අනුර කුමාර ව්‍යවසායකත්වය කියන වචනෙ ඉගෙන ගත්තෙත් මගෙන්..

2025 අප්‍රේල් 05, පෙ.ව. 12:25

ව්‍යවසායකත්ව උන්මාදයක් ඇති කරනවා යැයි කියූ අනුර කුමාර දිසානායක ජනාධිපතිවරයා ව්‍යවසායකයන් ලක්ෂ තුනක් පාරට ඇද දමා ඇතැයි පාර්ලිමේන්තු මන්ත්‍රි දිලිත් ජයවීර පැවසීය.

බොරුල්ලේ පිහිටි සර්වජන බලය මූලස්ථානයේ පැවැති මාධ්‍ය හමුවේදී මන්ත්‍රිවරයා සඳහන් කළේ මෙතෙක් තාවකාලිකව අත්හිටුවා තිබූ පරාටේ නීතිය නැවතත් 01 වැනිදා සිට ක්‍රියාත්මක කිරීම මගින් ව්‍යවසායකයන්ට දැඩි බලපෑමක් සිදුවන බවයි.

අනුර කුමාර දිසානායක ජනාධිපතිවරයා ව්‍යවසායකත්වය යන වචනය පවා ඉගෙන ගත්තේ තමාගෙන් බැවින් එහි වටිනාකමක් නොදැනීම අරුමයක් නොවන බවද මන්ත්‍රිවරයා සඳහන් කළේය.

‘‘පරාටේ නීතිය ආරම්භ වීමත් සමග 01 වැනිදා සිට බැංකු අපේ ව්‍යවසායකයන් පස්සේ එන්න පටන් අරන් තියෙනවා ඉතුරු වුන ඉඩකඩම් ටිකයි, බිල්ඩින් ටිකයි ඒ ඔක්කොම ගන්න. ව්‍යවසායකයන්ට ඇතිවන ගැටලුවට අනුර කුමාර දිසානායක දිගින් දිගටම කිව්වා විසදුමක් ලබා දෙනවා කියලා. එහෙම කියලා මේ අය දිගින් දිගටම රැවට්ටුවා. දැන් ඉදිකිරීම් ක්ෂේත්‍රය, සංචාරක ක්ෂේත්‍රය, වී මෝල් හිමියන්, තෙල් මෝල් හිමියන් වගේම ක්ෂුද්‍ර ව්‍යවසායකයා දක්වා මේක ගිහින් තියෙනවා. අපි කතා කරන මේ ලක්ෂ තුනක ව්‍යවසායකයන් ඇවිල්ලා මධ්‍යම පරිමාණයේ ව්‍යවසායකයින්. මේ අය රැකියා මිලියන ගණනක් දීලා තිබුණු මිනිසුන්. දැන් මේ අය 01 වැනිදා සිට හාන්සියි.

අනුර කුමාර ජනාධිපතිවරයාගේ වචනය මොකද්ද? අපිටත් වඩා ටිකක් උඩින් යන්න ඕනෑ නිසා ව්‍යවසායකත්ව රාජ්‍යට උඩින් ගිහින් කිව්වා ව්‍යවසායකත්ව උන්මාදයක් හදනවා කියලා. දැන් උන්මාදය නොවේ ඇත්තටම ව්‍යවසායකයින් උමතු වෙලා තියෙන්නේ. දැන් ඒ අයට ප්‍රතිකාර කරන මට්ටමට උමතු වෙලා. ඒ මිනිස්සුන්ට පිස්සු හැදිලා තියෙන්නේ. දැන් සමහර ව්‍යවසායකයන් ආතතියට වෛද්‍ය ප්‍රතිකාර පවා ගන්නවා. ඒකට විසදුමක් දෙන්න අපි නිර්මාණශීලිව කිව්වා රජය මැදිහත් වෙලා තෝරා ගත් ව්‍යවසායකයින් සඳහා විශේෂ අරමුදලක් ඇති කරලා එමගින් මේ අයට පණ දුන්නේ නැත්තම් මේ රට ඉවරයි කියලා. බහුතරයක් ව්‍යවසායකයින් තමන්ගේ කිසිම වරදක් නිසා නොවේ වැටුණේ. එක පැත්තකින් ඒ අය කොටස්කරුවන් ලෙස සිටි යහපාලන ආණ්ඩුවේ තිබුණු ආරක්ෂක දැල කඩා වැටුණු නිසා සිදු වුනු පාස්කු ප්‍රහාරය. සංචාරක කර්මාන්තය පළමුව බිඳ වැටුණේ එතැනදී. එතකොට ඔය අනුර කුමාර ජනාධිපතිවරයාත් යහපාලන රජයේ කොටස්කාරයෙක්. ඊට පස්සේ කොවිඩ් එක කවුරුත් ඇති කරපු එකක් නොවේ. නමුත්, කොවිඩ් නිසා ඉතිරි ව්‍යවසායකයන් ටිකත් මැරුණා. එතකොට මේ අය කිසිදාක රජයෙන් යමක් ඉල්ලපු අය නොවේ. මිනිසුන්ට රැකියා දීපු අය. රජයට බදු ගෙවපු අය. මේ රට වෙනුවෙන් අවධානමක් ගත්ත අය තමයි ව්‍යවසායකයන් කියන්නේ. රටකට වගකීමක් නැද්ද මේ ව්‍යවසායකයින් උමතු වෙනකොට, ආතතියෙන් පෙලෙන විට, සියදිවි නසා ගන්න හදන විට, දැන් තමන්ගේ දේපළ සියල්ල බැංකුවට යනවිට මේක බේරා ගන්න රජයට වගකීමක් නැද්ද? මේකද අනුර කුමාර ජනාධිපතිවරයා මේ රටේ ව්‍යවසායකයන්ට ලබා දෙන පණිවුඩය? ඒ නිසා එතුමාට ලොකු වගකීමක් තියෙනවා මේ ව්‍යවසායකයින් වෙනුවෙන් පෙනී ඉන්න. කෝ ඔබතුමාගේ කියපු පෑන් පහරවල්. දැන් ඒවා ගහන්න. එක පෑන් පහරයි මේකට ගහන්න තියෙන්නේ. මේකෙන් ඇත්තටම ආණ්ඩුවට හෝ රටට හානියක් වෙන්නේ නැහැ. මේක තේරුම් ගන්නවත් මේ අයට බැරි නම් ඔබ කිසිම බලාපොරොත්තුවක් තියා ගන්න එපා.”