සමාජ මාධ්‍ය ගැන තීරණයක් ගනීද?

2022 ජූලි 18, පෙ.ව. 9:44

---

---

අනුප්‍රාප්තික ජනාධිපතිවරයා තෝරා ගැනීම වෙනුවෙන් පැවැත්වෙන මැතිවරණයේදී නිදහසේ ඡන්දය භාවිත කිරීමට පාර්ලිමේන්තු මන්ත්‍රීවරුන්ට ඇති අයිතිය අවහිර කරමින් සමාජ මාධ්‍ය ඔස්සේ බලපෑම් කරන පුද්ගලයන් සම්බන්ධයෙන් විමර්ශනයක් ආරම්භ කරන ලෙස වැඩ බලන ජනාධිපති රනිල් වික්‍රමසිංහ මහතා ආරක්ෂක අංශ වෙත උපදෙස් ලබා දී ඇති බව වාර්තා වෙනවා.

පාර්ලිමේන්තු මන්ත්‍රී බලතල හා වරප්‍රසාද පනත ඇතුළු ඊට අදාළ අපරාධ නීති පනත් යටතේ අදාළ විමර්ශන පවත්වන ලෙස ද ජනාධිපතිවරයා අදාළ ආරක්ෂක අංශ වෙත දුන් උපදෙස්වල සඳහන්.

මන්ත්‍රී බලතල හා වරප්‍රසාද පනත යටතේ මන්ත්‍රීවරුන් පාර්ලිමේන්තුව වෙත යාමට හා ඒමට නිදහස තිබිය යුතු බවටත් පාර්ලිමේන්තුව තුළදී පවා නිදහසේ කටයුතු කිරීමට අවස්ථාව තිබිය යුතු බවට ත් සඳහන් කළ ජනාධිපතිවරයා ඊට එරෙහිව කටයුතු කිරීම මන්ත්‍රී වරප්‍රසාද කඩවීමක් මෙන්ම තර්ජනයක් බව ද අවධාරණය කර තිබෙනවා.

අරගලකරුවන් සමාජ මාධ්‍ය ඔස්සේ ඇතැම් අපේක්ෂකයන්ට ඡන්දය දී ගමට එන්න එපා යනුවෙන් සඳහන් “පෝස්ට්” ප්‍රදර්ශනය කරමින් බලපෑම් කරන බවට තමාට පැමිණිලි ලැබී ඇතැයි ද වැඩබලන ජනාධිපතිවරයා පවසා තිබෙනවා.

ජනාධිපතිවරයා තෝරා ගැනීමට ඡන්දය ප්‍රකාශ කිරීමේදී යම් පාර්ලිමේන්තු මන්ත්‍රීවරයෙකු වුව ද මන්ත්‍රීවරුන්ට අනිසි බලපෑම් සහ තර්ජන කරන්නේ නම් රටේ නීතිය අනුව දැඩිව ක්‍රියා කරන බව වැඩබලන ජනාධිපති රනිල් වික්‍රමසිංහ මහතා පළමු කැබිනට් රැස්වීමේදී ද අමාත්‍යවරුන් හමුවේ පවසා ඇති බව ද වාර්තා වෙනවා.

---