ඔත්තුකරුවන්ට තෑගි දෙන්න පොලීසියෙන් අලුත් වැඩක්

2023 ජූනි 26, ප.ව. 12:36

---

---

දිගින් දිගටම වාර්තා වන අපරාධ මැඩපැවැත්වීම සඳහා දිවයින තුළ සංසරණය වන නීතිවිරෝධී ගිනිඅවි සහ අත්බෝම්බ සෙවීමේ මෙහෙයුම් තවදුරටත් වැඩිකළ යුතු බව පොලිස්පති සී. ඩී. වික්‍රමරත්න මහතා පවසනවා.

පොලිස්පතිවරයා සියලුම පොලිස් ස්ථානාධිපතිවරුන්ගේ සිට ජ්‍යෙෂ්ඨ නියෝජ්‍ය පොලිස්පතිවරුන් වෙත ලිපියක් යොමුකරමින් පවසන්නේ, සියලුම පොලිස් නිලධරයන් සහ පුද්ගලික ඔත්තුකරුවන් දිරි ගැන්වීමේ අරමුණින් මාසයක කාලයක් සඳහා ත්‍යාග මුදලේ වටිනාකම වැඩිකිරීමට තීරණය කළ බවයි.

පසුගිය කාලසීමාව තුළ වාර්තා වූ ඇතැම් අපරාධ මගින්, නීතිවිරෝධී ගිනිඅවි සහ අත්බෝම්බ දිවයින තුළ සංසරණය වන බවට නීරීක්ෂණය වන බවත්, මෙම තත්ත්වය නීතියේ ආධිපත්‍ය ස්ථාපිත කිරීම සඳහා මෙන්ම මහජනයාට අපරාධ බියකින් තොරව ජීවත්විය හැකි සාමකාමී පරිසරයක් බිහි කිරීම සඳහා බාධාවක් වන බවත් පොලිස්පත් සී. ඩී. වික්‍රමරත්න මහතා පවසනවා.

සියලුම ජ්‍යෙෂ්ඨ නියෝජ්‍ය පොලිස්පතිවරුන්, නියෝජ්‍ය පොලිස්පතිවරුන්, අණදෙන නිලධාරීන්, අධ්‍යක්ෂකරුන්, කොට්ඨාස භාර නිලධාරීන්, දිස්ත්‍රික් භාර ජ්‍යෙෂ්ඨ රාජ්‍ය නිවේදිත නිලධරයන්, මූලස්ථාන පොලිස් පරීක්ෂකවරුන් සහ පොලිස් ස්ථානාධිපතිවරුන් වෙත අද ලිපියක් යොමු කරමින් පොලිස්පතිවරයා මේ පිළිබඳව කරුණු පැහැදිළි කර තිබුණා.

එම ලිපිය මගින් පොලිස්පතිවරයා සඳහන් කර ඇත්තේ මෙම නීතිවිරෝධී ගිනිඅවි හා අත්බෝම්බ සෙවීමේ මෙහෙයුම් තවදුරටත් වැඩිකළ යුතු බවයි.

ඒ සඳහා සියලුම පොලිස් නිලධරයන් සහ පුද්ගලික ඔත්තුකරුවන් දිරි ගැන්වීම සඳහා පොලිස් ත්‍යාග අරමුදලින් ත්‍යාග ගෙවීමටත්, මාසයක කාලයක් සඳහා මුදලේ වටිනාකම වැඩිකිරීමටත් තීරණය කර තිබෙනවා.

අද (25) සිට ලබන ජූලි 31 වනදා දක්වා කාලය තුළ සිදුකරන වැටලීම්වලදී අත්අඩංගුවට ගන්නා නීතිවිරෝධී ගිනිඅවි සහ අත්බෝම් සඳහා මෙම ත්‍යාග මුදල් ගෙවීම සිදුකරන බව පොලිස්පතිවරයා නිකුත් කළ ලිපියෙහි සඳහන් වෙනවා.

---