ඇමති ජී.එල් රාජ්‍යතාන්ත්‍රිකයන් කැඳවයි

2022 ජූනි 02, ප.ව. 8:47

විදේශ කටයුතු අමාත්‍ය මහාචාර්ය ජී.එල්. පීරිස් මහතා අද විදේශ කටයුතු අමාත්‍යාංශයේදී කොළඹ සිටින රාජ්‍යතාන්ත්‍රික ප්‍රජාව අමතා තිබෙනවා.

විදේශ කටයුතු අමාත්‍වරයා සිය දේශනය අතරතුර ශ්‍රී ලංකාවේ පවතින වත්මන් තත්ත්වය සහ ඉන්ධන හිඟය, ගෑස් හිඟය, අත්‍යවශ්‍ය ඖෂධ නිෂ්පාදන හිඟය සහ විදුලිය කප්පාදුව වැනි උග්‍ර ගැටලු ඇතුළු රජය මුහුණදෙන අභියෝග පිළිබඳව විස්තර කළ බවයි එම අමාත්‍යංශය කියාසිටියේ.

මේ සම්බන්ධයෙන් රජය ගෙනඇති ක්‍රියාමාර්ග පිළිබඳවද විදේශ කටයුතු අමාත්‍යවරයා සවිස්තරාත්මකව කරුණු දැක්වූ අතර මෙම අසීරු මොහොතේදී තම උපරිම සහය ලබාදෙන ලෙස තානාපතිවරුන්ගෙන් ඉල්ලා තිබෙනවා.

තවද, පාර්ලිමේන්තුවට ඉදිරිපත්කළ 21 වැනි ආණ්ඩුක්‍රම ව්‍යවස්ථා සංශෝධනය පිළිබඳවද සඳහන් කළ අමාත්‍යවරයා, මෙම සුවිශේෂී නීති සම්පාදනය සතු ප්‍රධාන ලක්ෂණ කිහිපයක් ගෙනහැර දැක්වූවා.

මෙම අවස්ථාවට සහභාගී වූ රාජ්‍යතාන්ත්‍රික ප්‍රජාව වෙත සිය ප්‍රසාදය පළකළ විදේශ කටයුතු අමාත්‍ය ජී. එල්. පීරිස් මහතා, විශේෂයෙන් ශ්‍රී ලංකාවේ මෑත ඉතිහාසය තුළ හටගත් මෙම අභියෝගාත්මක අවධිය තුළ තම සහයෝගය සහ හිතෛශී බව ශ්‍රී ලංකාව වෙත පළ කරන ලෙසටයි තානාපතිවරුන්ගෙන් ඉල්ලා සිටියේ.

මහ බැංකු අධිපති ආචාර්ය නන්දලාල් වීරසිංහ මහතා සහ මුදල් අමාත්‍යාංශයේ ලේකම් මහින්ද සිරිවර්ධන මහතා කෙටි ඉදිරිපත් කිරීම් සිදු කළ අතර අසන ලද ප්‍රශ්නවලට පිළිතුරු ද ලබා දී තිබෙනවා.