චිකුන්ගුන්යා අවදානම වැඩිම කලාපය මෙන්න

2025 ජූනි 09, පෙ.ව. 12:11

පවතින වැසි තත්ත්වයත් සමග පැතිර යන ඩෙංගු සහ චිකුන්ගුන්යා රොගී තත්ත්වයන් වැඩි වශයෙන් පැතිර යාම බස්නාහිර පළාත තුළ වාර්තා වී ඇති බව සෞඛ්‍ය අමාත්‍යංශයේ වසංගත රෝගවිද්‍යා පිළිබඳ විශේෂඥ වෛද්‍ය අතුළ ලියනපතිරණ මහතා පවසනවා.

විශේෂඥ වෛද්‍යවරයා පැවසුවේ බස්නාහිර පළාත තුළ කොළඹ සහ ගම්පහ දිස්ත්‍රික්ක දෙක තුළ මෙම රෝග වැඩි වශයෙන් පැතිරෙන බව මේ වන විට අනාවරණය වී ඇති බවයි.

චිකුන්ගුන්යා සහ ඩෙංගු රෝගයේ මුල් අවස්ථාවේදී රෝග ලක්ෂණ බොහෝ දුරට සමාන විට හැකි බවත් ඒ අනුව උණ, හිසරදය, ඇඟපත වේදනාව සහ වමනය ඇතිවිය හැකි බවත් මේ හේතුවෙන් දින දෙකකට වැඩි කාලයක් අදාළ රෝග ලක්ෂණ පවතින්නේ නම් හැකි ඉක්මනින් වෛද්‍යවරයෙකු හමුවී අදාළ ප්‍රතිකාර ලබා ගත යුතු බවද විශේෂඥ වෛද්‍යවරයා පෙන්වා දුන්නා.

එමෙන්ම චිකුන්ගුන්යා රෝගයේදී වැඩි වශයෙන් ඇඟපත වේදනාව ඇතිවන බැවින් වේදනාව අවම කිරීමට වේදනා නාශක ඖෂධ ලබා ගැනීමෙන් වළකින ලෙසත් එසේ ලබා ගැනීමෙන් ඇතිවන ප්‍රථිපල ඉතා දරුණු විය හැකි බවත් ඒ අනුව උණ සහ වේදනාව අවම කර ගැනීම සඳහා හැකි සෑම විටම පැරසිටමෝල් භාවිතයට ගන්නා ලෙසත් විශේෂඥ වෛද්‍ය අතුල ලියනපතිරණ මහතා ජනතාවගෙන් ඉල්ලීමක් ද සිදුකළා.

එමෙන්ම ජලය, පළතුරු යුෂ, කැඳ, ජීවනි, වැනි ලවණ සහිත ද්‍රාවණ වන පානය කිරීමෙන් ඇතිවන විජලන තත්ත්වයන් වැළැක්වීමද ඉතා වැදගත් වනු ඇති බවත් විශේෂඥ වෛද්‍යවරයා පැවසුවා.

තවද රෝග ලක්ෂණ මතුවුව හොත් එය ඩෙංගු රෝගය හෝ චිකුන්ගුන්යා රෝගයද යන්න නිසි ලෙස හඳුනා ගැනීමට හැකියාව නොමැති බවත් පැවසූ විශේෂඥ වෛද්‍යවරයා පැවසුවේ අදාළ රෝග නිෂ්චය කර ගැනීම සඳහා වෛද්‍යවරයෙකු හමුවීම ඉතා වැදගත් වන බවයි.

එමෙන්ම චිකුන්ගුන්යා රෝගය වැළඳීමෙන් පසු ඇතැම් රෝගීන්ට දීර්ඝ කාලීනව පවතින හන්දි වේදනාව වැනි රෝග ලක්ෂණ ඇති විය හැකි බවත් ඒ සඳහාද නිසි ප්‍රතිකාර කළ යුතු බැවින් වෛද්‍ය උපදෙස් ලබා ගනිමින් කටයුතු කරන ලෙසද විශේෂඥ වෛද්‍යවරයා වැඩිදුරටත් අදහස් දක්වමින් සඳහන් කළා.