මුදල් අමාත්‍යාංශය යටතේ වෙනම කාර්යාලයක්! ජනවාරි පළමු සතියේ සිට වැඩ අරඹයි

2022 නොවැම්‍බර් 17, ප.ව. 5:31

2023 අයවැය යෝජනා ක්‍රියාත්මක වන පළමු සතියේ සිට ඒ පිළිබඳ ප්‍රගති සමාලෝචනය ආරම්භ කරන බව මුදල් රාජ්‍ය අමාත්‍ය ආචාර්ය රංජිත් සියඹලාපිටිය මහතා පවසනවා.

මුදල් අමාත්‍යාංශයේ ස්ථාපනය කෙරෙන කාර්යාලයක් මගින් මෙම පසු විපරම් කටයුතු සිදු කරමින් අදාළ යෝජනා ක්‍රියාත්මක නොවීමට යම් හේතුවක් ඇත්නම් ඒ පිළිබඳ මැදිහත්වීම සිදු කරන බවයි අමාත්‍යවරයා සඳහන් කරන්නේ.

මීට පෙර අයවැය ලේඛන 76ක් විවිධ රජයන් මගින් ඉදිරිපත් කර ඇතත් ඉන් එම යෝජනා ක්‍රියාත්මක වීම වැළැක්වූයේ නීතිමය ගැටලු, මුදල් ගැටලු සහ ජනතා විරෝධය හේතුවෙන්.

මෙතෙක් ඉදිරිපත් කළ සියලු අයවැය යෝජනා ක්‍රියාත්මක කිරීමට හැකි වූයේ නම් ශ්‍රී ලංකාව සුරපුරයක් බවට පත් විය යුතු බව ප්‍රකාශ කළ අමාත්‍ය සියඹලාපිටිය මහතා සඳහන් කළේ ඒ මෙම ප්‍රගති සමාලෝචන ක්‍රියාවලිය ඊට නිසි පිළිතුර වනු ඇති බවයි.

අමාත්‍යවරයා මේ බව සඳහන් කළේ ඉඩම් ඔප්පු සහ හිමිකම් පත් ප්‍රදානය වෙනුවෙන් ගලිගමුව ප්‍රාදේශීය ලේකම් කාර්යාලයේ අද (17) පැවැති උත්සවයකට එක් වෙමින්.

මෙහි දී පුද්ගලයන් 204 දෙනෙකු වෙනුවෙන් ඉඩම් ඔප්පු සහ හිමිකම් පත් ලබා දී තිබෙනවා.

“මෙවර අයවැය මගින් මෙරට ඉඩම් හිමිකම සම්බන්ධයෙන් සුවිශේෂී යෝජනා දෙකක් සාකච්ඡා කරල තියෙනවා. එකක් තමයි කෘෂි අපනයනය සඳහා හිස් ඉඩම් පවරා ගැනීම. අනික ඉඩම් බැහැර කිරීම, එහෙමත් නැත්තං දැනට භුක්ති විඳින පිරිස් වෙත නිසි පරිදි ඒවා පවරා දීම. අපි දන්නවා 1815 දී සුද්දො තමයි අපට මේ ඉඩම් අයිතිය අහිමි කළේ. මුඩු බිම් පනත ගෙනල්ලා අපිව භූමියක් නැති භූමි පුත්‍රයන් බවට පත් කළා. අදටත් මේ ඉඩම් ජනතාවට පවරා දෙන්න යද්දි ගැටලු රැසකට මුහුණ දෙනවා. ඒ නිසා අපි මෙවර අයවැය මගින් රජයේ ඉඩම් ජනතාවට පවරා දීමේ බලය සම්පූර්ණයෙන් ප්‍රාදේශීය ලේකම් වෙත පවරල තියෙනවා. ඒ වගේ ම රට මුහුණ දෙන අභියෝගය ජය ගැනීමේ එක් පියවරයක් ලෙස ලංකාවේ සෑම බිම් අගලක්ම වැවීමට සහය දැක්වීමේ පියවරක් විදියට කෘෂි අපනය භෝග වගාව වෙනුවෙන් ප්‍රයෝජනයට නොගන්නා ඉඩම් පවරා ගැනීමේ යෝජනාව ඉදිරිපත් කරල තියෙනවා” යැයි ද අමාත්‍යවරයා වැඩි දුරටත් පැවසුවා.