දෙයියෝ ආතල් ගත්තට ජූරි ආතල් ගන්න බැ… සමාජ මාධ්‍ය උඩුයටිකුරු කල අපූරු විශ්ලේෂණයක් ගැන රසිකයෙක් තැබූ සුන්දර සටහනක් මෙන්න

2025 අප්‍රේල් 05, පෙ.ව. 12:03

---

---

සෙනසුරු මාරුව වුන මාර්තු 29 වෙනිදා ආන්දෝලනාත්මක ජූරි තීරණත් එක්ක Raigam Tele’es සම්මාන උළෙල අති උත්කර්ෂවත්ව පැවැත්වුනා. රයිගම් ජූරිය කළේ මිල කළ නොහැකි, දුෂ්කර වැඩක්. ඒ තීරණ සාපේක්ෂ නිසා විවිධ අයට විවිධ අදහස් තියෙන්න පුළුවන්. මොනා වුනත් ජූරි තීරණ වැරදියි කියන්න කාටවත් සදාචාරාත්මක අයිතියක් නෑ. ඒත් “ජූරියේ තීරණවලට ගරු කරනගමන්, ඊට වඩා වෙනස් අදහස් තියනවා නම් ඒ ගැන කතා කරන්න අපිට පුළුවන්.

2024 දි ලොකු ජනප්‍රියත්වයක් සහ ලොකු “social impact” එකක් කරපු ඩ්‍රාමා එකක් තමයි Take Care ( ටේක් කෙයා ). මේ ඩ්‍රාමා එක සම්මාන උළෙලවල්වල ප්‍රමිතිය පරීක්ෂා කරන ලිට්මස් පරීෂණයක් කියලා කියන්නත් පුළුවන්.

මේ ඩ්‍රාමා එකේ අසේනි සහ මේනකාගේ චරිත, සමාජ බලපෑමක් (Social impact) ඇතිවෙන තරමටම රචකයා විසින් ලියලා තිබ්බා සහ ඒ නිළියන් දෙන්නා සමාජ බලපෑමක් ඇතිවෙන තරම් විශිෂ්ට විදිහට ඒ චරිත දෙක කළා. ඒත් ඒ අය රයිගම් නිර්දේශ නාම අතර නෑ. මේ ගැන කතා කරපු ජූරි සභිකයින් කියුවෙ ජනතාව කැමති ටෙලිනාට්‍ය / චරිත වෙනුවෙන් ජනගත සහ ජනප්‍රිය කියලා සම්මාන කුලක 2ක් හඳුන්වල දීල තියනවයි කියලා. Dinakshieට ජනප්‍රිය සම්මානයක් සහ Rebeccaට කුසලතා සම්මානයක් ලැබෙන බව ව්‍යංගයෙන් එතෙන්දි කියවුනා. සමහරවිට නිර්දේශ නාමත් එක්ක සමාජ කතා බහක් ඇතිවුනාට පස්සෙ රෙබෙකට කුසලතා සම්මානයක් දෙන්න තීරණය කළාද දන්නෙත් නෑ. ඕක හරියටම බලාගන්න පුළුවන් තැනක් තමයි රෙබෙකට සම්මාන උළෙලට ආරාධනා පත්‍රය ලැබුණු දිනය මොකද්ද කියලා හොයාගන්න එක.

Take Care එකේ රෙබෙකා හරිම පරිස්සමට impactful විදිහට ගොඩනගපු අසේනිගෙ චරිතය කුසලතා සම්මානෙකට ලඝු කරන්න බෑ! මට අනුව ඒ පුංචි කුසලතා සම්මානෙට, අසේනිගේ චරිතය හොඳටම බර වැඩියි. රංගන ශිල්පිනියන්ට සම්මානය බර වුන අවස්ථා ඕන තරම් තිබුනත්, සම්මානයකට රංගන ශිල්පිනියක්ව දරාගන්න අමාරු වුන පළමු අවස්ථාව තමයි මේ. ඒ රංගනය වසරේ විශිෂ්ට රංගනයකට වඩා එහාට ගිය, දශකයේ විශිෂ්ට රංගනයන් අතරින් එකක්. ඒත් ඉතිං මේ අදහස් සාපේක්ෂ නිසා ජූරියට කිසිම වරදක් කියන්න බෑ.

