බදු ක‍්‍රමයේ සංශෝධනයක්.. වාහන ආනයන බදු විශාල ලෙස ඉහළට..

2026 පෙබරවාරි 18, පෙ.ව. 12:13

---

---

සමාජ ආරක්ෂණ දායකත්ව බද්ද (SSCL) අයකරන ක්‍රමවේදයේ සංශෝධනයක් මඟින් වාහන ආනයන බදු විශාල ලෙස ඉහළ යා හැකි බව ශ්‍රී ලංකා වාහන ආනයනකරුවන්ගේ සංගමය පවසයි. 

රජය විසින් නව බදු හඳුන්වා නොදෙන බව ප්‍රකාශ කළද, මෙම තාක්ෂණික වෙනස හරහා පාරිභෝගිකයා මත පැටවෙන බදු බර රහසිගතව ඉහළ යන බව එම සංගමය පෙන්වා දෙයි.

නියෝජ්‍ය අමාත්‍ය ආචාර්ය අනිල් ජයන්ත මහතා විසින් මෑතකදී කරන ලද ප්‍රකාශයකට ප්‍රතිචාර දක්වමින් වාහන ආනයනකරුවන්ගේ සංගමය මෙම කරුණු අනාවරණය කළේය.

වත්මන් ක්‍රමය යටතේ 2.5%ක් වන සමාජ ආරක්ෂණ දායකත්ව බද්ද අදාළ වන්නේ පිරිවැටුමෙන් 50%ක් සඳහා පමණි. එනම් ප්‍රායෝගිකව අයවන්නේ 1.25%ක බද්දකි. 

එහෙත් නව යෝජනාව අනුව බද්ද අයකරන අවස්ථාව විකුණුම් මට්ටමේ සිට රේගු මට්ටම දක්වා වෙනස් වේ. පිරිවැටුමෙන් 100%ක් සඳහාම 2.5%ක පූර්ණ බද්ද අය කෙරේ. වඩාත් තීරණාත්මක කරුණ වන්නේ, මෙම 2.5% බද්ද එකතු කළ අගය මත පදනම්ව 18%ක එකතු කළ අගය මත බද්ද (VAT) ගණනය කිරීමයි.

මෙම සංශෝධනය මහජනයාට වටහාගත නොහැකි ආකාරයේ සංකීර්ණ බදු වැඩිකිරීමක් බව ආනයනකරුවන්ගේ සංගමය අවධාරණය කරයි. පෞද්ගලිකව වාහන ආනයනය කරන්නන් බදු පැහැර හැරීම වැළැක්වීම සඳහා මෙම බද්ද රේගුවේදී අයකරන ලෙස තමන් මීට පෙර යෝජනා කළද, එහිදී බදු ප්‍රතිශතයන් නොවෙනස්ව තැබීම අපේක්ෂා කළ බව ඔවුහු පවසති.

නියෝජ්‍ය අමාත්‍ය ආචාර්ය අනිල් ජයන්ත මහතා මෑතකදී මාධ්‍ය වෙත ප්‍රකාශ කළේ රජය සිදුකරන්නේ බදු අයකරන ස්ථානය (Point of collection) වෙනස් කිරීම පමණක් බවයි. නව බදු පැනවීමක් පිළිබඳ කෙරෙන ප්‍රකාශ පාරිභෝගිකයන් බිය ගැන්වීම සඳහා අලෙවිකරුවන් විසින් ගෙන යන “මුළා කරන සුළු උපක්‍රමයක්” බවද ඔහු පැවසීය.

කෙසේ වෙතත්, 2026 අප්‍රේල් 1 වන දින සිට ක්‍රියාත්මක වීමට නියමිත මෙම නව බදු එකතු කිරීමේ ක්‍රමය හේතුවෙන් වාහන සඳහා ගෙවිය යුතු සමස්ත රේගු ගාස්තුව අපේක්ෂිත මට්ටමට වඩා බෙහෙවින් ඉහළ යනු ඇතැයි කර්මාන්ත ක්ෂේත්‍රයේ නියෝජිතයෝ අනතුරු අඟවති. මෙය අවසානයේදී වාහන මිල ඉහළ යාමට සෘජුවම බලපානු ඇත.

---