අනුරගේ මීටරේ අවුට් ගිහින්.!

2025 ජූලි 15, පෙ.ව. 12:09

වෙරිටේ රිසර්ච් ආයතනය විසින් පවත්වාගෙන යන මාර්ගගත තොරතුරු මෙවලමක් වන ‘අනුර මීටරය’ අනුව ජනාධිපති අනුර කුමාර දිසානායකගේ 2024 ජනාධිපතිවරණ ප්‍රතිපත්ති ප්‍රකාශනයේ ඇතුළත් පොරොන්දුවල ප්‍රගතිය නිරීක්ෂණය කරනු ලබයි.

වෙරිටේ රිසර්ච් ආයතනය යටතේ පවත්වාගෙන යන Manthri.lk වෙබ් අඩවිය මඟින් අනුර මීටරය ක්‍රියාත්මක වන අතර ජනතාව ඉහළ උනන්දුවක් දක්වන ආර්ථික ප්‍රතිසංස්කරණ, ආණ්ඩුකරණය, දූෂණ මර්දනය, නීතිය හා සාමය සහ සමාජ ආරක්ෂණය යන අංශ ආවරණය වන පරිදි ජනාධිපතිවරයාගේ පොරොන්දුවලින් 22ක් එයින් විමර්ශනය කෙරේ.

මෙසේ ඉටුකළ පොරොන්දු වර්ගීකරණය තෝරාගත් පොරොන්දු 22න් 5%ක පංගුවක් වන අතර මෙකී පොරොන්දු 22න් 35%ක් අර්ධ වශයෙන් ඉටුකර ඇති අතර තවත් 14%ක් ආරම්භ කර තිබේ. කෙසේ වෙතත් එම පොරොන්දු 22න් 10ක් හෙවත් 45%ක් ගැන යාවත්කාලීන තොරතුරු නැතැයි එහි සඳහන් වේ.

ඒ අනුව ජනාධිපති අනුර දිසානායක මහතා තම ජනාධිපතිවරණ ප්‍රතිපත්ති ප්‍රකාශනයේ ඇතුළත් ප්‍රමුඛ පොරොන්දු 22කින් එකක් ඉටුකර ඇතැයි වෙරිටේ රිසර්ච් ආයතනය පවසයි.

උපයන විට ගෙවීමේ බද්ද සංශෝධනය කිරීම එම පොරොන්දුවයි.

අර්ධ වශයෙන් ඉටුකර ඇති පොරොන්දු වන්නේ අඩු ආදායම්ලාභී පවුල් සඳහා මසකට රු. 10,000ක් හෝ ඊට වැඩි සහනාධාර මුදලක් ලබා දීම, සහනාධාර අවශ්‍ය ජ්‍යෙෂ්ඨ පුරවැසියන්ට රුපියල් 5,000ක මාසික දීමනාවක් දීම, ආධාර අවශ්‍ය නිදන්ගත රෝග සහිත පුද්ගලයන්ට අවම වශයෙන් මසකට රුපියල් 10,000ක මූල්‍යාධාර, කඳුකර වතු කම්කරුවන්ගේ වැටුප් ජීවන වියදමට සරිලන සේ ඉහළ නැංවීම, තර්කානුකූලව වෙන්කරන ලද අමාත්‍යාංශ 25කට ඇමතිවරුන් 25ක් සහ අනුරූපීව නියෝජ්‍ය ඇමතිවරු පත් කිරීම සහ රාජ්‍ය ඇමැති ධුර අහෝසි කිරීම, අඩු ආදායම්ලාභී පවුල්වල ආබාධ සහිත පුද්ගලයන් සඳහා මසකට රුපියල් 10,000ක මූල්‍යාධාරයක් දීම, දැනට දින නියමයක් නොමැතිව කල්තබා ඇති පළාත් සභා සහ පළාත් පාලන මැතිවරණ වසරක් ඇතුළත පවත්වා ජනතාවට පාලනයට සම්බන්ධ වීමට අවස්ථාව සැලැසීම හා විනිවිදභාවය සහතික කිරීම සඳහා රාජ්‍ය ව්‍යවසායන්වල මෙහෙයුම් පිළිබඳ සම්පූර්ණ තොරතුරු මහජනතාවට ලබා ගැනීමට පහසුකම් සැලසීමයි.

පොරොන්දු ඉටුකිරීම ආරම්භ කළ තත්ත්වයෙන් පවතින්නේ ප්‍රකාශනයේ නිදහසට බාධා වන වගන්තීන් ඉවත් කොට 2024 අංක 09 දරන මාර්ගගත ක්‍රමවල සුරක්ෂිතභාවය පිළිබද පනත සංශෝධනය කිරීම, ත්‍රස්තවාදය වැළැක්වීමේ පනත ඇතුළු සියලු මර්දනකාරී අණපනත් අහෝසි කර රට පුරා ජනතාවගේ සිවිල් අයිතිවාසිකම් සහතික කිරීම හා කඳුකර ප්‍රජාවට ස්ථිර නිවසක් තනා ගැනීම සඳහා ඉඩම් ලබාදීමය.

