රටක් කැළඹූ හලාවත ඛේදවාචකයේ වෙනස්ම කතාවක් එළියට

2024 ඔක්‍තෝබර් 23, පෙ.ව. 12:05

හලාවත, සිංහපුර පදිංචි කෝටිපති ව්‍යාපාරිකයා, බිරිය සහ දියණියගේ මරණ සම්බන්ධයෙන් කෙරෙන පරීක්‍ෂණ රස පරීක්‍ෂක වාර්තා සහ පශ්චාත් මරණ පරීක්‍ෂණ වාර්තා පදනම් කරගෙන නිශ්චිත තීරණයකට එළැඹීමට කටයුතු කරනු ඇතැයි පොලිසිය සඳහන් කරනවා.

ඒ එම මරණ තුන සියදිවි හානිකර ගැනීම්ද, ඝාතනයක්ද නැතහොත් පිලිස්සීමෙන් සිදුවූවක්ද යන්න නිශ්චිතවම තහවුරු කර ගැනීමට අවශ්‍යව ඇති නිසාය.

කෙසේ වෙතත් මේ වන විට කරන ලද මූලික විමර්ශනවලදී පොලිසිය සැක කරනුයේ බිරිය සහ දියණිය මරා පුලුස්සා අදාළ කෝටිපති ව්‍යාපාරිකයා සියදිවි හානිකර ගන්න ඇති බවය.

ඊට හේතු වූ සැක කටයුතු කරුණු කාරණා රැසක් පොලිසිය සතුව ඇත. පොලිසිය පවසන්නේ එම හේතු නිසා නිවෙස තුළම සිදුවූ යම් සිදුවීමක ප්‍රතිඵලයක් මත මෙම මරණ සිදුව ඇති බවය.

සිද්ධිය සැලවීමෙන් පසු එම ස්ථානයට ගිය පොලිස් නිලධාරීන්ට පෙනී ගිය එක් කරුණක් වූයේ නිවෙසේ ‍ෙදාර තිබී ඇත්තේ ඇතුළතින් අගුළුලා බවය. එමෙන්ම නිවෙසේ සෑම ජනේලයක් සහ ‍ෙදාරවල්ද තිබී ඇත්තේ ඇතුළතින් අගුලුලාය.

මේ අනුව පොලිසිය සැක කළේ පිටස්තරයකුට නිවෙසට ඇතුළු වී හෝ පිටව යන්නට නැති බවය. ඒ නිසා මෙම මරණ තුනම නිවෙස තුළම සිදු වූ යම් සිදුවීමක ප්‍රතිඵලයක් මත වූයේද යන සැකය නිලධාරීන්ට ඇති වී ඇත. තවද නිවෙස මිදුලේ තිබූ පොල් ලෙලි හා දර කැබැලි නිවෙසේ සාලයේ පිලිස්සී තිබෙන අයුරුද නිලධාරීන්ට නිරීක්‍ෂණය විය.

මේ අනුව නිලධාරීන්ගේ සැකය එකම පැත්තට යොමු වුවද රස පරීක්‍ෂක වාර්තාව සහ පශ්චාත් මරණ පරීක්‍ෂණ වාර්තාවද අධ්‍යයනය කර මරණවලට හේතුව අනාවරණය කර ගන්නා බව මේ පිළිබඳව කළ විමසීමේදී හලාවත කොට්ඨාස භාර උසස් නිලධාරියෙක් කීවේය.

මෙම සිද්ධියෙන් මරණයට පත්ව තිබුණේ එස්.ඒ. සේනාරත්න නමැති පියා, මංජුලා නිරෝෂණී නමැති බිරිය සහ දියණිය නෙත්මි නිමේෂා යන තිදෙනාය.

මියගිය ව්‍යාපාරිකයා හලාවත නගරයේ ඉඩම් කැබැලි කර අලෙවි කිරීමේ ව්‍යාපාරයක් පවත්වාගෙන ගොස් ඇති අතර ඔහුගේ බිරිය හලාවත ප්‍රාදේශීය ලේකම් කාර්යාලයේ සංවර්ධන නිලධාරිනියක ලෙස කටයුතු කළාය. දියණිය නිමේෂා හලාවත ආනන්ද ජාතික පාසලේ 10 ශේ්‍රණියේ ඉගෙනුම ලබමින් සිට ඇති අතර ඇය අ.පො.ස. සාමාන්‍ය පෙළ විභාගයට මුහුණදීමට සූදානම්ව සිටියාය.

කෙසේ වෙතත් ව්‍යාපාරික සේනාරත්නගේ සහ දියණිය නෙත්මි නිමේෂාගේ සිරුරු තිබී ඇත්තේ සාලයේය. එම සිරුරු බෙහෙවින් පිලිස්සී තිබිණි. ඒ නිසා එම සිරුරු හඳුනා ගැනීමට නොහැකි වූ අතර ව්‍යාපාරිකයාගේ බිරියගේ සිරුර පහත මාලයේ කාමරයක තිබී සොයාගැනිණි. ඇගේ ගෙල කපා දමා තිබූ අතර එය කඳින් වෙන්කර ඇති බව නිරීක්‍ෂණය විය.

