චීනයට අභියෝග කරන වාහන ආකෘති ලෝකයට විකුණන අපේ රටේ තරුණයෙක් ගැන ඇසෙන කතාව මෙන්න

2025 අගෝස්‍තු 19, පෙ.ව. 12:06

වාහන ආකෘති ලෝකයට විකුණන අපේ තරුණයා…

ශ්‍රී ලංකාවට පමණක් නොව ලොව බොහෝ රටවලට ප්ලාස්ටික් භාණ්ඩ ආනයනය කෙරෙනුයේ චීනයෙනි. ඒ ආකාරයෙන් ලෝකයේ බොහෝ රටවල වැසියෝ චීනයේ ප්ලාස්ටික් පරිහරණය කරද්දී ඊට අභියෝගයක් වන්නට අපේ රටේ තරුණයෙක් උත්සාහ කිරීම පැසසිය යුත්තකි. රුවන් චානක නම් මේ තරුණයා වාහනවල ආකෘති නිර්මාණයෙන් මේ වන විට අපේ රට පමණක් නොව ලොව බොහෝ රටවල පාරිභෝගිකයන්ගේ අවධානය දිනා ගෙන තිබේ.

බස් රථ, කාර්, ඩෝසර්, එස්කැවේටර්, නැව් ආදී බොහෝ රථවාහන ආකෘති ඔහු අතින් නිර්මාණය වෙයි. පී.වී.සී. ෆෝම් බෝඩ්, ඇලුමිනියම් තහඩු, ප්ලාස්ටීක් සීට්, වයරින් උපකරණ, තීන්ත ආඳි අමුද්‍රව්‍ය ඇසුරින් නිමැවෙන මෙම රථවාහන ආකෘතිවලට වැඩි ඉල්ලුමක් ඇත්තේ අමෙරිකාව, කැනඩාව, ඉතාලිය වැනි බටහිර රටවලින් වීමද විශේෂත්වයකි. සම්පූර්ණයෙන්ම අතින් නිර්මාණය වන මෙම ආකෘති සඳහා විදේශීය වෙළෙඳපොළේ ඉහළ ඉල්ලුමක් ඇති බව චානක පවසයි.

ඔහු නිර්මාණය කරන රථවාහනවල ලාම්පු පද්ධති, දුනුකොළ, අසුන්, දොරවල් ඇතුළු සියලු උපාංග සැබෑ වාහනයක් ආකාරයෙන්ම නිර්මාණය කිරීම කැපී පෙනෙයි. සාමාන්‍ය වාහනයක් පින්තාරු කරන ආකාරයෙන්ම පින්තාරු කෙ‍ෙරන මෙම වාහන අතර නවීකරණය කරන ලද බස් රථයක් රුපියල් පනස්පන්දහසේ සිට මිල ගණන්වලට අ‌ලෙවි කෙරෙයි. සාමාන්‍ය ලෙස ලේලන්ඩ් බස් රථයක් සාදා නිම කිරීමට දින 20ක්, ජේ.සී.බී. යන්ත්‍රයක් සාදා නිම කිරීමට දින 14ක්, එස්කැවේටරයක් සාදා නිම කිරීමට දින 18ක් පමණ ගත වන බව චානක අප සමඟ කියා සිටියේය.

චානක, මෙම රථවාහන ආකෘති නිර්මාණය කිරීම ආරම්භ කර ඇත්තේ හය හතර තේරෙන අවධියේ සිටය. එනම් අවුරුදු 7, 8 වයස පසු කරන චානක කාඩ්බෝඩ් අනුසාරයෙන් බස් රථ නිර්මාණය කරන්නට හුරු වී තිබේ. අනතුරුව ඔහුගේ මවුපියන්ගේ සහයෝගයෙන් නිර්මාණය කරන ලද එස්කැවේටර් යන්ත්‍රයකට පාසල් ප්‍රදර්ශනයකදී පළමු වැනි ස්ථානය හිමි ව ඇත. ඒ වන විට ඔහු 5වැනි ශ්‍රේණියේ ඉගෙනුම ලැබූ බව ඔහු පවසයි.

වඩු කාර්මිකයකු වූ පියාගෙන් මෙන්ම නව නිපැයුම්කරුවෙක් වූ සිය වැඩිමහල් සොහොයුරු කුෂාන් චින්තකගෙන් ලැබූ ආභාසය සිය ගමනට පන්නරයක් වූ බව චානක අප සමඟ කියා සිටියේය. වෘත්තියෙන් ජේ.සී.බී. යන්ත්‍ර ක්‍රියාකරුවකු වන ඔහු රථ වාහන ආකෘති නිර්මාණය ව්‍යාපාරයක් ලෙස ආරම්භ කරන්නේ ලොවක් වෙළා ගත් කොවිඩ් වසංගත සමයේදීය. ඒ කාලයේ රැකියාවෙන් මෑත්ව ලද විවේකය ප්‍රයෝජනයට ගත් චානක සිය බිරිය දිල්හාරිගේද සහයෝගය ඇතිව රථ වාහන ආකෘති නිර්මාණය කිරීමට පටන් ගෙන තිබේ. රටට විදේශ විනිමය ලබා දෙන ව්‍යාපාරයක හිමිකරුවකු වන චානක තමා සතු දැනුම ආධුනිකයන්ට ලබා දීමට කැමැත්තෙන් පසුවන බව අප සමඟ කියා සිටියේය.

“චීනය ඇතුළු රටවලින් ප්ලාස්ටික් භාණ්ඩ ගෙන්වන්නේ නැතිව ඉවතලන ද්‍රව්‍ය ප්‍රතිචක්‍රීයකරණය කර අපේ රටේ මෙවන් නිෂ්පාදන බිහි කිරීමේ සැලසුමක් මා සතුව තිබෙනවා. පාසල් හැර යන දරුවන්ට, ඉණෙන් උඩ සිරුර ක්‍රියාකාරී ආබාධිත රණවිරුවන් ඇතුළු ආබාධිත අයවලුන්ට මෙම වෘත්තිය ඉගැන්වීම සඳහා ඇකඩමියක් ඇරඹීමටද මා බලාපොරොත්තු වෙනවා. ඒ සඳහා අප නිමැවුම් සංගමයේ තවත් නිර්මාණකරුවන් දස දෙනකුද ශ්‍රම දායකත්වය ලබා දෙන්නට බලාපොරොත්තුවෙන් සිටිනවා. ඉතින් ඒ සඳහා රජයේ හෝ වෙනත් පෞද්ගලික ආයතනයක අනුග්‍රහයක් හිමි වන්නේ නම් එය අපට ලොකු ශක්තියක්”

පසිඳු මිහිරාන් රැටියල

– දිනමිණ ඇසුරිනි