අනුර මීටරයට අනුව දේශපාලන සිරකරුවන් නිදහස් කිරීම හා ඔවුන් නිදහසේ සමාජගත වීම සහතික කිරීම, විධායක ජනාධිපති ධුරය අහෝසි කොට විධායක බලතල රහිත ජනාධිපතිවරයකු පාර්ලිමේන්තුව විසින් පත්කිරීම, 2015 -2019 කාලය තුළ නව ආණ්ඩුක්‍රම ව්‍යස්ථාවක් සම්පාදනය කිරීමට අනුගමනය කළ ක්‍රියාදාමය කඩිනමින් අවසන් කිරීම, උතුරු – නැඟෙනහිර ඇතුළු සෑම ප්‍රදේශයකම පසුගිය කාලයේ සිදුවූ දේශපාලන ඝාතන, අතුරුදන් කිරීම් සහ පහරදීම් පිළිබඳ විමර්ශනය කර යුක්තිය ඉටු කිරීම, 2019.04.21 දින සිදු වූ පාස්කු ඉරුදින ප්‍රහාරය සම්බන්ධයෙන් ජනාධිපති කොමිෂන් සභාව ලබා දුන් නිර්දේශවලට අනුව අදාළ දේශපාලනඥයන් සහ නිලධාරීන්ට එරෙහිව කඩිනමින් නීතිමය ක්‍රියාමාර්ග ගැනීම,

ජාතිවාදය හා ආගමික අන්තවාදය හේතුකොට ගෙන සිදු වී ඇති ප්‍රචණ්ඩ ක්‍රියා විමර්ශනය කිරීමට සත්‍ය හා ප්‍රතිසන්ධාන කොමිසමේ ක්‍රියාකාරිත්වය පුළුල් කිරීම, ණය තිරසර බව පවත්වා ගැනීම හා දරා ගත හැකි මට්ටමක ණය පොලී තබා ගැනීම ඉලක්ක කරගනිමින් අවශ්‍යතාව අනුව ණය ප්‍රතිව්‍යුහගතකරණය කිරීමේ කටයුතුවලදී භාවිත කිරීම සඳහා විකල්ප ණය තිරසරකරණ විශ්ලේෂණයක් පිළියෙල කිරීම, රාජ්‍ය මූල්‍ය විනිවිදභාවය සහ ආණ්ඩුවේ වගවීම සහතික කිරීමට හා ණය අවභාවිතය සිදු කළ පුද්ගලයන්ට එරෙහිව නීතිමය පියවර ගැනීම

සඳහා ආණ්ඩු විසින් ලබා ගත් විදේශ ණය පිළිබඳ සවිස්තරාත්මක ණය විගණනයක් සිදුකිරීම, පාර්ලිමේන්තු මන්ත්‍රිවරුන් හෝ ඔවුන්ගේ සමීපතම පවුලේ සාමාජිකයන් සෘජුව හෝ වක්‍රව රජය සමඟ ව්‍යාපාර හෝ ගිවිසුම්වල යෙදීම වැළැක්වීම හා සොරකම් කරන ලද වත්කම් ආපසු ලබාගැනීමේ වැඩසටහන සහ මත්ද්‍රව්‍ය සහ අපරාධ පිළිබඳ එක්සත් ජාතීන්ගේ කාර්යාලය ආදී ජාත්‍යන්තර ආයතනවල තාක්ෂණික සහ උපදේශන සේවාවන් ලබා ගනිමින් සොරාගත් රාජ්‍ය වත්කම් නැවත ලබා ගැනීමට සොරකම් කළ රාජ්‍ය වත්කම් නැවත ලබාගැනීමේ ආයතනයක් පිහිටුවීම යන පොරොන්දු ගැන යාවත්කාලීන තොරතුරු නැත.

මෙම පොරොන්දුවල ප්‍රගතිය මැනීම සඳහා ප්‍රකාශිත මූලාශ්‍රවල ඇති තොරතුරු, තොරතුරු දැනගැනීමේ ඉල්ලීම්වලට ලැබුණු ප්‍රතිචාර හරහා ලැබෙන තොරතුරු හා පරිශීලකයන් ලබාදෙන විශ්වසනීය තොරතුරු යන තොරතුරු මූලාශ්‍ර යොදාගත් බවද වෙරිටේ රිසර්ච් ආයතනය වැඩිදුරටත් පවසයි.