සිද්ධිය සම්බන්ධයෙන් විමර්ශන ඇරැඹූ පොලිසියට මෙම මරණ පිටස්තරයකු විසින් සිදුකළ බවට සාක්‍ෂි ඊයේ සවස් වනතුරුත් සොයාගත නොහැකි විය.

කෙසේ වෙතත් නිවෙසේ ගෘහමූලිකයා සහ බිරිය අතර ආරවුල් ඇති වී තිබූ බවට තොරතුරුද පොලිසිය සතුවිය. හලාවත කුරුණෑගල පාරේ ව්‍යාපාරිකයාගේ බිරියට අක්කර 5ක ඉඩමක් අයත්ව තිබී ඇති බවත් එම ඉඩම කට්ටිකර විකිණීමට ඇගේ සැමියා උත්සාහ කර තිබූ බවත් එම තොරතුරු අතර විය. ඒත් ව්‍යාපාරිකයාගේ බිරිය ඊට කැමැත්ත පළකර නොතිබූ බැවින් දෙදෙනා අතර ගැටලුකාරී තත්ත්වයක් ඇතිව තිබූ බවද ලැබුණු තොරතුරුවල සඳහන්ය.

මියගිය ව්‍යාපාරිකයා එම ඉඩම කට්ටිකර විකිණීමට උත්සාහ කර ඇත්තේ ඔහු මුදල් ගැටලු කිහිපයකට මැදිව සිටි නිසා බව කියයි.

පොලිසිය නිවෙස අවට පිරිසගෙන්ද කරුණු කාරණා විමසීය. ඒ අවට ස්ථාපිත සී.සී.ටී.වී. කැමරාද නිරීක්‍ෂණය කළේය. එහෙත් එම නිවෙසට ඇතුළු වන හෝ නිවෙසින් පිටවන කිසිවකු සම්බන්ධයෙන් කිසිදු තොරතුරක් හෝ රූපරාමු කිසිවක් පොලිසිය සොයාගෙන තිබුණේ නැත.

එමෙන්ම මෙම නිවෙස තුළ මෙවන් අපරාධයක් හෝ ගිනි ගැනීමක් සිදුවුවද නිවෙස තුළින් කෑගැසීමක් හෝ වෙනයම් කිසිදු ශබ්දයක් අහල පහළ අයට ඇසී නැත. එයද විමර්ශනයට ගෙන දුන්නේ කිසියම් ගැටලුවක්ය. නිවෙස ගිනි ගන්නා අයුරු හැරෙන්නට වෙන කෑගැසීමක් හෝ මරලතෝනියක් තමන් නොදුටු බව අසල්වාසීහු පැවැසූහ. පොලිසිය මෙන්ම ගිනි නිවන ඒකකය පවා එම නිවෙසට පැමිණෙන්නේ අසල්වැසියන් ලබාදුන් තොරතුරු මතය.

රස පරීක්‍ෂකවරයා ගිනිගත් නිවෙසට ඇතුළු වී සිද්ධිය හොඳින් නිරීක්‍ෂණය කළ අතර සොකෝ නිලධාරීන්ද විමර්ශන ආරම්භ කර තිබිණි. මෙහිදී පෙනී ගියේ කිසියම් ඉන්ධන වර්ගයක් සාලය මැදට විසිකර ඇති අයුරුය. නිවෙසේ ගෘහ උපකරණ ඇතුළු සෙසු ද්‍රව්‍ය මළ සිරුරුවලට පවා එම ඉන්ධන වැටී තිබූ බවත් එම ඉන්ධන වැටීමත් සමඟ සිරුරු ඇතුළු ගෘහ උපකරණ තදින් පිලිස්සී ගොස් ඇති බවත් විමර්ශනයේදී පෙනී ගියේ පහත මාලය පුරා ගින්න පැතිරීමට හැකියාව ලැබී ඇත්තේ එම ඉන්ධන නිසා බව පොලිසියේ සැකය විය.

මෙය ඝාතනයක් වී නම් 15 හැවිරිදි නිමේෂා ඝාතනය වූයේ මන්දැයි සැකයකි. ව්‍යාපාරිකයා සහ බිරිය අතර ඇති වූ කිසියම් ආරවුලක් මත ඇය ඝාතනය කළත් දියණිය මරා දැමීමට තරම් හේතු වූ කරුණු සැක සහිතය. පිටස්තරයකු විසින් මෙම ඝාතන සිදුකොට මියගිය වූවන් පුලුස්සා දැමුවේ නම් ඊට හේතුව කුමක්ද යන්න තවමත් නිරීක්‍ෂණය වී නැත. මියගිය ව්‍යාපාරිකයාගේ සහෝදරයකු පවසා ඇත්තේ නවදෙනකුගෙන් යුත් පවුලේ අටවැනියා එම ව්‍යාපාරිකයා බවය. මියගිය සහෝදරයා පවුලට හයියක් වූ බවද හෙතෙම පවසා තිබුණේය.

