චීනයේ ඇමරිකානු නිලධාරීන්ට චීන ජාතිකයන් සමග ආදර සබඳතා තහනම්

2025 අප්‍රේල් 03, ප.ව. 8:58

එක්සත් ජනපද රජය චීනයේ සිටින ඇමරිකානු රජයේ නිලධාරීන්ට මෙන්ම ආරක්ෂක අනුමැතිය සහිත පවුලේ සාමාජිකයින්ට සහ කොන්ත්‍රාත්කරුවන්ට චීන පුරවැසියන් සමග කිසිදු ආදර හෝ ලිංගික සම්බන්ධතාවයක් පැවැත්වීම තහනම් කර ඇති බව ඇසෝසියේටඩ් ප්‍රෙස් පුවත් සේවය වාර්තා කළා.

මේ සම්බන්ධයෙන් සෘජු දැනුමක් ඇති පුද්ගලයින් හතර දෙනෙකු AP වෙත මෙම ප්‍රතිපත්තිය ගැන පවසා ඇති අතර, එය ජනවාරි මාසයේදී සිය ධුර කාලය නිමවා ගිය එක්සත් ජනපද තානාපති නිකලස් බර්න්ස් චීනයෙන් පිටව යාමට ටික කලකට පෙර බලාත්මක කරන ලද බවයි පැවසෙන්නේ.

ඇතැම් එක්සත් ජනපද ආයතන දැනටමත් එවැනි සබඳතා සම්බන්ධයෙන් දැඩි නීති රීති පනවා තිබුණද, මෙවැනි ප්‍රතිපත්තියක් සීතල යුද්ධයෙන් පසු ප්‍රසිද්ධියේ ප්‍රකාශයට පත්වූ අවස්ථාවක් දැනුවත්ව නොමැති බව ඇසෝසියේටඩ් ප්‍රෙස් පවසනවා. ඇමරිකානු රාජ්‍ය තාන්ත්‍රිකයින් දේශීය පුද්ගලයින් සමඟ පෙම් සබඳතා පවත්වා ඔවුන් හා විවාහ වීම පවා සිදුවන අවස්ථා තිබෙනවා.

පසුගිය ගිම්හානයේදී එක්සත් ජනපද නිලධාරීන්ට එක්සත් ජනපද තානාපති කාර්යාලයේ සහ චීනයේ කොන්සල් කාර්යාල පහක ආරක්ෂකයින් සහ අනෙකුත් සහායක කාර්ය මණ්ඩලය ලෙස සේවය කරන චීන පුරවැසියන් සමඟ “ආදර සහ ලිංගික සම්බන්ධතා” තහනම් කරමින් මෙම ප්‍රතිපත්තියේ වඩා සීමිත තත්ත්වයක් පනවන ලද බව ද වාර්තා වනවා. නමුත් පිටත්ව යන තානාපති බර්න්ස්, ජනාධිපති ඩොනල්ඩ් ට්‍රම්ප් බලයට පත්වීමට දින කිහිපයකට පෙර ජනවාරි මාසයේදී, චීනයේ සිටින ඕනෑම චීන පුරවැසියෙකු සමග එවැනි සබඳතා සඳහා සම්පූර්ණ තහනමක් දක්වා මෙම ප්‍රතිපත්තිය පුළුල් කර තිබෙනවා. කෙසේ වෙතත්, මෙම ප්‍රතිපත්තියේ “ආදර හෝ ලිංගික සම්බන්ධතාවය” යන වාක්‍ය ඛණ්ඩය අර්ථ දක්වා ඇත්තේ කෙසේදැයි AP ආයතනයට හරියටම තීරණය කිරීමට නොහැකි වූ බව ද ඔවුන්ගේ වාර්තාවෙහි දක්වා තිබෙනවා.

නව ප්‍රතිපත්තිය මගින් බීජිං හි තානාපති කාර්යාලය සහ ග්වංජෝ, ෂැංහයි, ෂෙන්යැං සහ වූහාන් හි කොන්සල් කාර්යාල මෙන්ම හොංකොං හි අර්ධ ස්වයං පාලන භූමියේ ඇමරිකානු කොන්සල් කාර්යාලය ඇතුළුව චීනයේ ප්‍රධාන භූමියේ එක්සත් ජනපද රාජ්‍යතාන්ත්‍රික කාර්යාල සියල්ල ආවරණය වන අතර එය චීනයෙන් පිටත ස්ථානගත කර ඇති එක්සත් ජනපද නිලධාරීන්ට අදාළ වන්නේ නැහැ.

මෙම ප්‍රතිපත්තිය හඳුන්වා දීමට පෙර චීන ජාතිකයකු හා සබඳතාවක් තිබූ නිලධාරියකු වේ නම් ඔහුට හෝ ඇයට හෝ ඉන් නිදහසක් සඳහා ඉල්ලීම් කළ හැකියි. නමුත් එය සඳහා අවසර නොලදහොත් එම නිලධාරියා එම සබඳතාවය අවසන් කිරීම හෝ සේවයෙන් ඉවත්ව යාම හෝ කළ යුතු වනවා.