ඔස්කා, ෆිල්ම්ෆෙයා වගේ සම්මාන ජූරි විසින් සලකා බලන මම කලින් කියපු social impact / ජනප්‍රිය / social influence නිර්ණායකය රයිගම් ජූරිය සලකා බලන්නෙ නැහැයි කියන එක ජූරි සභිකයින්ගේ ප්‍රකාශ ඇතුළෙ තිබුනා. යම් නිර්මාණයක සමාජ බලපෑම හෝ ජනප්‍රියත්වය නොසලකා සම්මාන දීමත් පිළිගත් ක්‍රමවේදයක්. ඒත් ටෙලිනාට්‍ය ක්ෂේත්‍රය දියුණු වෙන්න නම් ගුණාත්මක බවත් එක්කම, අදාළ නිර්මාණය සමාජයට මොන තරම් බලපෑමක් කළාද කියන කාරණය ගැනත් හිතලා සම්මාන දෙන්න ඕනෙ. එතකොට තමයි ටෙලිනාට්‍ය ක්ෂේත්‍රය දියුණු වෙන්නෙ.

මෙතන ඉඳලා කල්පනාවෙන් කියවන්න…

රයිගම් “හොඳම නිළිය” වුනේ වියළි එකේ මාලාගේ චරිතය කරපු තරින්දි. “හොඳම සහාය නළුවා” වුනේ වියළි එකේ කරුණාපාල චරිතය කරපු සරත් කොතලාවල. වියළි කතා සංකල්පයට තීරණාත්මකව දායක වුන කරුණාපාල “සහාය” චරිතයක් නම්, මාලා කියන්නෙ ඊටත් වඩා පහළින් තියන “සහාය” චරිතයක්. ඒත් සම්මාන දෙද්දි මාලා ‘සහය’ නොවී ‘ප්‍රධාන’ චරිතයක් වුණේ කොහොමද?

සමහර න්‍යායාත්මක ඉගැන්වීම් අනුව මාලා කියන්නෙ ප්‍රධාන චරිතයක් කියලා තර්ක කරන්න පුළුවන්. හරි!! මාලා ප්‍රධාන වෙනවා නම්, මාලාටත් වඩා ප්‍රධාන චරිතයක් වුන කරුණාපාල හොඳම ‘සහාය’ නළුවා වෙන්නෙ කොහොමද ? දෙයියො ආතල් ගන්නවද ? මෙතන ලොකු තාක්ෂණික අවුලක් තියනවා. ඒත් ජූරියට පුළුවන් නම් නිවේදනයක් මඟින් වියළි එකේ ‘සහය’ ‘ප්‍රධාන’ අවුල ලිහලා දෙන්න, මේ විෂය ගැන මම නොදන්න දේවල් දැනගෙන මගේ දැනුම අලුත් කරගන්න මට පුළුවන්. ඒ වගේම රයිගම් සම්මාන උළෙලේ ප්‍රමිතියටත්, සම්මාන දිනපු අයගේ ගෞරවයටත් ඒක ලොකු හේතුවක්.

See you ඩ්‍රාමා එකෙන් හොඳම නිළියට නිර්දේශ වුන Shalaniගේ රඟපෑම නම් See you එකට වඩා බැක්සයිඩ් එකේ ඉතා හොඳයි. See you එකේ අන්තිම හරියෙදි රංගනයේ මූලික දේවල් පවා ශලනිගෙන් ගිලිහිලා තිබුනා. Reaction පවා හරියට තිබ්බෙ නෑ. ඒත් දෙයියො ආතල් ගන්නවා වගේ ශලනි See you වෙනුවෙන් නිර්දේශ වෙනවා.

