා පිළිගෙන ඇති බව ද එම නිසා තම පක්ෂ නායකත්වයට ඉන් සිදු වූ අපකීර්තිය සම්බන්ධයෙන් වන්දි ඉල්ලිය යුතු බව ද පොදුජන පෙරමුණු මූලස්ථානයේ පැවති සාකච්ඡාවකදී එම පක්ෂයේ ජ්‍යෙෂ්ඨ මන්ත්‍රීවරුන් පිරිසක් යෝජනා කර ඇත.
හිටපු බුද්ධි ප්‍රධානි සුරේෂ් සලෙයි සහ මෙම චිත්‍රපටයේ කතානායකයා අතර සම්බන්ධයක් නොතිබුණු බවට චැනල් 4 නාළිකාවේ ප්‍රධානීන් පිළිගෙන ඇති නිසා මෙම චිත්‍රපටය සම්පූර්ණයෙන් ව්‍යාජ එකක් බවට ඔප්පු වන බව ද එම නිසා මේ පිළිබඳ වහා ම පක්ෂය ක්‍රියාමාර්ගයක් ගත යුතු බව ද මෙම මන්ත්‍රීන් පිරිස යෝජනා කර ඇත.
මැතිවරණ සමයක් ළඟ එන මොහොතක මෙවැනි ක්‍රියා සිදු කිරීම නිසා පක්ෂයට විශාල හානියක් සිදුවන බව ද එම නිසා මේ පිළිබඳ පක්ෂ නායකයන් සමග සාකච්ඡා කර ඉක්මනින් තීන්දුවකට ආ යුතු බව ත් මෙම මන්ත්‍රීවරුන් පිරිස යෝජනා කර තිබෙනවා.
ඒ අනුව මේ පිළිබඳ පක්ෂ නායක හිටපු ජනාධිපති මහින්ද රාජපක්ෂ සහ පක්ෂ නිර්මාතෘ බැසිල් රාජපක්ෂ මහතා සමග සාකච්ඡා කර පියවරක් ගත යුතු බව මෙහිදී පොදුජන පෙරමුණු ජ්‍යෙෂ්ඨ මන්ත්‍රීවරයෙකු පවසා ඇත.
