සනත් නිශාන්තට එරෙහිව නීතිපතිවරයා චෝදනා ගොනු කරයි

2023 ජනවාරි 17, ප.ව. 4:45

---

---

අධිකරණයට අපහාස කිරීමේ චෝදනාව සම්බන්ධයෙන් රාජ්‍ය අමාත්‍ය සනත් නිශාන්ත මහතාට එරෙහිව චෝදනා පත්‍රයක් ගොනුකර ඇති බව නීතිපතිවරයා අද (17) අභියාචනාධිකරණයට දන්වා සිටියා.

ශ්‍රී ලංකා අධිකරණ නිලධාරීන්ගේ සංගමය සහ නීතිඥවරුන් දෙදෙනෙකු වන ප්‍රියලාල් සිරිසේන සහ විජිත කුමාර යන මහත්වරු ඉදිරිපත් කළ පැමිණිලි අභියාචනාධිකරණ විනිසුරු ආර්. ගුරුසිංහ මහතා ඉදිරියේ අද කැඳවනු ලැබුවා.

එම අවස්ථාවේදී වගඋත්තරකාර රාජ්‍ය අමාත්‍ය සනත් නිශාන්ත මහතා ද අධිකරණයේ පෙනී සිටියා.

එහිදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ලක්මිණි ගිරිහාගම මෙනෙවිය අධිකරණයට දන්වා සිටියේ අදාළ චෝදනා පත්‍රය සකස් කොට මෝසමක් මඟින් අධිකරණයට ඉදිරිපත් කර ඇති බවයි.

ඊට අදාල සාක්ෂි ලැයිස්තුව හා වීඩියෝ දර්ශන ඉදිරිපත් කිරීම සඳහා කාලය ලබාදෙන ලෙසත් ඇය අධිකරණයෙන් ඉල්ලා සිටියා.

ඒ අනුව කල් ලබාදුන් අධිකරණය පැමිණිල්ල නැවත පෙබරවාරි මස 23 වනදා කැඳවීමට ද නියම කළා.

ඉකුත් අගෝස්තු මස ශ්‍රී ලංකා පොදුජන පෙරමුණ ප්‍රධාන කාර්යාලයේ පැවති මාධ්‍ය හමුවකදී සනත් නිශාන්ත මහතා දැක්වූ අදහස්වලින් අධිකරණයට අපහාසයක් සිදුවී ඇතැයි සඳහන් කරමින් මෙම පැමිණිලි ඉදිරිපත් කර තිබුණා.

---