ඇමරිකා – රුසියා සාකච්ඡා ඇරඹේ

2025 පෙබරවාරි 18, ප.ව. 4:20

ඇමරිකානු සහ රුසියානු දූත කණ්ඩායම් හි සාකච්ඡා අද සෞදි අරාබියේ රියාද් නගරයේදී ඇරඹුණා. මේ සඳහා ඇමරිකානු දූත කණ්ඩායම රාජ්‍ය ලේකම් මාර්කෝ රූබියෝගේ ප්‍රධානත්වයෙන් ද රුසියානු දූත කණ්ඩායම විදේශ ඇමති සර්ගේයි ලැව්රෝෆ්ගේ ප්‍රධානත්වයෙන් ද පැමිණ තිබෙනවා.

මීට අමතරව ඇමරිකානු ජාතික ආරක් ෂක උපදේශක මයික් වොල්ට්ස් සහ මැදපෙරදිග පිළිබඳ විශේෂ නියෝජිත ස්ටීව් විට්කොෆ් ද රුසියානු ජනාධිපතිගේ විදේශ කටයුතු උපදේශක යූරි උෂාකෆ් සහ රුසියානු ස්වෛරී අරමුදලේ ප්‍රධානී කිරිල් දිමිත්‍රියෙෆ් ද ඇතුලු පිරිසක් මෙම සාකච්ඡාවලට සහභාගී වනවා.

සෞදි අරාබිය මෙහිදී මැදිහත්කරු ලෙස කටයුතු කරනවා.

මෙම සාකච්ඡාවලදී දෙරට අතර සබඳතා ප්‍රකෘති තත්ත්වයට ගෙන ඒම පිළිබඳ සාකච්ඡා වන බව සඳහන් ව තිබුණා. එමෙන්ම යුක්‍රේනය ඇතුළු මාතෘකා කිහිපයක් පිළිබඳව සාකච්ඡා කෙරෙනු ඇතැයි අපේක්ෂා කෙරෙනවා.

යුක්‍රේන ජනාධිපති වොලොදිමීර් සෙලෙන්ස්කි සඳහන් කර තිබුණේ තම රටෙහි නියෝජනයක් නොමැතිව යුක්‍රේනය ගැන කෙරෙන සාකච්ඡාවන් තමන් පිළිගන්නේ නැති බවයි.