“රටේ විශාල පිරිසක් මේ වෙලාවෙ අසරණ වෙලා ඉද්දි අපේ ගෙවල් වලත් බත ඉදෙන්නෙ නෑ…” සරණක් අවැසි මොහොතක පිහිට වෙන ඔහු ඇතුළු කණ්ඩායම

2025 නොවැම්‍බර් 30, පෙ.ව. 12:05

---

---

ඔහු ඇතුළු කණ්ඩායම සිදුකරන මේ සත් ක්‍රියාව ගැන මේ වන විටත් බෝහෝ දෙනා කතා කරනවා.

විපතට පත්වූවන් වෙනුවෙන් දිවා රෑ නොබලා සිය කණ්ඩායම සමඟ එක්ව ඔවුන්ගේ ආහාර අවශ්‍යතා සපුරන ඩඩ්ලි සිරිසේන ගැන මේ වෙද්දී හැමෝම කතා කරනවා.

තම සේවක පිරිසේ ශ්‍රම දායකත්වයෙන් ආපදාවට පත් පිරිස් වෙත ඔහු ආහාරපාන සැපයීම නොකඩවා සිදුකරනවා. ඒ ගැන සිය සමාජමාධ්‍ය පිටු අතරට සටහනක් එක්කරමින් ඔහු කියා සිටියේ තමා ඇතුළු පිරිස පිළිබඳ විශ්වාසය තබා ඔවුන්ට ආරක්ෂිතව සිටින ලෙසයි.. මේ ඒ ගැන ඔහු පළ කර සටහන..

“උදේ ලේස්ති වෙලා වැඩට ආපු මගේම අරලිය කණ්ඩායමේ සහෝදර සේවක සේවිකාවන් තවම ඒ තෙත ඇඳුම් වලින්ම උයන පිහන වැඩ කටයුතු කරනවා.
ඒ අයට විවේකයක් දෙන්න ඕන නිසා හෙට දහවල් සහ රාත්‍රී කාල වලට පමණක් පිසූ ආහාර දෙන්න සැළසුම් කරගෙන හිටියත්, මේ වෙලාවෙ මම ඒ තීරණය අපේ කණ්ඩායමේ අය එක්ක කතාබහ කරලා වෙනස් කළා.
අපි හෙට උදේට, දවල්ට වගේම රාත්‍රියටත් පිසූ ආහාර පාර්සල් අරගෙන එනවා. ඒ නිසා අපි ගැන බලාපොරොත්තු තියාගෙන ඉන්න. මොකද රටේ විශාල පිරිසක් මේ වෙලාවෙ අසරණ වෙලා ඉද්දි අපේ ගෙවල් වලත් බත ඉදෙන්නෙ නෑ.
ඒ නිසා ඔබේ ප්‍රදේශවලට අදාළ දිසාපතිතුමන්ලා, ප්‍රාදේශීය ලේකම්තුමන්ලා, ග්‍රාමසේවකවරු ඇතුලු රජයේ නිළධාරීන් විසින් ඔබව යොමු කර ඇති ස්ථානවලම විශ්වාසයෙන් රැඳී ඉන්න.”

තවද ඔහු මෙන්න මේ වගේ සටහනකුත් එක්කරලා තිබුණා.

“සුබ දවසක් ඔබ සියලුම දෙනාටම. අද අපි තුන් වේලම මිනිස්සුට කන්න කෑම දෙන අතරෙ, අසරණ වෙලා ඉන්න වීථි සුනඛයින්ටත් ඇතුලු සතුන්ටත් කෑම ලබා දෙන වැඩපිළිවෙළක් දියත් කරල තියනවා. ඒ වෙනුවෙන් කුඩා ලොරි රථ කිහිපයක් මම යොදවලා තියනවා. විශේෂයෙන්ම මීට දෙවසරකට පෙරාතුව මියගිය මගේ ආදරණීය සුරතලා වුණ ‘බංචිව’ මේ මොහොතේදී සිහිපත් කරමින්, මේ කටයුත්ත මම සිදුකරනවා.
ඒ වගේම ළඟා වීමට නොහැකි තැන් වලට ළඟා වීම වෙනුවෙන් විශේෂ බෝට්ටු පහක් යොදවන්න මම කටයුතු සූදානම් කරල තියනවා. ඒකට අදාළ සියලු බෝට්ටු මේ වන විට ගාල්ලෙන් මම ගෙන්වාගෙන තියනවා. ඊයෙ වගේම මගේ කාර්‍යමණ්ඩළයේ සියලුම දෙනා අදටත් ඔබ වෙනුවෙන් මුලු දවසෙම කැප වෙනවා. මිනිසුන් ගළවාගැනීමේ මෙහෙයුම් වලට මගේ ටිපර් රථ සියල්ලක්ම අදත් යොදවලා තියනවා.
ඊයෙ දිනයේදී සේවය සඳහා යොදවපු අපේ ටිපර් රථ කිහිපයකටම වතුරෙන් හානි වෙලා තිබුණත්, අද වඩාත් සංවිධානාත්මකව එම සේවාව අපි විසින් සංවිධානය කරල තියනවා. ආයතනයේ ලොරි රථ බොහෝ ප්‍රමාණයක් අද දවසේ ආහාර ප්‍රවාහණ කටයුතු වෙනුවෙන් අනියුක්ත කරල තියනවා. විශේෂයෙන්ම ඒ ලොරි රථ වෙනුවෙන් මහමඟදී ප්‍රමුඛතාවයක් දක්වන ලෙස මා කාරුණිකව ඔබෙන් ඉල්ලා සිටිනවා.
හැමෝම පරෙස්සමට ඉන්න. තෙරුවන් සරණයි හැමෝටම.”

---