“අපි නිකවැරටියේ ජීවත් වුණේ. මීට අවුරුදු දාහතකට කළින් කසාද බැඳලා තමයි මල්ලි හලාවත පදිංචියට ආවේ. එයා නංගිටත් හරි ආදරයෙන් හිටියේ. අපි දන්න විදිහට දෙන්නා අතර ආරවුල් තිබුණේ නැහැ. ඒ දුවත් ඉගෙනගන්න දක්‍ෂයි.” ඔහු පවසා තිබුණේය.

ඉකුත් 18 වැනිදා දහවල් කාලයේ නිවෙසේ ගතකර ඇති මෙම ව්‍යාපාරිකයා රාත්‍රි කාලයේ සිය දියණිය යතුරුපැදියකින් ගොස් ඇය නිවෙසට රැගෙනවිත් තිබිණි. ඒ වන විට ඇය උපකාරක පන්තියකට සහභාගි වීමට නිවෙසින් පිටව ගොස් තිබුණාය. උපකාරක පන්තිය නිමවී ඇය යෙහෙළියකගේ නිවෙසක රැඳී සිටියදී මියගිය ව්‍යාපාරිකයා ඇය නිවෙසට කැඳවා ගෙනවිත් තිබුණේය. ඇය ඝාතනය වන්නේ ඉන් පසුවය.

මේ පිළිබඳව කළ විමසීමකදී හලාවත කොට්ඨාස භාර පොලිස් අධිකාරි පාලිත අමරතුංග කීවේ පැති දෙකක් ඔස්සේ විමර්ශන සිදු කරන බවත් තවදුරටත් විමර්ශන සිදු කෙරෙන අතර ඉන් අනතුරුව පශ්චාත් මරණ පරීක්‍ෂණය සිදු කරන බවත්ය.

මේ අතර සිදුකළ පශ්චාත් මරණ පරීක්‍ෂණයේදී අනාවරණය වන්නේ ව්‍යාපාරිකයාගේ බිරිය සහ දියණිය ගෙල කපා ඝාතනය කර ඇති බවය.

ව්‍යාපාරිකයාගේ බිරියගේ ගෙලට පිහි පහර හයක් එල්ල කර ඇති බවත් දියණියගේ ගෙලේද තියුණු ආයුධයකින් පහර දුන් බව කියන තුවාල දෙකක් නිරීක්‍ෂණය වී තිබේ. එම තුවාල හා ගින්නෙන් පිලිස්සීම හේතුවෙන් ඇය මියගොස් තිබිණි.

කෙසේ වෙතත් පිලිස්සී මියගොස් සිටි ව්‍යාපාරිකයාගේ සිරුරේ කිසිදු තුවාලයක් දක්නට නැති බව පශ්චාත් මරණ පරීක්‍ෂණයේදී හෙළිවිය.

එහෙත් සිරුර සම්බන්ධයෙන් විවෘත තීන්දුවක් ප්‍රකාශයට පත්කර තිබූ අතර අධිකරණ විශේෂඥ වෛද්‍යවරයා පවසා තිබුණේ දින 14කට පසු සිරුරු ඥාතීන්ට භාරදෙන ලෙසය. එතෙක් මළ සිරුරු මෘත ශරීරාගාරයේ තැන්පත් කර තිබිණි. ඒ අනුව සැමියා විසින් බිරිය සහ දියණියගේ ගෙල කපා මරා ඇති බව පොලිසිය කළ පරීක්‍ෂණයේදී සැක පළ වී තිබේ.

අධික ලෙස මත්පැන් පානය කර ඇති ව්‍යාපාරිකයා බිරියගේ සහ දියණියගේ ගෙල කපා ඔහුද මියගොස් ඇති බව විමර්ශනයේදී හෙළි වී ඇත.

හලාවත කොට්ඨාස භාර ජේ‍යෂ්ඨ පොලිස් අධිකාරි පාලිත අමරතුංග මහතාගේ උපදෙස් මත හලාවත මූලස්ථාන පොලිස් පරීක්‍ෂක රුක්ෂාන්ත පෙරේරාගේ මෙහෙයවීමෙන් අපරාධ විමර්ශන අංශයේ ස්ථානාධිපති අරුණ ශාන්ත ඇතුළු කණ්ඩායමක් වැඩිදුර පරීක්‍ෂණ පවත්වති.

(උපුටා ගැනීමකි)