විදුලි ගාස්තු වැඩිකලොත් රට පුරා හර්තාල් ඇරඹෙන ලකුණු!

2023 ජනවාරි 03, පෙ.ව. 9:14

විදුලි බිල ඉහල දැමීම හා විදුලි කප්පාදුව හේතුවෙන් මේ වසරේ අනිවාර්යෙන්ම රට පුරා හර්තාල් ව්‍යාපාරයක් ඇරඹෙන බව ලංකා විදුලිබල මණ්ඩලයේ ඒකාබද්ධ වෘත්තීය සමිති සන්ධානයේ සඳහන් කළා.

එහි කැදවුම්කරු රන්ජන් ජයලත් මහතා සඳහන් කරන්නේ එවන් ක්‍රියා මාර්ගයක් ආරම්භ කළහොත් ඊට සහාය පළ කරන්නට වෘත්තීය සමිති සන්ධානය ලෙස සූදානම් බවයි.

විදුලි බිල ඉහළ දැමුවොත් අනිවාර්යෙන්ම ජනතාවගේ කැළඹීම් මතුවන බවත් ඒ හරහා ඔවුන් ඊට එරෙහිව විවිධ ක්‍රියාමාර්ග ගැනීම අනිවාර්ය බවත් ඒ මහතා පැවසුවා.

නොරොච්චෝල බලාගාරයට අවශ්‍ය ගල් අඟුරු ප්‍රමාණවත් පරිදි රට තුළ ඇතැයි පැවසීම සම්පූර්ණ අසත්‍ය බවත් පැවසූ ගල් අඟුරු නැවු 38ක් පැමිණිය යුතුව ඇතත් මේ වන විට පැමිණ තිබෙන්නේ උපරිම නැව් හයක් පමණක් බවත් කියා සිටියා.

ගෝඨාභය රාජපක්ෂ හිටපු ජනාධිපතිවරයාට ගෙදර යාමට සිදු වූයේ විදුලි කප්පාදුව රටේ ප්‍රධාන ප්‍රශ්නයක් වූ නිසා බවත් රනිල් වික්‍රමසිංහ මහතාට ද එය සිදුවිය හැකි බවත් ඒ මහතා වැඩිදුරටත් කියා සිටියා.