ඉන්ධන QR කේත ක්‍රමය නතර කරනවාද?

2026 ජූලි 06, පෙ.ව. 11:17

---

---

QR කේත මත පදනම් වූ ඉන්ධන නිකුත් කිරීමේ ක්‍රමය බාධාවකින් තොරව දිගටම ක්‍රියාත්මක වන අතර, එය නතර කිරීමට රජය මෙතෙක් කිසිදු තීරණයක් ගෙන නොමැති බව ලංකා ඛනිජ තෙල් සංස්ථාවේ (CPC) කළමනාකාර අධ්‍යක්ෂ මයුර නෙත්තිකුමාර මහතා පවසයි.

පුවත්පතකට අදහස් දක්වමින් ඔහු සඳහන් කළේ, පවතින ඉන්ධන බෙදාහැරීමේ ක්‍රමයට සිදුවිය හැකි වෙනස්කම් පිළිබඳව පවතින කනස්සල්ල අවම කරමින්, අනාගතයේදීද රටට අඛණ්ඩ ඉන්ධන සැපයුමක් සහතික වනු ඇති බවයි.

වත්මන් ඉන්ධන කෝටා ප්‍රතිපාදන ඉහළ නැංවීමට හෝ අඩු කිරීමට මෙතෙක් කිසිදු තීරණයක් ගෙන නොමැති බවද ඔහු තහවුරු කළේය. ඒ අනුව පවතින කෝටා සීමා තවදුරටත් දැනුම් දෙන තුරු ක්‍රියාත්මක වන බවද සඳහන් වේ.

රටේ ඉන්ධන අර්බුදය සමයේ ක්‍රමවත් සහ සාධාරණ ඉන්ධන බෙදාහැරීමක් සහතික කිරීම සඳහා හඳුන්වා දුන් QR කේත පද්ධතියේ අනාගතය පිළිබඳව පැතිර යන අනුමාන මධ්‍යයේ මෙම පැහැදිලි කිරීම සිදු කර ඇත.

---