චමල් රාජපක්ෂටත් වැඩ වරදීද?

2025 ජූනි 08, පෙ.ව. 12:06

හිටපු කථානායකවරයකු මෙන්ම මහින්ද රාජපක්ෂ හා ගෝඨාභය රාජපක්ෂ රජයයන් සමයේ ප්‍රබල ඇමැතිවරයකු ලෙස කටයුතු කළ චමල් රාජපක්ෂ මහතා ඉදිරි දින කිහිපය තුළ අත්අඩංගුවට ගැනීමට නියමිත බව වාර්තා වේ.

රජයේ මුදල් වංචා කිරීමේ සිද්ධියකට අදාලව ඔහු අත්අඩංගුවට ගැනීමට නියමිත බව සඳහන්.

ඔහුට එරෙහිව ඇති ප්‍රධාන චෝදනාව වන්නේ 2022 වසරේ මැයි මස 9 වැනිදා සිදුවූ අරගලයේදී තිස්සමහාරාමයේ මාගම ප්‍රදේශයේ පිහිටි තම නිවෙස ඇතුළු දේපළවලට ගිනි තබා විනාශ කළ බවට ව්‍යාජ තොරතුරු ලබා දී රජයෙන් රුපියල් එක්කෝටි පනස්ලක්ෂ විසි දෙදහස් හයසීයක (රු. 1,52,22,600) මුදලක් වංචනිකව ලබා ගැනීමයි. මෙම විමර්ශන අල්ලස් හෝ දූෂණ විමර්ශන කොමිෂන් සභාව විසින් සිදු කරනු ලබන බව වාර්තා වේ.

කෙසේවෙතත් තිස්සමහාරාමයේ මාගම ප්‍රදේශයේ පිහිටි එම දේපළ චමල් රාජපක්ෂ මහතාට අයත් එකක් නොවන බවට කරුණු අනාවරණය වී ඇතැයි පැවසෙයි.

මෙම දේපළ වෙනත් පුද්ගලයෙකුගේ නමින් ලියාපදිංචි වී ඇති බවට හඳුනාගෙන ඇති අතර චමල් රාජපක්ෂ මහතා ප්‍රකාශ කළ පරිදි එම ස්ථානයේ නිවෙසක් නොතිබුණු බවත්, එහි වී ගබඩාවක් පමණක් තිබූ බවත් විමර්ශනවලදී හෙළි වී තිබේ.

චමල් රාජපක්ෂ මහතා විසින් අදාළ දේපළ තමන් භුක්ති විඳින බවට දිවුරුම් ප්‍රකාශයක් ලබා දී ඇති නමුත්, පසුව සිදු කළ විමර්ශනවලදී එහි නිවෙසක් නොව වී ගබඩාවක් පමණක් තිබූ බව තහවුරු වී ඇත. මෙම තොරතුරු අනාවරණය වීමත් සමඟ, අදාළ දේපළ චමල් රාජපක්ෂ මහතාට අයත් නොවන බව තවදුරටත් තහවුරු වී තිබේ.

දේපළ අයිතිය පිළිබඳ ගැටලු මතුවීමෙන් පසු, 2023 ජූලි 27 වන දින රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශයේ ලේකම් කේ.ඩී.එන්.ආර්. අසෝක මහතාගේ අත්සනින් යුතුව නිකුත් කළ ලිපියක් මගින් එම අමාත්‍යාංශයේ අතිරේක ලේකම් (පාර්ලිමේන්තු කටයුතු අංශ) ආර්.එම්.එන්.ඊ.කේ. රණසිංහ මහතා විසින් අදාළ ගෙවීම් තම විෂයපථය යටතේ කළ නොහැකි බව හානි පූරණය සඳහා වන කාර්යාලයේ අධ්‍යක්ෂ ජනරාල් වෙත දන්වා තිබේ.

කෙසේ වෙතත්, 2023 ජූලි 20 දිනැතිව තක්සේරු දෙපාර්තමේන්තුවේ තක්සේරුකරුවකු විසින් ඉදිරිපත් කරන ලද වාර්තාවක, එම ස්ථානයේ නිවෙසක් තිබූ බවත්, එහි වටිනාකම රුපියල් 1,48,00,000ක් (එක් කෝටි හතළිස් අට ලක්ෂයක්) බවත් සඳහන් කර තිබේ. මෙය පෙර විමර්ශන සොයාගැනීම්වලට පරස්පර වේ.

ලැබී ඇති තොරතුරු අනුව, චමල් රාජපක්ෂ මහතා වී ගබඩාවේ හානිය වෙනුවෙන් රුපියල් 222,600ක් (දෙලක්ෂ විසිදෙදහස් හයසීයක්) සහ සැබවින්ම නොතිබූ නිවෙසක් වෙනුවෙන් රුපියල් 1,48,00,000ක් (එක් කෝටි හතළිස් අට ලක්ෂයක්) වශයෙන් මුළු මුදල රුපියල් 1,50,22,600ක් (එක්කෝටි පනස්ලක්ෂ විසිදෙදහස් හයසීයක්) රජයෙන් ලබාගෙන ඇති බව තහවුරු වී තිබේ.

මෙම මුදල් ගෙවීම සම්බන්ධයෙන් නීතියට හා රාජ්‍ය චක්‍රලේඛයන්ට පටහැණිව කටයුතු කළ රජයේ නිලධාරීන්ට එරෙහිවද ඉදිරියේදී නීතිමය ක්‍රියාමාර්ග ගැනීමට නියමිත බව වාර්තා වේ.

මෙම මුළු සිද්ධිය සම්බන්ධයෙන් අල්ලස් හෝ දූෂණ විමර්ශන කොමිෂන් සභාව විසින් පුළුල් පරීක්ෂණයක් ආරම්භ කර ඇති අතර, චමල් රාජපක්ෂ මහතා පමණක් නොව, මෙම ක්‍රියාවලියට සම්බන්ධ වූ සියලුම පාර්ශ්වකරුවන් සම්බන්ධයෙන් පරීක්ෂණ පැවැත්වීමට නියමිතය.

ශ්‍රී ලංකාවේ දේශපාලන හා ආර්ථික අර්බුද මධ්‍යයේ, මහජන මුදල් අවභාවිතය සම්බන්ධ මෙවැනි චෝදනා විශේෂ අවධානයක් යොමු කරවයි. වංචා, දූෂණ මැඩපැවැත්වීම ශ්‍රී ලංකාවේ ආර්ථික ප්‍රතිසංස්කරණ සඳහා ඉතා වැදගත් සාධකයක් ලෙස සැලකෙන අතර, මෙවැනි සිද්ධීන් සම්බන්ධයෙන් ගන්නා ක්‍රියාමාර්ග රටේ දූෂණ විරෝධී සටනේ ප්‍රගතිය මැනීමට උපකාරී වේ.