ඔබේ වාහනය සීස් කලොත්? පොලිස්පතිගෙන් චක්‍රලේඛයක්

2022 දෙසැම්‍බර් 26, පෙ.ව. 10:37

---

---

කල්බදු සහ මූල්‍ය සමාගම් මගින් වාහන අත්පත් කර ගැනීමේදී පොලිස් නිලධාරීන්ගේ මැදිහත්වීම වියයුතු ආකාරය පිළිබඳව උපදෙස් දෙමින් පොලිස්පති සී. ඩී. වික්‍රමරත්න මහතා විසින් චක්‍රලේඛයක් නිකුත් කර තිබෙනවා.

එම චක්‍රලේඛයට අනුව ලීසිං හෝ මූල්‍ය සමාගම් වාහන අත්පත් කර ගැනීමට බලය පැවරුණු නියෝජිතයා සමග වාහන හෝ උපකරණ අත්පත් කර ගැනීමට ඒවා සන්තකයේ ඇති පුද්ගලයා වෙත පොලිස් නිලධාරීයකු සහභාගි විය යුත්තේ දෙපාර්ශ්වය අතර සාමය කඩවීමක් සිදුවුවහොත් මැදිහත්වීම සඳහා බවත් එම පොලිස් නිලධාරියාට වාහනය ලබාදෙන ලෙස බලපෑම් කළ නොහැකි බවත් පොලිස්පතිවරයාගේ චක්‍රලේඛයෙන් සඳහන්ව ඇතැයි ලීසිං සහ ණය වාරික ගෙවන්නන්ගේ සංගමයේ නියෝජ්‍ය ලේකම් අසංග සුමේද අමරසිංහ මහතා පැවසුවා.

වාහන ඇතුළු කල්බදු මූල්‍යකරණයට යටත් කර ඇති උපකරණ ලබා ගැනීමේදී බදු දීමනාකරු වන කල්බදු සමාගම සහ මූල්‍ය සමාගම විසින් ක්‍රියා කළ යුතු ආකාරය පිළිබඳව නෛතික විධිවිධාන 2000 අංක 56 දරන කල්බදු මුල්‍යකරණ පනතේ ඇතුළත්ව ඇතැයිද අමරසිංහ මහතා සඳහන් කළා.

මේ පිළිබඳව පොලිස් නිලධාරීන්ට අදාළ වන සියලු නෛතික විධිවිධාන ඇතුළත් කර 2021 ජනවාරි 31 වන දින RTM 557 (CRTM 395) දරන උපදෙස් පණිවුඩය යවා තිබියදීත් ඇතැම් පොලිස් නිලධාරීන් එම විධිවිධානවලට පිටින් ක්‍රියාකරන බව අනාවරණය වීම නිසා 2022 දෙසැම්බර් 19 වැනිදා තවත් චක්‍රලේඛයක් නිකුත් කරමින් උපදෙස් දී තිබෙන බවද ඔහු ප්‍රකාශ කළා.

එම උපදෙස්වල මෙසේද සඳහන් කර ඇත.

පනතේ 27 වගන්තිය වෙත අවධානය යොමු කළ යුතු අතර එම වගන්තිය ආර්ටීඑම් 557 (සීආර්ටීඑම් 395) හී ඇතුළත් කර ඇත.

බදු දීමනාකරු හෝ ඔහුගේ බලය පැවරුණු නියෝජිතයා විසින් පූර්ව දැනුම් දීමක් කර පොලිස් ආරක්‍ෂාව ඉල්ලා සිටින විට උක්ත වගන්තිය අනුව සාමය ආරක්‍ෂා කිරීමේ කාර්යය සඳහා පොලිස් නිලධරයන්ගේ ආරක්‍ෂාව ලබාදිය යුතුය.

එහිදී වාහන/උපකරණ අත්පත් කර ගැනීමේ කාර්ය සඳහා පොලිස් නිලධරයන්ගේ මැදිහත්වීමක් සිදුනොවිය යුතුය.

තවද, ඉහත වගන්තිය ප්‍රකාරව අදාළ වාහනයේ/උපකරණයේ සන්තකය ලබා ගැනීමට බදු දීමනාකරුට හැකියාව ලැබෙන්නේ බදු ගැනුම්කරුගේ ප්‍රතිරෝධයක් නොමැති නම් පමණි.

එලෙස වාහනයේ/උපකරණයේ සන්තකය ලබා ගැනීමක දී ප්‍රතිරෝදය පෑමක් එල්ල වන විට බදු දීමනාකරු විසින් සිදුකළ යුතු වන්නේ පනතේ 28 වගන්තියේ දක්වා ඇති ප්‍රතිපාදන ප්‍රකාරව දිසා අධිකරණය ඉදිරියේ ඒ සඳහා නඩුවක් පවරා ගැනීමයි.

බදු දීමනාකරු හෝ ඔහුගේ නියෝජිතයා විසින් පනතේ 27 සහ 28 වගන්තිවල දක්වා ඇති ප්‍රතිපාදනවලට පටහැනිව ක්‍රියා කිරීම පනතේ 39 වගන්තිය යටතේ වරදක් වන අතර ඒ පිළිබඳව දඬුවම් පනතේ 41(1) උප වගන්තියෙහි දක්වා ඇත.

තවද ඉහත පරිදි සිදුකරන විමර්ශනයකදී වෙනත් වරදක් (කොල්ලකෑම/සොරකම ආදී) අනාවරණය වූ විට ඒ පිළිබඳව ද නෛතික ක්‍රියා මාර්ග ගැනීම කළ යුතුය.

ඉහත ප්‍රතිපාදනවලට පටහැනිව වාහන/උපකරණ අත්පත් කර ගත් අවස්ථාවලදී ඒ පිළිබඳව බදු ගැනුම්කරුවන් විසින් ඉදිරිපත් කරන පැමිණිලි ඇතැම් පොලිස් ස්ථාන මගින් භාර ගැනීම ප්‍රතික්‍ෂේප කරන බවට ද වාර්තා වී ඇති බැවින් මින් ඉදිරියට එලෙස ප්‍රතික්‍ෂේප නොකළ යුතු බවත් එම පැමිණිලි භාරගෙන නිසි විමර්ශනයක් සිදුකර නෛතික ක්‍රියා මාර්ග ගත යුතු බවත් අවධාරණය කරමි.

උක්ත ප්‍රතිපාදන සහ 2021-01-31 දිනැති ආර්ටීඑම් 557 (සීආර්ටීඑම් 395) දරන පණිවුඩය මගින් ලබාදී ඇති උපදෙස් තරයේ පිළිපැදිය යුතු බව අවධාරණය කරන අතර එම උපදෙස්වලට පටහැනිව ක්‍රියාකරන පොලිස් නිලධරයන් පිළිබඳව වාර්තා වුවහොත් නෛතික/විනය ක්‍රියා මාර්ග ගන්නා බවට ද වැඩිදුරටත් දන්වමි.

---