ETF සහ EPF කපා හරීද? – ඇමතිගෙන් විශේෂ හෙළිදරව්වක්

2023 ජූනි 27, පෙ.ව. 8:42

දේශීය ණය ප්‍රශස්ත කිරීමේ ක්‍රියාවලියේදී ජනතාවගේ බැංකු තැන්පතුවලට සහ පොලී අනුපාතවලට කිසිදු බලපෑමක් සිදු නොවන බවට මුදල් රාජ්‍ය අමාත්‍ය රංජිත් සියඹලාපිටිය මහතා සහතික වී තිබෙනවා.

රජය සිය දේශීය ණය ප්‍රශස්ත කිරීමේ සැලැස්ම මේ සතියේ එළිදැක්වීමට නියමිතයි.

විශේෂ අමාත්‍ය මණ්ඩල රැස්වීමක් ද හෙට පැවැත්වීමට නියමිතයි. රජය පවසන පරිදි දේශීය ණය ප්‍රශස්ත කිරීමේ සැලැස්ම සෙනසුරාදා සහ ඉරිදා පාර්ලිමේන්තුවේදී සලකා බලනු ඇති.

දේශීය ණය ප්‍රශස්ත කිරීමේ ක්‍රියාවලියේදී ණය ආපසු ගෙවීම කල් දැමීම, පොලී අඩු කිරීම සහ ගෙවීම් කාලය දීර්ඝ කිරීම වැනි ක්‍රියාමාර්ග සාකච්ඡා කර ක්‍රියාත්මක කරන බව රාජ්‍ය අමාත්‍ය සියඹලාපිටිය මහතා සඳහන් කළා.

පුද්ගලික තැන්පතු සහ EPF, ETF සහ විශ්‍රාම වැටුප් ප්‍රතිලාභ වැනි සමාජ ආරක්ෂණ යෝජනා ක්‍රමවලට අත නොතබන බව මුදල් රාජ්‍ය අමාත්‍ය රංජිත් සියඹලාපිටිය මහතා ප්‍රකාශ කළා.