කොළඹ කුලපති මුරුත්තෙට්ටුවේ හිමි නෙරපන්නැයි ජනපතිට ලිපියක්

2024 නොවැම්‍බර් 28, පෙ.ව. 12:06

කොළඹ විශ්වවිද්‍යාලයේ කුලපති ධුරය සඳහා පත් කර සිටින මුරුත්තෙට්ටුවේ ආනන්ද හිමි වෙනුවට විශ්වවිද්‍යාලයේ කීර්තිය සහ ගෞරවය ආරක්ෂා කළ හැකි පුද්ගලයෙකු පත් කරන ලෙස ඉල්ලා කොළඹ විශ්ව විද්‍යාලයේ මහා ශිෂ්‍ය සංගමය අනුර කුමාර දිසානායක මහතාට වෙත ලිපියක් යොමු කර තිබේ.

එම සංගමය ජනාධිපතිවරයාට යැවූ ලිපිය පහත දැක්වේ.

අනුර කුමාර දිසානායක
ජනාධිපති,
ජනාධිපති ලේකම් කාර්‍යයාලය,
කොළඹ 01.
ජනාධිපතිතුමනි,

කොළඹ විශ්වවිද්‍යාලයේ ගෞරවාන්විත ම තනතුර වන කුලපති ධූරයට පසුගිය වකවානුව තුළ දේශපාලනික පත්කිරීමක් වශයෙන් පත් කෙරුණු මුරුත්තෙට්ටුවේ ආනන්ද හිමියන් සම්බන්ධව කලක පටන් කොළඹ විශ්වවිද්‍යාලයීය ශිෂ්‍ය ප්‍රජාවගේත්, සමස්ත සමාජයේත් දැඩි අප්‍රසාදයක් ප්‍රකාශ විය.

එයට හේතුව මුරුත්තෙට්ටුවේ හිමිගේ පත්කිරීමට පූර්වයේ කොළඹ විශ්වවිද්‍යාලයීය කුලපතිධූරයට තෝරා පත් කරගත් කුලපතිවරුන් එම භූමිකාවට ගැළපෙන සුදුසුකම් සහ මනා පරිචයකින් යුක්ත වූවන් වීමත් මෙම මුරුත්තෙට්‍ටුවේ හිමිගේ පත් කිරීම හුදෙක් එවකට රාජ්‍ය නායකයා ස්වකීය මැතිවරණ ව්‍යාපාරයට සහාය දැක්වීම වැනි පටු කාරණා පදනම් කරගෙන සිදු කිරීමත් ය.
එලෙසින් ධූරයේ පරමාභිලාෂය නොසලකමින් තම පටු අරමුනු මුදුන් පමුණුවා ගැනීමට එවකට ජනාධිපතිවරයා විසින් මුරුත්තෙට්ටුවේ හිමියන්ව පත්කරගැනීම පදනම් කරගෙන එයට විරුද්ධව බොහොමයක් පාර්ශව විවිධාකාර ක්‍රියාමාර්ග ගන්නා ලදි.

පසුගිය වකවානුවේ වසර ගණනාවක් ම කොළඹ විශ්වවිද්‍යාලයට අදාළව පැවති උපාධි ප්‍රදානෝත්සව කිහිපයකදී ම කුලපතිවරයා අතින් තම උපාධිය ලබා ගැනීම ප්‍රතික්ෂේප කිරීම එහිලා සුවිශේෂී අවස්ථාවකි. මෙවන් තත්ත්වයන් දිගින් දිගට ම සිදුවීම විශ්වවිද්‍යාලයේ කීර්තිනාමයට ද අති මහත් වූ කැළලකි. ශ්‍රී ලංකාවේ රාජ්‍ය නායකයා විසින් පත් කරනු ලබන නාමමාත්‍රික තනතුරක් වුව ද විශ්වවිද්‍යාලයක කුලපති ධූරය වනාහි එකී විශ්වවිද්‍යාලයේ ගෞරවය, කීර්තිය පිළිබඳ ව ප්‍රකාශමාන වන සංකේතයක් බඳු ය.

