ඇමෙරිකානු ජාතිකයෙකු ජීව උණ්ඩ තොගයක් සමග කටුනායක ගුවන් තොටුපළේ දී අත්අඩංගුවට

2022 දෙසැම්‍බර් 29, ප.ව. 12:29

---

---

ඇමෙරිකානු ජාතිකයෙකු සිය ශ්‍රී ලංකා සංචාරය නිමා කර ආපසු සියරට බලා පිටත්ව යාමට කටුනායක ගුවන් තොටුපළ වෙත පැමිණ සිටියදී ඔහුගේ ගමන් මල්ලේ තිබී මිලි මීටර් 9 වර්ගයේ ජීව උණ්ඩ 10 සහ ඒවා බහාලන පතරොම් ගැබක් කටුනායක ගුවන් තොටුපළ පොලීසිය විසින් 12/28 දින රාත්‍රී අත් අඩංගුවට ගෙන තිබෙනවා.

ප්‍රිචෙට් ජර්මනී ඒඩ්‍රියන් ( Pritchett Jermaine Adriun ) නැමැති මොහු 38 හැවිරිදි ඇමෙරිකාවේ ටැක්සි රථ රියැදුරුවරයෙක්.

ඔහු ඉකුත් 07 දින ශ්‍රී ලංකාවේ සංචාරයක් සදහා පැමිණ තිබුණා.

ඔහු සිය සංචාරය නිමා කර ආපසු පිටත්ව යාම සදහා කටුනායක ගුවන් තොටුපළ වෙත පැමිණි අවස්ථාවේ ගුවන් තොටුපළ ආරක්ෂක නිලධාරීන් විසින් ඔහුගේ ගමන් මලු පරිලෝකන යන්ත්‍රයක් ( Scan ) ඔස්සේ පරීක්ෂා කිරීමේ දී මෙම ජීව උණ්ඩ තොගය සහ පතරොම් ගැබ සොයා ගෙන තිබෙනවා.

ඉන්පසුව මේ පිළිබඳව කටුනායක ගුවන් තොටුපළ පොලීසිය ඊයේ (28) දින දැනුවත් කිරීමෙන් පසුව , එම නිලධාරීන් පැමිණ රාත්‍රී 06.15ට පමණ මෙම කළු ජාතික ඇමෙරිකානුවා අත් අඩංගුවට ගෙන තිබෙනවා.

මෙම ඇමෙරිකානු ජාතිකයා සිය ජපන් ජාතික පෙම්වතිය සමග ඇයගේ ශ්‍රී ලංකාවේ කොළඹ මාළඹේ ප්‍රදේශයේ සිටින මිතුරියකගේ විවාහ උත්සවයට සහභාගී වීම සදහා පැමිණ තිබෙනවා.

මෙම ඇමෙරිකානු ජාතිකයාට එරට තුළ ගිනි අවි භාවිතය සදහා නීතිමය අවසරය සහිත බලපත්‍රලාභියෙක්.

ඔහු ඔස්ට්‍රියාවේ නිෂ්පාදිත ග්ලොක් (Glock 43 X ) වර්ගයේ පිස්තෝලයක් භාවිතා කරන අතර ඒ සදහා භාවිතා කරන අතිරේක උණ්ඩ තොගය සහ පතරොම් ගැබ වැරදීමකින් මෙසේ සිය ගමන් බෑගයේ දමා ගෙන ශ්‍රී ලංකාවට පැමිණ තිබෙනවා.

මෙම ගිනි අවිය සහ එය භාවිතා කිරීමට එරට විසින් ලබා දී ඇති බලපත්‍රය මෙන්ම මෙම විවාහ මංගල උත්සවය පිළිබඳව ද  කටුනායක පොලීසියේ නිලධාරීන් විසින් අන්තර්ජාලය ඔස්සේ පරීක්ෂා කර බලා තිබෙනවා.

මෙවැනි ගිනි අවියක් ශ්‍රී ලංකාව තුළ භාවිතාවට නොගන්නා බව මේ පිළිබඳව පරීක්ෂණ කටයුතු මෙහෙය වන මීගමුව පොලිස් අධිකාරී එරික් පෙරේරා මහතා පැවසුවා.

මෙම අත්අඩංගුවට ගැනීම සිදු වන අවස්ථාවේ මෙම ඇමෙරිකානු ජාතිකයා සමග ඔහුගේ ජපන් ජාතික පෙම්වතිය ද සිටි අතර , ඇය එම අවස්ථාවේ දීම  ඇමෙරිකාව බලා පිටත්ව යාමට නිදහස් කර තිබෙනවා.

මේ වනවිට මෙම පුද්ගලයා අද (29) මීගමුව මහේස්ත්‍රාත් අධිකරණය වෙත ඉදිරිපත් කිරීමට නියමිතයි.

මෙම අත්අඩංගුවට ගැනීම සහ මේ පිළිබඳව වැඩිදුර විමර්ශන කටයුතු මීගමුව ජ්‍යෙෂ්ඨ පොලිස් අධිකාරී සමන් සිගේරා මහතාගේ සහ මීගමුව දිස්ත්‍රික් ¡¡¡ පොලිස් අධිකාරී එරික් පෙරේරා මහතාගේ උපදෙස් යටතේ කටුනායක ගුවන් තොටුපළ පොලීසියේ ස්ථානාධිපති ප්‍රධාන පොලිස් පරීක්ෂක සේනාධීර මහතා ඇතුළු එම පොලීසියේ නිලධාරීන් පිරිසක් විසින් සිදු කරමින් සිටිනවා.

---