තරින්දි කියන්නෙ හරි පාරෙ පරිස්සමට ගියොත් චාන්දනී, අනෝජා, ස්වර්ණා අභිබවා යන්න පුළුවන් කෙනෙක්. ඒත් වියළි ඩ්‍රාමා එකේ මාලා චරිතය සාම්ප්‍රදායික නිළියකට වුනත් කරන්න පුළුවන් මට්ටමේ චරිතයක්. ඒත් තරින්දි ඒ චරිතෙ උපරිම ගැම්මෙන් කළා. එතෙන්දි, ඇය චරිතයට දුන්න වෙනස් හැඩය මොකක්ද කියලා අඳුර ගන්න තරම් බුද්ධියක් මට නෑ. ඒත් තත්පරයක් දෙන්න ඩ්‍රාමා එකේ පූජනීගේ චරිතය ඇතුළෙ තරින්දි තමන්ගෙ unorthodox හැකියාව උපරිමේටම පෙන්නලා චරිතයේ ඩීටේල් නියමෙටම ප්ලේ කරා. හොඳම නිළිය විදිහට හරි කෙනෙක්ට සම්මානය ලැබුණත්, ඒ සම්මානය ලැබුණෙ වැරදි චරිතයක් වෙනුවෙන් කියලා මට හිතෙනවා.

දිනිති තමන්ගේ ජීවිතයේ කරපු සාර්ථක රංගනය සුසුම් රස්තියාදුවේ ගිම්හානිගේ චරිත කියලා මම හිතනවා. ඒක ටිකක් වෙනස් අමුතුම රැඩිකල් චරිතයක්. ඒත් ඒ චරිතයේ සමහර තැන්වල කෘතිම සහ අභව්‍ය හැඟීම් ප්‍රකාශන ගොඩක් තිබුනා.

හොඳම නිළිය නිර්දේශ නාම එක්ක බලද්දි.., චණ්ඩි කුමාරිහාමි එකේ Madhavee, තත්පරයක් දෙන්න එකේ Tharindi, සුසුම් රස්තියාදුවේ චාන්දනී, අපි ඩ්‍රාමා එකේ උමාලි, බැක්සයිඩ් එකේ ශලනි සහ අනිච්චාවත සංඛාරා ඩ්‍රාමා එකේ Umayangana ගෙ රංගනයන් ස්ථානගත වෙන්න ඕනෙ කොතනද? දෙයියො ආතල් ගන්නවද?

ඊළඟ ආන්දෝලනාත්මක තැන තමයි මීයා. රැඩිකල් තීන්දු ගන්නවා කියලා හිතලා මීයාට සම්මාන දුන්නා නම් ඒකට එකඟ වෙන්න පුළුවන්. ඒත් මීයට සම්මාන දෙද්දී රැඩිකල් වෙලා අනිත් සම්මාන දෙද්දී රැඩිකල් නොවී ඉන්න ඔට්ටු නෑ.

රයිගම් නිර්දේශ නාම ගණනාවක් ගැන විකල්ප අදහස් මට තියනවා. ඒත් ඒ අතරින් සමහර අංශවලට අදාළ නළු නිළියන් තවමත් යෞවනේ පසුවන දක්ෂ නවකයින් නිසා ඒ ගැන මම නිහඬව ඉන්නවා.

රයිගම් වගේ ප්‍රධාන ධාරාවේ සම්මානයක් “ලැබීම හෝ නොලැබීම” කියන්නෙ ඕනම කෙනෙක්ගෙ වෘත්තීය ජීවිතය විතරක් නෙමෙයි, පෞද්ගලික ජීවිතය පවා උඩු යටිකුරු කරලා “හොඳ පැත්තට හෝ නරක පැත්තට” ප්‍රබල විදිහට වෙනස් කරන්න පුළුවන් දෙයක්. ඇත්තටම මේක සෙනසුරු මාරුවක් වගේ! ඒ නිසා මේ සම්මාන ලබා දෙන ජූරියට, ගෞරවාන්විත සහ භයානක වගකීමක් තියනවා! ඒ නිසා හෙණ ගහනවා වගේ තිරණ ගන්නෙ නැතුව තමන්ගෙ කාලය දැනුම වැය කරලා වඩාත් නිවැරදි තීරණ ගන්න ඕනෙ. හෙණ ගහනකොට කියලා ගහන්නෙ නෑනෙ ඉතිං. දෙයියො ආතල් ගත්තට ජූරිවලට ආතල් ගන්න බෑ මිත්‍රයා.

ලක්මිණ රණසිංහ

---