Frozen Vegetables ආනයනය කිරීමට රජය සැරසෙයි

2025 දෙසැම්‍බර් 02, පෙ.ව. 10:52

කෘෂිකර්ම දෙපාර්තමේන්තුවේ ප්‍රමිතීන්ට අනුකූල වන ශීත කළ එළවළු (Frozen Vegetables) ආනයනය කිරීමට රජය තීරණය කර ඇති බව අත්‍යවශ්‍ය සේවා කොමසාරිස් ජනරාල් බී.කේ. ප්‍රභාත් චන්ද්‍රකීර්ති මහතා ප්‍රකාශ කළේය.
කොමසාරිස් ජනරාල්වරයා සඳහන් කළේ, මෙම ආපදා තත්ත්වය තුළ අත්‍යවශ්‍ය සැපයුම් ලබාගැනීමේදී මහජනතාවට මුහුණදීමට සිදුවන දුෂ්කරතා හඳුනාගැනීම සඳහා දිස්ත්‍රික් ලේකම්වරුන් විසින් ඉදිරිපත් කරන ලද අත්‍යවශ්‍ය ආහාර ද්‍රව්‍ය හා භාණ්ඩ ලැයිස්තු මාධ්‍ය මගින් ප්‍රසිද්ධියට පත් කිරීමට පියවර ගන්නා බවයි.

මෙමගින්, සැපයුම්කරුවන්ට අදාළ දිස්ත්‍රික් හා ප්‍රාදේශීය ලේකම්වරුන් සම්බන්ධ කරගෙන, හඳුනාගත් භාණ්ඩ කඩිනමින් සැපයීමට හැකි වනු ඇත.

LP ගෑස් නිසි ලෙස බෙදාහැරීමේදී ඇතිවිය හැකි ගැටලු හඳුනාගෙන ක්ෂණික විසඳුම් ලබාදීම සඳහා ලිට්රෝ ගෑස් සමාගම සමඟ සාකච්ඡා පැවැත්වීමට කටයුතු සූදානම් කරමින් සිටින බවද ඒ මහතා වැඩිදුරටත් පැවසීය.

ආපදාවෙන් පීඩාවට පත් ජනතාවට මධ්‍ය කාලීන සහන සැලසීම පිණිස, ප්‍රාදේශීය ලේකම්වරුන්ගෙන් ලැබුණු තොරතුරු මෙන්ම අනෙකුත් රාජ්‍ය ආයතනවලින් ලබාගත් තොරතුරු ද අග්‍රාමාත්‍ය කාර්යාලයට ඉදිරිපත් කරන ලෙස දිස්ත්‍රික් ලේකම්වරුන්ට උපදෙස් දී ඇත.

මෙම අවශ්‍යතා, අග්‍රාමාත්‍ය ලේකම් කාර්යාලය විසින් සකස් කරන ලද පහසුවෙන් ප්‍රවේශ විය හැකි ආකෘතියකින් ප්‍රදර්ශනය කෙරෙනු ඇත.

මෙය, ආධාර ලබාදීමට කැමති දේශීය හා ජාත්‍යන්තර පරිත්‍යාගශීලීන්ට තමන්ට සැපයීමට හැකි භාණ්ඩ මොනවාදැයි පැහැදිලිව හඳුනා ගැනීමට ඉඩ සලසනු ඇත.

මෙම යාන්ත්‍රණය මගින් අනවශ්‍ය භාණ්ඩ ලැබීම වැළැක්වීමටත්, අත්‍යවශ්‍ය අවශ්‍යතා නිවැරදිව හඳුනාගෙන අදාළ ස්ථාන වෙත ආධාර නිසි ලෙස ලබාදීමටත් අපේක්ෂා කෙරේ. විදේශයන්ගෙන් ලැබෙන භාණ්ඩ, ආපදා කළමනාකරණ මධ්‍යස්ථානය නමින් භාරගැනීමට කටයුතු යොදා ඇති අතර, ඒ සඳහා අවශ්‍ය රේගු බදු සහන සහ අනෙකුත් බදු සහන ලබාදීමට හැකිවන බවද අත්‍යවශ්‍ය සේවා කොමසාරිස් ජනරාල් කාර්යාලය නිකුත් කළ නිවේදනයේ වැඩිදුරටත් සඳහන් වේ.

මෙම පියවර මගින් ආපදා කළමනාකරණ කටයුතු වඩාත් විධිමත් කර, පීඩාවට පත් ජනතාවට ඉක්මන් සහ ඵලදායී සහන සැලසීමට රජය අපේක්ෂා කරයි.