2025 අගෝස්‍තු 07, ප.ව. 12:39
ඇමෙරිකා එක්සත් ජනපදයේ ජනාධිපති ඩොනල්ඩ් ට්‍රම්ප් මහතා, විදේශයන්ගෙන් ආනයනය කරන පරිගණක චිප් සහ අර්ධ සන්නායක (semiconductors) සඳහා 100%ක තීරු බද්දක් පැනවීමට සැලසුම් කරන බව ප්‍රකාශ කර තිබේ.
මෙම තීරණය හේතුවෙන් ලොව පුරා ඉලෙක්ට්‍රොනික උපකරණ, මෝටර් රථ, ගෘහ උපකරණ සහ අනෙකුත් ඩිජිටල් නිෂ්පාදනවල මිල විශාල ලෙස ඉහළ යෑමට ඉඩ ඇති බවට විචාරකයෝ අනතුරු අඟවති.
ට්‍රම්ප් මෙම ප්‍රකාශය සිදු කළේ ඇපල් සමාගමේ ප්‍රධාන විධායක නිලධාරී ටිම් කුක් මහතා සමඟ ධවල මන්දිරයේ පැවති හමුවකදීය. “අපි පරිගණක චිප් සහ අර්ධ සන්නායක සඳහා දළ වශයෙන් 100%ක තීරු බද්දක් පනවන්නෙමු,” යනුවෙන් සඳහන් කළ ජනාධිපතිවරයා, “නමුත් ඔබ ඔබේ නිෂ්පාදන ඇමෙරිකා එක්සත් ජනපදය තුළ නිෂ්පාදනය කරන්නේ නම්, කිසිදු බද්දක් අය කරන්නේ නැත” යි පැවසීය.
මෙම නව ප්‍රතිපත්තිය යටතේ ඇමෙරිකානු සමාගම්වලට තම නිෂ්පාදන දේශීයව සිදු කිරීම සඳහා බලකිරීමට ට්‍රම්ප් මහතා උත්සාහ කරන බව පෙනී යයි. කොවිඩ්-19 වසංගත සමයේදී ඇති වූ පරිගණක චිප් හිඟය හේතුවෙන් මෝටර් රථ මිල ඉහළ ගිය අතර සමස්ත උද්ධමනයට ද එය බලපෑවේය.
මෙම ප්‍රකාශය සිදුකෙරුණේ ඇපල් සමාගම විසින් ඉදිරි වසර හතර තුළ ඇමෙරිකාවේ නිෂ්පාදන කටයුතු සඳහා තවත් ඩොලර් බිලියන 100ක ආයෝජනයක් කිරීමට එකඟ වූ අවස්ථාවේදීය. ඒ සමඟ ඇපල් සමාගමේ සමස්ත ඇමෙරිකානු ආයෝජනය ඩොලර් බිලියන 600ක් දක්වා ඉහළ යයි. සාමාන්‍යයෙන් ඇපල් සමාගම සිය නිෂ්පාදනවලින් වැඩි ප්‍රමාණයක් චීනය වැනි විදේශ රටවල සිදු කරන අතර, අයිෆෝන් දුරකථනවලින් 90%ක් පමණ චීනයේ නිෂ්පාදනය වේ.
කෙසේ වෙතත්, මෙම නව බදු ප්‍රතිපත්තියෙන් සමහර සමාගම්වලට සහ රටවලට සහන ලැබෙනු ඇත. ලොව විශාලතම චිප් නිෂ්පාදන සමාගම වන තායිවාන් අර්ධ සන්නායක නිෂ්පාදන සමාගම (TSMC) සහ දකුණු කොරියාවේ Samsung Electronics හා SK Hynix සමාගම් මෙම බද්දෙන් නිදහස් වන බව වාර්තා වේ. එසේම ඇමෙරිකානු චිප් නිෂ්පාදකයෙකු වන Nvidia සමාගම ද ඇමෙරිකාව තුළ නිෂ්පාදන පහසුකම් ඇති බැවින් මෙම තීරු බද්දෙන් නිදහස් වනු ඇත.
මේ සම්බන්ධයෙන් අදහස් දැක්වූ පිලිපීන අර්ධ සන්නායක කර්මාන්තයේ සභාපති ඩෑන් ලාචිකා මහතා පැවසුවේ, පිලිපීනයේ අපනයනයන්ගෙන් 70%ක් පමණ අර්ධ සන්නායක වන හෙයින්, මෙම නව නීති රටට “විනාශකාරී” විය හැකි බවයි.
ලෝක අර්ධ සන්නායක වෙළෙඳ සංඛ්‍යාලේඛන ආයතනයට අනුව, පරිගණක චිප් සඳහා වන ගෝලීය ඉල්ලුම ඉහළ යමින් පවතී. පසුගිය වසරේ ජුනි මාසය වන විට අලෙවිය 19.6%කින් ඉහළ ගොස් ඇත.
ට්‍රම්ප් මහතාගේ මෙම ක්‍රියාමාර්ගය, ජෝ බයිඩන් පාලනය විසින් හඳුන්වා දුන් “චිප්ස් සහ විද්‍යා පනතට” (CHIPS and Science Act) වඩා වෙනස්ය. බයිඩන් පනත යටතේ නව චිප් කම්හල්, පර්යේෂණ සහ පුහුණු ශ්‍රමිකයන් සඳහා ඩොලර් බිලියන 50කට වැඩි මුදලක් වෙන් කර තිබුණි. එය මූල්‍ය දිරිගැන්වීම් සහ බදු සහන මඟින් පුද්ගලික ආයෝජන ආකර්ෂණය කර ගැනීමට උත්සාහ කළ අතර, ට්‍රම්ප් මහතාගේ ප්‍රතිපත්තිය වන්නේ අධික බදු පනවා සමාගම්වලට දේශීය නිෂ්පාදන සඳහා බලකිරීමයි.
විදේශ පරිගණක චිප් සඳහා වන 100%ක නව තීරු බද්ද ලබන සතියේදී නිල වශයෙන් ප්‍රකාශයට පත් කිරීමට නියමිත අතර, එය සියලු රටවල් සහ සමාගම් සඳහා බලපානු ඇතැයි අපේක්ෂා කෙරේ.
2025 අගෝස්‍තු 07, ප.ව. 5:08
2025 අගෝස්‍තු 07, ප.ව. 2:24
2025 අගෝස්‍තු 07, ප.ව. 1:52
2025 අගෝස්‍තු 07, ප.ව. 1:48
2025 අගෝස්‍තු 07, ප.ව. 1:12