පෞද්ගලික අංශයේ අවම වැටුප හරියටම වැඩිවෙන්නේ මෙහෙමයි

2025 අප්‍රේල් 10, ප.ව. 3:33

මෙතෙක් මසකට රුපියල් 21000 ක්ව පැවැති පෞද්ගලික අංශයේ ජාතික අවම මාසික වැටුප, අයවැය යෝජනා අනුව මේ වසරේ සිට මසකට රුපියල් 27000 දක්වා වැඩි කෙරෙන අතර ජාතික අවම දෛනික වැටුප ද රුපියල් 700 සිට 1080 දක්වා වැඩි කිරීමට තීරණය කර ඇති බව කම්කරු අමාත්‍යාංශය නිවේදනයක් නිකුත් කරමින් කියා සිටියි.

පෞද්ගලික අංශයට දැනට ගෙවනු ලබන ජාතික අවම මාසික වැටුප වන රුපියල් 21000 ගෙවනු ලැබූයේ, 2024 අංක 48 දරන ජාතික අවම චේතන (සංශෝධන) පනත අනුව ගෙවනු ලබන රුපියල් 17500 ද, 2005 අංක 36 දරන අය වැය සහන දීමනා පනත යටතේ ගෙවනු ලබන රුපියල් 1000 ක අයවැය සහන දීමනාව ද, 2016 අංක 4 දරන අය වැය සහන දීමනා පනත යටතේ ගෙවනු ලබන රුපියල් 2500 ක අය වැය සහන දීමනාව ද යන තුනෙහි එකතුවක් ලෙස ය.

මේ අනුව, මීට පෙර ලද ඉහත අය වැය සහන දීමනාවන් වූ රුපියල් 3500 ක මුදල මින් පසු මූලික වැටුපට/ වේතනයට එකතු වන අතර එම මූලික වැටුප වැඩිවීම මගින් සේවකයන්ට මූලික වැටුපට සාපේක්ෂව ලැබෙන ප්‍රතිලාභ ද වැඩි විය හැකිය.

මෙම පනත ක්‍රියාත්මක වන දිනය තෙක් ජාතික අවම වේතනයට වඩා වැඩි වැටුපක්, මූලික වැටුප හෝ වේතනය ලෙස ලබමින් සිටි සේවකයින් සම්බන්ධයෙන් එකී අය වැය සහන දීමනාවන් අදාල මූලික වැටුපට හෝ වේතනයට වැටුපේ කොටසක් ලෙස සළකා එකතු කර ගෙවීම කරනු ඇත.

මෙම වසරේදී රුපියල් 27000 දක්වා වැඩි කෙරෙන මෙම ජාතික අවම වැටුප ලබන වසරේ සිට රුපියල් 30000 දක්වාත් දෛනික වැටුප ද රුපියල් 1080 සිට රුපියල් 1200 දක්වාත් වැඩි කිරීමට නියමිතය.

මේ සඳහා කම්කරු අමාත්‍යවරයා විසින් ඉදිරිපත් කළ යෝජනාවට කැබිනට් මණ්ඩල අනුමැතිය හිමි වූ අතර ඊට අදාල පනත් කෙටුම්පත කඩිනමින් පාර්ලිමේන්තුවට ඉදිරිපත් කිරීමට කටයුතු කරන බව ද කම්කරු අමාත්‍යාංශය නිවේදනය කර සිටියි.