2025 අගෝස්‍තු 31, පෙ.ව. 12:11
මෙරට ජ්‍යෙෂ්ඨ පුරවැසියන්ගෙන් සියයට අසූදෙකක් (82%) ඩිජිටල් උපකරණ සහ අන්තර්ජාලය භාවිත කරන බව සමීක්ෂණයකින් හෙළි වී තිබේ.
කොළඹ විශ්වවිද්‍යාලය, පේරාදෙණිය විශ්වවිද්‍යාලය සහ එක්සත් ජාතීන්ගේ ජනගහණ අරමුදලේ නියෝජිතයන් එක්ව මෙම සමීක්ෂණය පවත්වා ඇත.
දිවයිනේ දිස්ත්‍රික්ක විසිපහේම වැඩිම වැඩිහිටි ජනතාව ජීවත්වන ප්‍රාදේශීය ලේකම් කොට්ඨාස ආවරණය වන පරිදි අවුරුදු හැටත් අසූවත් (60-80) අතර වයස් කාණ්ඩයේ වැඩිහිටියන් එක්දහස් අටසිය අනූදෙනෙකු (1890) ආශ්‍රය කරගෙන මෙම සමීක්ෂණය සිදුකර තිබේ.
මෙරට වැඩිහිටි පුද්ගලයන්ගේ ජීවන තත්ත්වය ඉහළ නැංවීම සඳහා ඩිජිටල් මාධ්‍ය භාවිතය සිදුවන්නේ කෙසේද යන මාතෘකාව පාදක කරගනිමින් මෙම පර්යේෂණය සිදුකර ඇති අතර ඩිජිටල් උපකරණ භාවිත කිරීමේ සාක්ෂරතාව, මෙම සේවාවන් භාවිත කිරීමට වැඩිහිටියන් දක්වනු ලබන කැමැත්ත, ඩිජිටල්කරණය වැඩිහිටියන්ගේ ජීවිතවලට බලපානු ලබන්නේ කෙසේද යන්න පිළිබඳව මෙම සමීක්ෂණයේදී සොයා බලා ඇත.
එහිදී අනාවරණය වී ඇත්තේ නාගරික වැඩිහිටි ජනතාවගෙන් සියයට පනස් හතයි දශම හතක් (57 .7%) ක් ග්‍රාමිය වැඩිහිටි ජනතාවගෙන් සියයට හතලිස්දෙකයි දශම තුනක් (42.3%) වතු ජනතාවගෙන් බිංදුවයි දශම දෙකක් (0.2%) ඩිජිටල් උපකරණ භාවිතය සිදු කරන බවයි.
එහෙත් කාන්තාවන්ගෙන් සියයට පනස්තුනක පමණ පිරිසක් ඩිජිටල් උපකරණ භාවිතයෙන් ඉවත්ව සිටින බවට තොරතුරු ලැබී ඇති අතර ආර්ථික ප්‍රශ්න තිබීම, ඩිජිටල් උපකරණ හැසිර වීමට ඇති බිය සහ අධ්‍යපානයේ සහ භාෂාවේ ඇති ගැටලු හේතුවෙන් මෙම තත්ත්වය උදාවී ඇති බවට සමීක්ෂකයන් හඳුනා ගෙන ඇත.
එසේම අවුරුදු 70, 75, 80 යන වයස්කාණ්ඩයේ පුද්ගලයන් ජගංම දුරකථන භාවිතයෙන් දුරස්ථ වී සිටින බවත් ඉන් වැඩි පිරිසක් කාන්තාවන් බවත් මෙම සමීක්ෂණයේදී හඳුනාගෙන තිබේ.
තවද අවුරුදු 60 ත් 64 ත් වයස් කාණ්ඩයේ සිටින තරුණ වැඩිහිටි ප්‍රජාව ඉතා සක්‍රීය ලෙස ඩිජිටල් උපකරණ සහ ජගංම දුරකථන තනිව ක්‍රියාත්මක කරගනිමින් සේවාවන් ලබා ගන්නා බව සමීක්ෂකයෝ පවසති.
මෙම වැඩිහිටියන් අතරින් සියයට 46.7 ක් ෆේස් බුක් සහ වට්ස්ඇප් භාවිතා කරන බවටත් එම මෙවලම් භාවිත කරනු ලබන්නේ සිය දරුවන් සහ ඥාතීන් අතර ජාත්‍යන්තර සබඳතා පවත්වා ගැනීමට බවටත් මෙම සමීක්ෂණයේදී හඳුනාගෙන ඇත.
වැඩිහිටි ප්‍රජාව ඩිජිටල් උපකරණ සහ ජංගම දුරකථන, පරිගණක භාවිතයෙන් බැහැරව සිටිමට හේතු ලෙස ඔවුන් සමාජයෙන් බැහැර කර සිටීම සහ මෙම සේවාවන් ලබා ගැනීමට නිසි පුහුණුවක් ලබා නොදීම, සෞඛ්‍ය ගැටලු, පෙනීමේ දුර්වලතා වැනි සෞඛ්‍ය ගැටලු, සයිබර් අපරාධවලට ඇති බිය, භාෂා ගැටලු හඳුනාගත් බව ද ඔවුහු පෙන්වා දෙති.
2025 සැප්තැම්බර් 01, පෙ.ව. 12:12
2025 සැප්තැම්බර් 01, පෙ.ව. 12:10
2025 සැප්තැම්බර් 01, පෙ.ව. 12:09
2025 සැප්තැම්බර් 01, පෙ.ව. 12:07
2025 සැප්තැම්බර් 01, පෙ.ව. 12:05