මගේ වත්කම එක වර විශාල වශයෙන් ඉහල ගියා..- ලාල් කාන්ත

2025 සැප්‍තැම්‍බර් 20, පෙ.ව. 12:07

---

---

කෘෂිකර්ම අමාත්‍ය කේ.ඩී. ලාල් කාන්ත මහතා තම වත්කම් බැරකම් සම්බන්ධයෙන් අදහස් දක්වමින්, වත්කම් ලැබෙන්නේ වැටුපෙන් පමණක් නොවන බව පෙන්වා දෙයි.

ඔහු වත්කම් බැරකම් ප්‍රකාශ පිරවීමට පටන්ගෙන වසර 20ක් පමණ වන බවත්, මුල් කාලයේ ඒවායේ සටහන් කිරීමට තිබුණේ ඉතා අල්ප වශයෙනුත්, ප්‍රධාන වශයෙන් තම බිරිඳගේ රන් ආභරණ ස්වල්පයකුත් පමණක් බවත් සඳහන් කරයි. කෙසේ වෙතත්, එක් වසරක් තුළදී ඔහුගේ වත්කම් ප්‍රමාණය විශාල වශයෙන් ඉහළ ගිය බව ඔහු පවසයි.

මෙම වත්කම් වැඩිවීමට හේතුව වී ඇත්තේ, ඔහුගේ මව සහ පියා දෙදෙනාම මියයාමෙන් පසු පවුලේ එකම පිරිමි දරුවා ලෙස සියලු ඉඩම් සහ දේපළ තමන්ට උරුම වීමයි. ඔහු පෙන්වා දෙන්නේ, මෙම උරුම වූ දේපළ ඊළඟ වත්කම් බැරකම් ප්‍රකාශයට ඇතුළත් කළ බවයි.

මහජන නියෝජිතයන් විසින් තමන්ගේම වත්කම් බැරකම් ප්‍රකාශ පුරවා ලබා දී ඇති බවත්, ඒවා කිසිවකු විසින් සොයා බලා ඇඟිලි ගසා සකස් කරන ලද ඒවා නොවන බවත් අමාත්‍යවරයා අවධාරණය කරයි. දැනට, සියලු මැති ඇමතිවරුන්ගේ වත්කම් බැරකම් ප්‍රකාශ අල්ලස් හෝ දූෂණ කොමිෂන් සභාව විසින් ප්‍රසිද්ධියට පත් කර ඇති අතර, ඒවා ඕනෑම අයෙකුට බලා ගැනීමට හැකි බව ඔහු පවසයි.

මෙම තත්ත්වය හොඳ සංස්කෘතියක් බවත්, මෙවැනි දෙයක් මීට පෙර කිසිදා නොතිබූ බවත් අමාත්‍යවරයා පෙන්වා දෙයි. මේවා ගැන ජනතාව කතා කිරීමත්, ඒ සම්බන්ධයෙන් ප්‍රශ්න ඇසීමත් යහපත් බව ඔහු දක්වයි.

යම් අයෙකුට ගැටලුවක් ඇත්නම්, නීතිමය ක්‍රියාමාර්ග ගැනීමට ඉතා පැහැදිලිව හැකියාව ඇති බවත්, “ඔබ මේවායේ වත්කම් උපයාගත්තේ කෙසේද” යන්න විමසීමට දැන් පනතක් ඇති බවත් ඔහු සඳහන් කරයි.

“මහජන ධනය, මහජන මුදල් හෝ භාණ්ඩාගාරයේ මුදල් කවුරුන් හෝ පරිහරණය කරන්නේ නම් එය වැරදියි. ආදායම් උපදවා ගත්තේ කෙසේද යන්න ඔප්පු කර ගැනීමට නොහැකි නම් එයද වැරදියි”

දැනට ජනතාවට විවෘතව ඇත්තේ, “ඔබ මුදල් උපයා ගත්තේ කෙසේද? මේ ඉඩම් ලැබුණේ කොහොමද? ගෙවල් දොරවල් ලැබුණේ කොහොමද? වාහන ලැබුණේ කොහොමද?” වැනි කරුණු පිළිබඳව ප්‍රශ්න කිරීමට බවත්, මෙය ගොඩනගමින් පවතින හොඳ දේශපාලන සංස්කෘතියක් බවත් ඔහු පවසයි

---