වැවුරුකන්නල පන්සල අඳුරේ – ලයිට් බිල ලක්ෂ 10ක්

2023 ජූනි 20, පෙ.ව. 9:37

---

---

ඓතිහාසික දික්වැල්ල වැවුරුකන්නල බුදු රජ මහා විහාරස්ථානයේ විදුලි බලය විසන්ධි කිරීමට ලංකා විදුලි බල මණ්ඩලය ඊයේ (19) කටයුතු කළා.

ඊයේ වන විට වැවුරුකන්නල විහාරස්ථානයේ විදුලි බිල රුපියල් දසලක්ෂ පනස්හතර දහස් එකසිය දහඅටක් වෙන බව වාර්තා වෙනවා.

මෙය පූජා නගරයක් ලෙස 1988 වර්ෂයේ නම් කිරීමත් සමග මෙම විහාරස්ථානය සඳහා විදුලි බිල සහනය ලබා දී ඇති අතර පසුගිය දා විදුලි බිල් වැඩි කිරීමත් සමග විහාරස්ථානයේ මෙලෙස අධික විදුලි බිලක් එකතු වුණා.

මෙම විහාරස්ථානයට දිවයිනේ නන් දෙසින් දේශීය විදේශීය බැතිමතුන් පැමිණෙන අතර ඓතිහාසික වටිනාකමකින් ද යුතු විහාරස්ථානයක්.

එමෙන් ම, සමාජ මෙහෙවරක් ලෙස මෙම විහාරස්ථානය මගින් පිරිවෙන් දෙකක් පවත්වාගෙන යන අතර විහාරස්ථානය මගින් පාසලක් ද පවත්වාගෙන යනවා.

ආගමික, ශාසනික සහ සමාජීය මෙහෙවර රාශියක් සිදු කරන මෙම විහාරස්ථානය ඊයේ (ජූනි 19) දින සිට විදුලි බලය නොමැති වීමෙන් අන්ධකාරයේ පවතිනවා.

විශේෂයෙන් ම මෙම විහාරස්ථානයේ සියක් රියන් උස පිළිම වහන්සේ නමක් වැඩ සිටිනවා.

අපායේ දර්ශන විදහා දැක්වෙන උමං විහාරය ඇතුළු අංග රාශියකින් සමන්විත වැවුරුකන්නල විහාරස්ථානයේ විහාරාධිපති විශ්‍රාමික පරිවේණාධිපති කරතොට පඤ්ඤාසීල නායක හාමුදුරුවන් වහන්සේ මෙසේ අදහස් දක්වා සිටියා.

“ඒ වගේ ම, 2008 වර්ෂයේ අගෝස්තු මස 30 වන දින වර්තමාන අග්‍රාමාත්‍ය දිනේෂ් ගුණවර්ධන එවකට පූජාභූමි හා නාගරික සංවර්ධන අමාත්‍යවරයා ලෙස සිටින කාලයේ මේ ස්ථානය පූජා භූමියක් බවට පත් කරමින් මුල්ගල් තැබුවා. අද වන විට අප විහාරස්ථානය සම්පූර්ණයෙන් ම අන්ධකාරෙන් පවතිනවා. ඒ වගේ ම ගමේ ජනතාව, මේ අවට බොහෝ දෙනෙක් ඉතාමත් දුකින් සිටින්නේ විහාරස්ථානය අද අඳුරෙන් පවතින නිසා. ඇත්ත වශයෙන්ම මේ කර ගත්තේ මහා අකුසල කර්මයක්, පාප කර්මයක්. මේ තරම් විශාල මුදලක් අපට ගෙවන්න හැකියාවක් නැහැ. ඒ නිසා මම හිතනවා ඓතිහාසික වැවුරුකන්නල රජමහා විහාරය තව බොහෝ දිනක් අඳුරේ තියන්න වේවි කියලා.”

---