උප්පැන්නෙත් සමඟ ID එකත් දෙන අලුත්ම වැඩක්

2025 නොවැම්‍බර් 14, පෙ.ව. 12:06

දරුවෙකුගේ උපතේදී නිකුත් කරන උප්පැන්න සහතිකය සඳහා, එම දරුවාට අනාගතයේදී හිමිවන ජාතික හැඳුනුම්පත් අංකය ද ඇතුළත් කිරීමට පියවර ගන්නා බව රාජ්‍ය පරිපාලන, පළාත් සභා සහ පළාත් පාලන අමාත්‍ය චන්දන අබේරත්න මහතා පවසයි. උප්පැන්න සහතික බෙදාදීමේ ක්‍රියාවලිය විධිමත් කිරීමේ අරමුණින්, තැපැල් දෙපාර්තමේන්තුව සමඟ එක්ව ආරම්භ කළ නව වැඩසටහනක සමාරම්භක අවස්ථාවට එක්වෙමින් අමාත්‍යවරයා මෙම කරුණ හෙළිදරව් කළේය.

මීට සමගාමීව, රජය විසින් හඳුන්වා දීමට නියමිත ඩිජිටල් හැඳුනුම්පත් ව්‍යාපෘතියේ (SL-UDI) ප්‍රගතිය පිළිබඳව ද අමාත්‍යවරයා අදහස් දැක්වීය. මෙම ව්‍යාපෘතියේ පළමු අදියර යටතේ, 2026 වසරේ මුල් භාගයේදී ඩිජිටල් හැඳුනුම්පත් නිකුත් කිරීම ආරම්භ කිරීමට අපේක්ෂා කරන බව ඔහු සඳහන් කළේය. ඉන්දීය රජයේ මූල්‍ය සහ තාක්ෂණික සහාය ඇතිව ක්‍රියාත්මක වන මෙම ව්‍යාපෘතිය සඳහා වන ගිවිසුම් මේ වන විටත් අත්සන් තබා ඇති අතර, දත්ත රැස් කිරීමේ මූලික කටයුතු ඉදිරියේදී ආරම්භ වීමට නියමිතය.

මෙම ඩිජිටල් හැඳුනුම්පත මගින් පුරවැසියන්ගේ ජෛවමිතික දත්ත (biometric data) ඇතුළත් කරනු ලබන අතර, එමගින් රාජ්‍ය සහ පෞද්ගලික සේවාවන් වඩාත් කාර්යක්ෂමව සහ ආරක්ෂාකාරීව ලබා ගැනීමට අවස්ථාව සැලසේ. ඩිජිටල් හැඳුනුම්පත් ක්‍රියාවලිය තුළ, පුද්ගලික දත්තවල පූර්ණ ආරක්ෂාව තහවුරු කර ඇති බවත්, පුද්ගල දත්ත ආරක්ෂණ පනතට අනුකූලව කිසිදු තෙවන පාර්ශවයකට එම තොරතුරු වෙත අනවසරයෙන් ප්‍රවේශ වීමේ හැකියාවක් නොමැති බවත් අමාත්‍යවරයා මෙහිදී අවධාරණය කළේය.