මෙරට අපරාධකරුවන් විදේශවල සැගවී ඉන්න තැන් දන්නවා..

2025 ජූලි 29, පෙ.ව. 12:04

විදේශගතව සැඟවී සිටින ශ්‍රී ලාංකික අපරාධකරුවන් 67 දෙනෙකුට එරෙහිව රතු නිවේදන නිකුත් කර ඇති බව මහජන ආරක්ෂක අමාත්‍යාංශය නිවේදනය කරයි.

මහජන ආරක්ෂක අමාත්‍ය ආනන්ද විජේපාල මහතා මාධ්‍ය වෙත අදහස් දක්වමින් කියා සිටියේ, මෙම සැකකරුවන් බොහෝ දෙනෙක් ව්‍යාජ ගමන් බලපත්‍ර භාවිත කරමින් විදෙස්ගත වී ඇති බවයි.

කෙසේ වෙතත්, බුද්ධි අංශ විසින් ඔවුන්ගෙන් බහුතරයක් දැනට වාසය කරන රටවල් හඳුනාගෙන ඇති බව ද අමාත්‍යවරයා සඳහන් කළේය.

මෙම සැකකරුවන් අත්අඩංගුවට ගැනීම සහ ඔවුන් මෙරටට පිටුවහල් කර ගැනීම සඳහා අදාළ රටවල විදේශ අමාත්‍යාංශ සහ නීතිය බලාත්මක කිරීමේ ආයතන සමඟ රජය සමීප සම්බන්ධීකරණයෙන් කටයුතු කරයි.

මෙම වැඩසටහන යටතේ පසුගිය මාස කිහිපය තුළ සැකකරුවන් 20 දෙනෙකු පමණ මේ වන විටත් මෙරටට ගෙන්වා ගැනීමට හැකි වී ඇතැයි අමාත්‍යවරයා වැඩිදුරටත් පැවසීය.

ශ්‍රී ලංකාවේ සිදු වූ මහා පරිමාණ මත්ද්‍රව්‍ය ජාවාරම් සහ කොන්ත්‍රාත් ඝාතන කිහිපයක් විදෙස්ගත පුද්ගලයන් විසින් මෙහෙයවා ඇති බවට විමර්ශන මගින් අනාවරණය වී තිබේ. අපරාධ පරීක්ෂණ දෙපාර්තමේන්තුව මෙම ජාලයන් පිළිබඳ පරීක්ෂණ මෙහෙයවයි.

මේ අතර, මෙම පළාගිය අපරාධකරුවන්ට ව්‍යාජ ගමන් බලපත්‍ර නිකුත් කිරීමෙන් ආධාර කළ බවට සැක කරන ඇතැම් ආගමන විගමන නිලධාරීන් සම්බන්ධයෙන් වෙනම විමර්ශනයක් ද ආරම්භ කර ඇත.