ඉන්දීය පාමකෝටියා පිලිගෙන රෝහල්වලට බාල බෙහෙත්වලින් රෝගීන් මියයනවා…

2025 දෙසැම්‍බර් 16, පෙ.ව. 12:11

බ්‍රිතාන්‍ය හෝ යුරෝප ප්‍රමිතිය මඟ හැර ඉන්දියානු ප්‍රමිතියෙන් යුත් ඖෂධ මෙරට රෝහල් පද්ධතියට සහ වෙළඳපොළට මුදා හැරීමට වර්තමාන රජය බලයට පත්වීමෙන් පසුව ඖෂධ නියාමන අධිකාරිය ගනු ලැබූ තීරණය අදූරදර්ශී තීරණයක් බවත් මේ සම්බන්ධයෙන් වහා විමසා බලා ප්‍රමිතියෙන් යුත් ඖෂධ මෙරට රෝහල් පද්ධතිය තුළට මුදා හැරීම සඳහා කඩිනම් වැඩපිළිවෙළක් සකස් කරන ලෙසට වෛද්‍ය හා සිවිල් අයිතිවාසිකම් පිළිබඳ වෛද්‍යවරුන්ගේ වෘත්තිය සමිති සන්ධානයේ සභාපති විශේෂඥ වෛද්‍ය චමල් සංජීව මහතා ජනාධිපතිවරයාගෙන් ඉල්ලීමක් කරයි.

ඒ මහතා මේ අදහස් පළ කළේ ඉන්දියාවෙන් ගෙන්වන ලද Ondesterone Injection නම් වමනය ඕකාරය ශල්‍යකර්ම හා නිර්වින්දන ක්‍රියාවලිය තුළ මතුවන අතුරු ආබාධ පාලනය කිරීමට ලබා දෙන ඖෂධයක් ආසාත්මික වීම නිසා රෝගීන් මිය යාම සහ එම ඖෂධය තාවකාලිකව භාවිතාවෙන් ඉවත් කිරීම සම්බන්ධයෙන් මාධ්‍ය සාකච්ඡාවකදී අදහස් දක්වමිනි.

අදාල ඖෂධ කුප්පි තුළ බැක්ටීරියා විස අඩංගුව පැවැති බව මහනුවර ජාතික රෝහලේ ශුද්‍ර ජීව විද්‍යා අංශය මගින් සිදු කරන ලද පරීක්ෂණයකින් තහවුරු වී ඇති බව ඖෂධ නියාමන අධිකාරියේ සභාපති විශේෂඥ වෛද්‍ය ආනන්ද විජේවී ක්‍රම මහතා. ජනමාධ්‍යවලට තහවුරු කොට තිබිණි.

මීට පෙර හිටපු සෞඛ්‍ය අමාත්‍යය කෙහෙළිය රඹුක්වැල්ල මහතා පාලන කාලයේදී මෙරටට ගෙන්වන ලද සහ රෝහල්වලට බෙදාහරණ ලද ඖෂධ තුළද මේ අන්දමට බැක්ටීරියාවිස අඩංගු වූ බව තහවුරු විය. මේ අනුව හිටපු සෞඛ්‍ය අමාත්‍ය කෙහෙළිය රඹුක්කැල්ල පාලන කාලයේදී මෙන් යළිත් වරක් මෙරට සෞඛ්‍ය පද්ධතිය තුළ බාල ඖෂධ පැතිර යාම සම්බන්ධව ජනතාව තුළ අවිශ්වාසයක් නිර්මාණය විය හැකි බැවින් ඖෂධ නියාමන අධිකාරිය මගින් ඉන්දියානු ඖෂධ නියාමන අධිකාරියේ ප්‍රමිතිය යටතේ ඖෂධ මෙරට තුළ ලියාපදිංචි කිරීමට ගන්නා ලද තීරණය අධූරදර්ශී සහ මිනිස් ජීවිත අනතුරට හෙළන තීරණයක් වන බැවින් වහාම ඒ සම්බන්ධව විමසා බලා ඉන්දියානු බාල බෙහෙත් රට පුරා ව්‍යාප්තවීමේ අවධානම පාලනය කිරීමට කටයුතු කරන ලෙසද ඒ මහතා ජනාධිපතිවරයාගෙන් ඉල්ලීමක් කලෙය.

මෙම ප්‍රශ්න සහගත බාල වමන ඖෂධය රාජ්‍ය ඖෂධ සංස්ථාව මගින් ඖෂධ නියාමන අධිකාරියේ අනුමැතිය සහතික වලට යටත්ව ආනයනය කොට ඇති බැවින් සම්පූර්ණ ක්‍රියාවලිය සම්බන්ධයෙන්ම පුරුදු විමර්ශනයක් සිදුකිරීම සඳහා අපරාධ පරීක්‍ෂණ දෙපාර්තමේන්තුව වෙතින්ද ඉල්ලීමක් සිදු කිරීමට බලාපොරොත්තු වන බව ඔහු වැඩිදුරටත් සඳහන් කළේය.

හිටපු සෞඛ්‍ය අමාත්‍යවරුන් පාලන කාලවලදී අමාත්‍යාංශයේ සේවය කළ දූෂණ චෝදනා එල්ල වී ඇති හා අකාර්යක්ෂම නිලධාරීන් තවදුරටත් අමාත්‍යාංශය ඉහළ තනතුරු දැරීමේ ආදීනව තමන් පෙන්වා දුන් බවත් දැන් එම කරුණු මහජනතාවගේ ජීවිත සමග සෙල්ලම් කරන තත්ත්වය කණගාටුදායක බවද ඔහු වැඩිදුරටත් සඳහන් කළේය.