මගේ ඔළුවේ හැපී ආණ්ඩුව නැමති කළුගල කුඩු වෙලා.. ගම්මන්පිල උදම් අනයි.!

2025 මැයි 18, පෙ.ව. 12:12

පිවිතුරු හෙළ උරුමයේ නායක හා හිටපු අමාත්‍ය නීතිඥ උදය ගම්මන්පිල මහතා පවසන්නේ පළාත් පාලන මැතිවරණයේ ප්‍රතිඵල අනුව ජාතික ජනබල වේගය නම් වර්තමාන රජයේ ඡන්ද පදනම මාස අටක් ගතවීමටත් පෙර සම්පූර්ණයෙන්ම බිඳ වැටී ඇති බවයි.

ඔහු මෙම අදහස් පළ කළේ කෝට්ටේ පිහිටි එම පක්ෂයේ මූලස්ථානයේ පැවති මාධ්‍ය හමුවකදීය.

ඔහු පැවසූවේ ආණ්ඩුව සිය පළමු පත්කිරීම වන ජනාධිපති ලේකම්වරයා පත් කිරීමේ සිටම වැරදි මාර්ගයක ගමන් කිරීම ආරම්භ කළ බවයි.

“කළුගලේ ඔළුව ගහ ගන්න එපා, ඔළුව චප්ප වේ” යැයි බොහෝ දෙනා තමාට අවවාද කළද, තමා මාස අටක කාලයක් තුළ නොනවත්වා රජයේ වැරදි ක්‍රියාමාර්ග විවේචනය කළ බවත්, පළාත් පාලන මැතිවරණ ප්‍රතිඵල මගින් තමාගේ ඔළුව වල්ප වීම වෙනුවට කළුගල පුපුරා යාම ආරම්භ වී ඇති බවත් ඔහු පැවසීය.

“ආණ්ඩුව පත්වී සතියක් යන්නටත් පෙර, රජයේ තුන්වන පත්කිරීම වූ මහජන ආරක්ෂක ලේකම්වරයාගේ පත්කිරීම සම්බන්ධයෙන් අප විවේචන ඉදිරිපත් කළා,” යැයි ද ගම්මන්පිල මහතා පැවසීය. රට සහ ආණ්ඩුව එකවර දූෂණයට ලක්වීමට ඉඩ දිය නොහැකි බැවින්, රජය වැරදි ක්‍රියාමාර්ගයක් ගන්නා සෑම අවස්ථාවකදීම එය පෙන්වා දීම සඳහා තමා කටයුතු කළ බව ඔහු අවධාරණය කළේය.

“ආණ්ඩුව නිහතමානී නම්, ඔවුන්ට සිය වැරදි නිවැරදි කරගෙන ඉදිරියට යාමට අවස්ථාව තිබෙනවා. එහෙත් ආණ්ඩුව උද්ධච්ච නම්, වැරදි රැකගෙන සිටීම නිසා ආණ්ඩුව විනාශයට පත්විය හැකියි. විපක්ෂයේ වගකීම වන්නේ රජයේ වැරදි පෙන්වා දීමයි,” යැයි ඔහු පැවසීය.

පළාත් පාලන මැතිවරණ ප්‍රතිඵල විපක්ෂයට එකමුතු වන ලෙස බල කරන බවද ගම්මන්පිල මහතා පෙන්වා දුන්නේය. වර්තමාන රජය නියෝජනය කරන ජාතික ජනබල වේගයේ (මාලිමාව) ඡන්ද ප්‍රතිශතය බරපතල ලෙස පහත වැටී ඇති බව ඔහු පැවසීය.

“ජනාධිපතිවරණයේදී සියයට 42ක ඡන්ද ප්‍රතිශතයක් ලබාගත් මාලිමාව, පාර්ලිමේන්තු මැතිවරණයේදී එය සියයට 63 දක්වා ඉහළ නැංවූවද, පළාත් පාලන මැතිවරණයේදී එය සියයට 43 දක්වා පහත වැටී තිබෙනවා.

මෙය ලෝක ඉතිහාසයේ වාර්තාගත වන විශාලතම දේශපාලන පසුබෑමක්. මීට පෙර කිසිදු රටක, කිසිදු කාලයක, මාස හයක් වැනි කෙටි කාලයක් තුළ කිසිදු දේශපාලන පක්ෂයක ඡන්ද පදනම තුනෙන් එකකින් හෙවත් සියයට 34කින් කඩා වැටී නැහැ,” යැයි හිටපු අමාත්‍යවරයා තවදුරටත් පැවසීය.

මෙලෙස ජාතික ජනබල වේගයේ ඡන්ද පදනම කඩිනමින් පිරිහීමට ප්‍රධාන හේතුව වශයෙන් ගම්මන්පිල මහතා පෙන්වා දුන්නේ ආණ්ඩුවේ මුල් දිනවල සිටම ගත් වැරදි තීරණ සහ හිතුවක්කාර ක්‍රියාමාර්ග බවයි. පළාත් පාලන මැතිවරණයේ ප්‍රතිඵල මගින් මේ තත්ත්වය තවදුරටත් තහවුරු වී ඇති බවද ඔහු පැවසීය.