මෙරටට අයිස් කන්ටේනර් ගෙන්වීමට ආණ්ඩුවේ සහාය ලිඛිත සාක්‍ෂි හෙලිවුනා.. මාධ්‍යට කීම තහනම් කලා.. ඩී.වී. චානක

2026 අප්‍රේල් 11, පෙ.ව. 12:14

---

---

ආණ්ඩුවේ සෘජු මැදිහත්වීම සහ සහාය මත මෙරටට ‘අයිස්’ මත්ද්‍රව්‍ය අඩංගු කන්ටේනර් ගෙන්වා ඇති ආකාරය පිළිබඳ සියලු තොරතුරු පාර්ලිමේන්තු තේරීම් කාරක සභාවේදී හෙළි වී ඇතැයි පාර්ලිමේන්තු මන්ත්‍රී ඩී.වී. චානක මහතා පවසයි.

මීට අදාළව රජය විසින් අත්සන් කරන ලද සියලුම ලේඛන සහ වාර්තා මේ වන විට තමන් සතුව ඇති බවද මන්ත්‍රීවරයා අවධාරණය කළේය.

සියත රූපවාහිනී නාලිකාව සමඟ පැවති සාකච්ඡාවකදී අදහස් දක්වමින් මන්ත්‍රීවරයා සඳහන් කළේ, මෙම තොරතුරු ජනතාවගෙන් වසන් කිරීමට ආණ්ඩුව උත්සාහ කරමින් සිටින බවයි.

සාමාජිකයින් 12 දෙනෙකුගෙන් සමන්විත මෙම තේරීම් කාරක සභාවේ සභාපතිවරයා ඇතුළු අට දෙනෙකුම ආණ්ඩු පක්ෂයේ මන්ත්‍රීවරුන් වන අතර, විපක්ෂයට හිමිව ඇත්තේ අවස්ථා හතරක් පමණක් බව හෙතෙම පෙන්වා දුන්නේය.

එමෙන්ම මෙම කාරක සභාවේ සභාපතිවරයා ලෙස අධිකරණ අමාත්‍යවරයා කටයුතු කරන අතර, වරාය අමාත්‍යවරයා සහ පොලිස් විෂය භාර අමාත්‍යවරයාද එහි සාමාජිකයින් ලෙස කටයුතු කරන බව ඩී.වී. චානක මහතා අනාවරණය කළේය.

මෙම කරුණු වසන් කිරීම සඳහා පාර්ලිමේන්තු තේරීම් කාරක සභාවේ ආණ්ඩු පක්ෂයේ බහුතර බලය 12 දෙනෙකුගෙන් 8 දෙනෙකුම ආණ්ඩු පක්ෂයේ වීම භාවිතා කරමින්, කටයුතු අවසන් වන තෙක් තොරතුරු මාධ්‍යයට ලබාදීම තහනම් කර ඇති බවට ඔහු චෝදනා කරයි.

මෙම සිදුවීම සම්බන්ධයෙන් ඉදිරි මාස තුන ඇතුළත සම්පූර්ණ විස්තර රට හමුවේ තැබීමට තමන් සූදානම් බවද මන්ත්‍රීවරයා මෙහිදී අවධාරණය කළේය

---