ඔබත් මේ රාජ්‍ය ආයතනවල වැඩ කරනවා නම් කල්පනාවෙන්

2025 මාර්තු 25, පෙ.ව. 12:09

වාණිජ නොවන රාජ්‍ය ආයතන ප්‍රතිව්‍යුහගත කිරීම පිළිබඳව සොයා බැලීම සඳහා කැබිනට් මණ්ඩලය පත්කළ කමිටුව, එම ආයතන ප්‍රතිව්‍යුහගත කිරීම සඳහා නිර්දේශ කිහිපයක් ඉදිරිපත් කර ඇති බවත්, එම නිර්දේශවලට ඇතැම් රාජ්‍ය ආයතන ඈවර කිරීම, ඇතැම් රාජ්‍ය ආයතන සඳහා රජයේ මැදිහත් වීම අවසන් කිරීම සහ ඇතැම් රාජ්‍ය ආයතන ඒකාබද්ධ කිරීම ඇතුළත්ව තිඛෙන බවත්, එම කමිටුව කැබිනට් මණ්ඩලයට ඉදිරිපත් කළ වාර්තාවේ දැක්වේ.

ඒ යටතේ අමාත්‍යාංශ හයකට අයත් වාණිජ නොවන රාජ්‍ය ආයතන 12 ක් ඈවර කිරීමට නියමිතව ඇති අතර, මහවැලි අධිකාරිය සහ කජු සංස්ථාව ද ඒ යටතේ වසා දැමීමට නියමිතය.

එලෙස ඇවර කිරීමට නිර්දේශ කර ඇති රාජ්‍ය ආයතන අතරට ගාලු උරුම පදනම, ජාතික සාගර කටයුතු කමිටු ලේකම් කාර්යාලය තොරතුරු හා සන්නිවේදන තාක්ෂණ නියෝජිතායතනය ඇතුළත් වේ.

ශ්‍රී ලංකා ගුවන් විදුලි සංස්ථාව, රූපවාහිනී සංස්ථාව සහ ස්වාධීන රූපවාහිනී ජාලය එක කළමනාකාරිත්වයක් යටතට ගෙන ආ යුතු බවට ද කැබිනට් මණ්ඩලය පත් කළ එම කමිටුව නිර්දේශ කර ඇත.

එමගින් එම ආයතන වල කාර්යක්ෂමතාව මෙන්ම වාණිජ වශයෙන් යැපිය හැකි බව ද ඉහළ යනු ඇතැයි කමිටු වාර්තාවේ සඳහන් කර තිබේ.

කළමනාකාරිත්වය එක් තැනකට ගෙන ඒම සඳහා යෝජනා කළ ද, ඉහත මාධ්‍ය ආයතන පවත්වාගෙන යාම සඳහා සැලකිය යුතු ආයෝජන ප්‍රමාණයක් ලබාගත යුතු බව ද කමිටුවේ මතය වී ඇත.

ශ්‍රී ලංකා තේ මණ්ඩලය සහ කුඩා තේ වතු සංවර්ධන අධිකාරිය ඒකාබද්ධ කිරීමටත්, පොල් වගා කිරීමේ මණ්ඩලය, පොල් සංවර්ධන අධිකාරිය තල් සංවර්ධන මණ්ඩලය ඒකාබද්ධ කිරීමටත්, කමිටුව එම වාර්තාව මගින් නිර්දේශ කර තිබේ.

රටේ සියලුම ව්‍යවස්ථාපිත වාණිජ නොවන රාජ්‍ය ආයතන සමාලෝචනය කිරීම සඳහා අග්‍රාමාත්‍ය ලේකම් ප්‍රදීප් සපුතන්ත්‍රි මහතාගේ ප්‍රධානත්වයෙන් යුත් කමිටුවක් කැබිනට් මණ්ඩලය විසින් පසුගිය වසරේ දෙසැම්බර් මාසයේදී පත් කරන ලදී. රාජ්‍ය සේවා සැපැයීම ශක්තිමත් කිරීම C300 එම ආයතන වලට ආවේණික අකාර්යක්ෂමතා ආමන්ත්‍රණය කිරීම එහි අරමුණ විය.

අමාත්‍යාංශ 24කට අයත් රාජ්‍ය ආයතන 160 ක් කමිටුව විසින් මෙලෙස ඇස්තමේන්තු කරනු ලැබීය.

අග්‍රාමාත්‍ය, ආචාර්ය හරිනි අමරසූරිය මෙනවිය විසින් කමිටු වාර්තාව පසුගිය දා කැබිනට් මණ්ඩලයට ඉදිරිපත් කරන ලද අතර. එහි යෝජනා ක්‍රියාත්මක කිරීම සඳහා කැබිනට් මණ්ඩලය අනුමැතිය දී ඇත.

ඇතැම් රාජ්‍ය ආයතන කාර්යක්ෂමව ක්‍රියාත්මක වන බවත්, ඒවා ඒ ආකාරයෙන්ම ක්‍රියාත්මක විය යුතු බවත් කමිටුවේ නිර්දේශය වී තිබේ.

අනෙකුත් වාණිජ නොවන රාජ්‍ය ආයතන පවත්වාගෙන යාම සඳහා පෞද්ගලික – රාජ්‍ය හවුල්කාරිත්වයක් ගොඩනගාගත යුතු බව ද කමිටුව නිර්දේශ කර ඇත.

උදාහරණයක් ලෙස, ශ්‍රී ලංකා චිත්‍රපට සංස්ථාව පෞද්ගලික හවුල්කරුවකු සමඟ හවුල් වුවහොත් එම සංස්ථාව කාර්යක්ෂමව පවත්වා ගෙන යාමට හැකි බවත්, එවිට භාණ්ඩාගාරය මතඑහි යැපීම අවම කළ හැකි බවත් වාර්තාවේ සඳහන් විය.

පුනරුත්ථාපන කොමසාරිස් ජනරාල් කාර්යාලය, දුම්කොළ හා මද්‍යසාර පිළිබඳ ජාතික අධිකාරිය සහ ජාතික අන්තරායකර ඖෂධ පාලන මණ්ඩලය ඒකාබද්ධ කිරීමට ද කමිටුව නිර්දේශ කර ඇත.

සර් ජෝන් කොතලාවල රෝහල කිසිදු ලාභයක් නොලබන බවත්, එය භාණ්ඩාගාරයට බරක් වී ඇති බවත් කමිටුවේ මතය වී තිබේ.

එබැවින්, සර් ජෝන් කොතලාවල රෝහල මූල්‍යමය වශයෙන් ශක්තිමත් ආයතනයක් කරන්නේ කෙසේ ද යන්න සොයා බැලීම සඳහා කමිටුවක් පත් කළ යුතු බව ද එම කමිටු වාර්තාවේ දැක්වේ.

ප්‍රවේශය පුළුල් කිරීම සඳහා ශ්‍රී ලංකා පුවත්පත් මණ්ඩලයේ නම ශ්‍රී ලංකා මාධ්‍ය කවුන්සිලය ලෙස වෙනස් කරමින් දිගටම පවත්වාගෙන යා යුතු බව ද එම වාර්තාවේ සඳහන් වේ.

රාජ්‍ය ආයතන වලට අයත් ඉඩම් විශාල ප්‍රමාණයක් කිසිම ප්‍රයෝජනයක් නොගෙන පවතින බවත්, ඒවා මහජනතාවට ප්‍රයෝජනවත් වන අයුරින් කළමනාකරණය කිරීම සඳහා පියවර ගත යුතු බවත් එම වාර්තාවෙන් නිර්දේශ කර ඇත.