විශ්වවිද්‍යාලයක අතිමූලික කර්තව්‍ය වන විද්‍යාර්ථීන් බිහි කිරීමේදී සිදු කෙරෙන උපාධි ප්‍රදානය කිරීමේ ප්‍රධානෝත්සවය වැනි වැඩසටහන්වල මූලාසනය හෙබවීම වැනි අවස්ථාවන් එම විශ්වවිද්‍යාලයේ කුලපති ධූරයට ලබා දෙන්නේ එහෙයිනි. විද්‍යාර්ථීන් තම වසර ගණනක මහන්සියේ අග්‍රඵලය බඳු උපාධිය ලබාගන්නේ බොහෝ විට එම උපකුලපතිගේ දෑතිණි. එහෙයින්, කුලපති ධූරය හුදු නාමික තානාන්තරයකින් ඔබ්බට ගිය සමස්ත විශ්වවිද්‍යාලයේ ම ගෞරවය පිළිබිඹු කරන කැඩපතක් වැනි ධූරයකි.

එම නිසා ඊට පත් කරනු ලබන තැනැත්තාගේ සුදුසුකම්, භාවිතාව සහ ක්‍රියාකලාපයන් සෘජුව ම ඔහු දරන තනතුරෙහි පැවැත්මට ද, ඊට අදාළ විශ්වවිද්‍යාලයේ තත්ත්වයට ද බලපානු ලබයි.
කොළඹ විශ්වවිද්‍යාලයීය කුලපති නාමාවලියේ ඉතිහාසය ගත් විට ලංකා විශ්වවිද්‍යාලය නමින් 1942 ආරම්භයේ පටන් 1981 වර්ෂය දක්වා ම විශ්වවිද්‍යාලයේ කුලපති වශයෙන් කටයුතු කර ඇත්තේ රාජ්‍ය නායකයා විසින් ය.

ඒ අනුව ශ්‍රීමත් අන්ඩෲ කැල්ඩිකොට් ආණ්ඩුකාරවරයාගේ පටන් ජේ.ආර්. ජයවර්ධන ජනාධිපතිවරයා දක්වා විශ්වවිද්‍යාලයේ කුලපතිවරයා වශයෙන් රාජ්‍ය නායකයා කටයුතු කර තිබේ.

1978 අංක 16 දරන විශ්වවිද්‍යාල පනතේ 16 වන වගන්තිය ප්‍රකාරව දිවයිනේ පිහිටුවන සෑම විශ්වවිද්‍යාලයකට ම ප්‍රධානියා ලෙස කුලපතිවරයෙකු පත් කිරීමට ජනාධිපතිවරයාට බලය පැවරිණි.
ඒ අනුව 1981 වර්ෂයේදී ප්‍රථම වතාවට රාජ්‍ය නායකයෙකු නොවන කුලපතිවරයෙකු වශයෙන් දේශමාන්‍ය ආචාර්‍ය, වෛද්‍ය පී.ආර්. ඇන්තනීස් මහතාව පත් කරන ලදි. ඒ මහතාගෙන් පසුව කොළඹ අගරදගුරු ආචාර්‍ය ඔස්වල්ඩ් ගෝමිස් දේවධර්මාචාර්‍යතුමන් කොළඹ විශ්වවිද්‍යාලයේ කුලපති ධූරය හොබවන ලදි.

අධ්‍යාපනික වශයෙන් ස්වකීය ක්ෂේත්‍රයන්හි පරතෙරට ගිය ඥානයෙන් ද, ඉන් සමාජයට සිදු කරන ලද සේවයෙන් ද, එසේම ඉන් පරිබාහිරව ජාතික සහ සාමයික වශයෙන් ද, සමස්ත රටට ම සේවය කළ වැදගත් පුද්ගලයන් කොළඹ විශ්වවිද්‍යාලයේ කුලපති ධූරයට පත්ව තිබෙන බව පෙනෙතත් මුරුත්තෙට්ටුවේ ආනන්ද හිමියන් හුදෙක් දේශපාලන පත්කිමක් මිස අන්කිසිවක් එතුළ නැති බව මෙ වන විට ඕනෑවටත් වඩා තහවුරු කොට ඇත.

එහෙයින්, ඔබතුමන් වෙත පැවරි ඇති විධායක බලතලයන් හරහා කොළඹ විශ්වවිද්‍යාලයේ කුලපති ධූරය සඳහා විශ්වවිද්‍යාලයේ කීර්තිය සහ ගෞරවය ආරක්ෂා කළ හැකි ඊට වඩා සුදුසු පුද්ගලයෙකු නව කුලපතිවරයෙකු ලෙස පත් කිර්‍රමට අදාළ පියවර ගන්නා මෙන් ඉල්ලා ඔබතුමාගෙන් ඉල්ලා සිටිමි.
ස්තුතියි!

මහා ශිෂ්‍ය සංගමය – කොළඹ විශ්වවිද්‍යාලය