කට්ටිය මට කියන්නේ දුඹුරු සීනි පියා කියලා – ඒ අලුත් නමට මම කැමති.. සුදු සීනිවලට වඩා මම කැමති දුඹුරු සීනිවලට

2025 නොවැම්‍බර් 13, ප.ව. 6:27

---

---

තමන්ට බොහෝ දෙනෙක් ‘දුඹුරු සීනි පියා’ ලෙසින් ආමන්ත්‍රණය කරන බවත් ඒ පිළිබඳව සතුටට පත්වන බවත් කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතා පවසනවා.

අද (13) පාර්ලිමේන්තුවේදී අදහස් දක්වමින් අමාත්‍යවරයා සඳහන් කළේ,  ‘සුදු සීනි පියා’ ලෙස හැඳින්වීමට වඩා ‘දුඹුරු සීනි පියා’ යන නාමයට තමන් වඩාත් ප්‍රිය කරන බවයි.

දුඹුරු සීනි ඇතුළු උක් පැණි සහ උක් හකුරු වැනි උක් ආශ්‍රිත නිෂ්පාදන ප්‍රචලිත කිරීමේ අරමුණින් දුඹුරු සීනි අඩු මිලට විකිණීම සඳහා ඉකුත් පෙරේදා දිනයේදී  අමාත්‍ය සුනිල් හඳුන්නෙත්ති මහතාගේ ප්‍රධානත්වයෙන් නුගේගොඩ ප්‍රදේශයේදී අලෙවිසැලක් විවෘත කර තිබුණා.

මෙම අවස්ථාවේදී උක් නිෂ්පාදන ප්‍රවර්ධනය කිරීමට සහය වන ලෙස තමන් මාධ්‍යවේදීන්ගෙන් හා සමාජ මාධ්‍ය ක්‍රියාකාරීන්ගෙන් ඉල්ලීමක් කළ බව අමාත්‍යවරයා  සඳහන් කළා.

“ඇත්ත වශයෙන්ම, මම එම ප්‍රචාරය වෙනුවෙන් බොහෝ සේ ස්තූතිවන්ත වෙනවා. සමාජ මාධ්‍ය ක්‍රියාකාරීන් ඇතුළු මහත්වරුන් අපට විශාල සහයෝගයක් ලබා දුන්නා,”

මෙම ප්‍රචාරය හේතුවෙන් මෙම නිෂ්පාදනය සඳහා විශාල ප්‍රසිද්ධියක් ලැබුණු බවත්, ඒ නිසාම තමන්ට ‘දුඹුරු සීනි පියා’ යන අන්වර්ථ නාමය පවා ලැබී ඇති බවත් අමාත්‍යවරයා වැඩිදුරටත් කියා සිටියා.

කර්මාන්ත සහ ව්‍යවසායකත්ව සංවර්ධන අමාත්‍යාංශය යටතේ ක්‍රියාත්මක වන ලංකා සීනි සමාගම තම පැල්වත්ත සහ සෙවණගල කර්මාන්ත ශාලාවල නිෂ්පාදනය කරන තත්වයෙන් ඉහල දුඹුරු සීනි අඩු මිලට ලාංකික පාරිභෝගිකයන් වෙත ලබා දීමේ අරමුණ ඇතිව ඉතිහාසයේ පළමුවරට තම අලෙවි ජාලය මෙලෙස ආරම්භ කළ බවට අලෙවිසැල විවෘත කළ දින අමාත්‍යවරයා පවසා තිබුණා.

කෙසේවෙතත් ලංකා සීනි සමාගමේ නිල ෆේස්බුක් පිටුවේ සිනී මිලදී ගැනීම සඳහා අදාළ වෙබ් අඩවියට පිවිසෙන්නැයි අවස්ථා කිහිපයකදීම දැන්වීම් පලකර තිබුණා.

නමුත් ලංකා සීනි සමාගමට අයත් වෙබ් අඩවිය මේ වන විට අක්‍රීය තත්ත්වයේ පවතිනවා.

www.lankasugar.lk යන වෙබ් ලිපිනය වෙත පිවිසීමේදී සදහන් වන්නේ අදාළ වෙබ් අඩවිය තවමත් සකසමින් ඇති බවයි.

---