මාලිමාණ්ඩුව ඉතිහාසයේ දැවැන්තම අධ්‍යාපන පෙරලිය කරනවා…!

2025 මාර්තු 09, පෙ.ව. 12:08

ශ්‍රී ලංකා ඉතිහාසයේ දැවැන්තම අධ්‍යාපන පෙරළිය සිදුකිරීමට ජාතික ජන බලවේගයේ රජය සූදානම් බව බවත් වෘත්තීය අධ්‍යාපන නියෝජ්‍ය අමාත්‍ය නලින් හේවගේ මහතා පවසයි.

“මේ රටේ සියලුම දේවල් හදන්න පුළුවන් ප්‍රධාන මධ්‍යස්ථානය තමයි අධ්‍යාපනය. ඒ අධ්‍යාපනයේ දැවැන්ත ගුණාත්මක පරිහානියක් තියෙනවා. මේ අධ්‍යාපනයෙන් නිර්මාණය අවුට්පුට් එකේ දැවැන්ත ප්‍රශ්නයක් තියෙනවා. ඉතින් ඒ නිසා මේ අධ්‍යාපනය දැවැන්ත පරිවර්තනයකට ලක්කරන්න තමයි මාලිමාවේ ආණ්ඩුව අපේක්ෂා කරන්නෙ.

අපි අපේක්ෂා කරනවා 2026 ඉඳලා විශේෂයෙන්ම මේ දරුවන්ට තියෙන අධ්‍යාපන බරෙන් දරුවන් මුදවාගෙන, ඒ විතරක් නෙවෙයි සමාජයට හිතෛෂී පුද්ගලයෙක් බවට, දැවැන්ත දියුණු මානවයෙක් බවට පත්කරන්න තමයි මේ අධ්‍යාපනය ක්‍රමය සකස් කරන්නෙ. මම හිතන්නෙ එදා මෙදාතුර ලංකාවේ වෙන දැවැන්තම අධ්‍යාපන පෙරළිය මේක කියලා අපි විශ්වාස කරනවා. එය ඇතුළෙ දරුවන්ට දැවැන්ත රිලැක්සේෂන් එකක් සිද්ධ වෙනවා.

විශේෂයෙන්ම අපි අපේක්ෂා කරනවා 9 වසරෙන් විභාගයක් තියලා, දරුවෝ යන මේ මාවතෙන්ම යනවා නම් ඒ මාවතෙන්ම යන්නත්, එහෙම නැත්නම් අපට වෘත්තීය අධ්‍යාපනය ඇතුළෙ ඒ දරුවන්ගෙ අනාගතයට ඉඩ ප්‍රස්තාව හදාගන්නත්. එතකොට දැන් ගත්තොත් ඇත්තටම වෘත්තීය අධ්‍යාපනයට එන්නෙ විශේෂයෙන්ම පාසල්වලින් හැළෙන දරුවෝ.

ඒ නිසා අර හැළෙන දරුවන්ගෙ මධ්‍යස්ථානයක් බවට පත්වෙච්චි එක වෙනුවට දරුවන්ගෙ අභිලාෂයන්ට අනුව ඉඩකඩ දෙන වෘත්තීය අධ්‍යාපනයක් තමයි අපි බලාපොරොත්තු වෙන්නෙ. ඒකට ප්‍රධානම කරුණු දෙකක් ඕනෙ. එකක් තමයි වෘත්තීය අධ්‍යාපනයේ නියැළෙන්නන්ට ගරුත්වයක් ඕනෙ. දෙක, ඒ වෘත්තියෙන් තමන්ගෙ ජීවිතය ගොඩනඟාගන්න පුළුවන් කියන විශ්වාසය ඕනෙ. ඉතින් ඒක මං හිතන්නෙ රටේ ආණ්ඩුව බාරගන්නවා.”