2026 අගෝස්තු 04, පෙ.ව. 12:18
දැනට සුවසැරිය – 1990 සේවාවේ 319 ක්ව පවතින ගිලන්රථ සංඛ්යාව මේ වසර අවසන් වන විට 470 ක් දක්වා ඉහළ නැංවීමට රජය පියවර ගන්නා බව සෞඛ්ය හා ජනමාධ්ය ඇමැති වෛද්ය නලින්ද ජයතිස්ස මහතා පැවසීය.
සුවසැරිය සඳහා ගිලන්රථ 100ක් ලබාදීමට ඉන්දියානු රජය කටයුතු කරමින් සිටින අතර, එම වැඩපිළිවෙළ මේ වනවිට අවසන් අදියරේ පවතින බවත් එම ගිලන්රථ මෙම වසර අවසන් වීමට පෙර සුවසැරිය සේවාවට එක් කිරීමට අපේක්ෂා කරන බවත් ඇමැතිවරයා ප්රකාශ කළේය.
ටාටා පදනමේ සහයෝගයෙන් තවත් ගිලන්රථ 50ක් ලබාගැනීමට නියමිත බවත් අමාත්යවරයා පැවසුවේය.
මෙම සේවාව වැඩිදියුණු කිරීම සඳහා අඛණ්ඩ සහයෝගය ලබාදෙන ඉන්දියානු රජයට, ඉන්දියානු අග්රාමාත්යවරයාට, ඉන්දියානු ජනතාවට, ශ්රී ලංකාවේ ඉන්දියානු මහ කොමසාරිස්වරයා ඇතුළු මහ කොමසාරිස් කාර්යාලයේ සියලු නිලධාරීන්ට ශ්රී ලංකාවේ ගෞරවය හා ස්තුතිය පළ කරන බවද අමාත්යවරයා ප්රකාශ කළේය.
දස වසරක් පුරා ශ්රී ලාංකේය ජනතාවගේ හදිසි සෞඛ්ය අවශ්යතා වෙනුවෙන් අඛණ්ඩ කැපවීමෙන්, කාර්යක්ෂමතාවයෙන් සහ මානුෂීයත්වයෙන් ඉටු කළ සුවිශේෂී මෙහෙවර අගයමින් 1990 සුවසැරිය පදනමේ දස වසරක අභිමානවත් සේවා සැමරුම් උත්සවය සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන්, සුවසැරිය පදනමේ නිර්මාතෘ ආචාර්ය හර්ෂ ද සිල්වා සහ ශ්රී ලංකාවේ ඉන්දීය මහ කොමසාරිස් සන්තෝෂ් ජා යන මහත්වරුන්ගේ සහභාගිත්වයෙන් පසුගියදා (31) පෙරවරුවේ කොළඹ, ශ්රී ලංකා පදනම් ආයතනයේ ශ්රවණාගාරයේදී උත්කර්ෂවත් අයුරින් පැවැත්විණි. එම අවස්ථාවට එක්වෙමින් ඇමැතිවරයා මේ බව කියා සිටියේය.
ඉන්දියානු රජය හා ජනතාවගේ පරිත්යාගශීලී දායකත්වයෙන් 2016 ජූලි 28 වැනිදා ගිලන් රථ 88 කින් ආරම්භ වූ 1990 සුවසැරිය ගිලන් රථ සේවය, නොමිලේ පූර්ව රෝහල් හදිසි ප්රතිචාර සේවාවක් ලෙස මෙරට සෞඛ්ය සේවාවේ නව පරිච්ඡේදයක් ආරම්භ කළේය. අද වන විට ගිලන් රථ 319කින් සමන්විත ජාතික හදිසි ප්රතිචාර සේවාවක් ලෙස එය රට පුරා ජනතාවගේ විශ්වාසය දිනාගෙන තිබේ.
පසුගිය දස වසර තුළ 1990 සුවසැරිය කාර්ය මණ්ඩලය මිලියන 10කට අධික හදිසි දුරකතන ඇමතුම්වලට ප්රතිචාර දක්වමින්, මිලියන 2.6කට අධික හදිසි අවස්ථාවන්හිදී රෝගීන් වෙත කඩිනම් ජීවිතාරක්ෂක සේවාව ලබාදී ඇත. පැය 24 පුරා, සතියේ දින හතම, වසර පුරා අඛණ්ඩව ක්රියාත්මක වන මෙම සේවාව, හදිසි ප්රතිකාර අවශ්ය ජනතාවට බලාපොරොත්තුවේ පළමු නැවතුම බවට පත්ව ඇත.
සෞඛ්ය අමාත්යාංශය යටතේ සේවය කරන සෑම පුද්ගලයකුටම තවත් මිනිසකුගේ ජීවිතයක් සුරක්ෂිත කිරීමේ අවස්ථාව හිමිවන නමුත්, 1990 සුවසැරිය කණ්ඩායමට එම අවස්ථාව හිමිවන්නේ ජීවිතයක් අවදානමකට ලක්ව ඇති අතිශය තීරණාත්මක මොහොතකදී කඩිනමින් මැදිහත්ව එම ජීවිතය බේරා ගැනීමේ වගකීමත් සමඟ බව ද ඇමැතිවරයා පැවසීය.
සුවසැරිය සේවාවේ කැපවීම හේතුවෙන් අද දරුවකුට තම මව හෝ පියා සමඟ ජීවිතය ඉදිරියට ගෙන යෑමටත්, බිරියකට තම සැමියා සමඟත්, සැමියකුට තම බිරිය සමඟත්, ඥාතීන්ට තම ආදරණීයයන් සමඟත්, මිතුරන්ට තම මිතුරු සබඳතා සමඟත් තවදුරටත් ජීවිතය බෙදා ගැනීමට අවස්ථාව උදා වී ඇති බව අමාත්යවරයා පැවසීය.
ජීවිත මිලියන ගණනාවකට බලාපොරොත්තුව ගෙනා අභිමානවත් මෙහෙවරක දස වසරක සුවසැරිය ඉතිහාසයේ වැදගත් පරිච්ඡේදයක් බව ද ඇමැතිවරයා පැවසුවේය.
සුවසැරිය කණ්ඩායම විසින් බේරාගනු ලබන සෑම ජීවිතයක් පිටුපසම පවුලක සතුටක්, බලාපොරොත්තුවක් සහ අනාගතයක් රැඳී පවතින බව ද අමාත්යවරයා පැවසුවේය.
ඔවුන් විසින් බේරාගන්නා එක් ජීවිතයක් යනු එක් පුද්ගලයකුගේ ජීවිතයක් පමණක් නොව, එම පුද්ගලයා සමඟ බැඳුණු පවුලක සහ සමාජයක බලාපොරොත්තු රැසක් ආරක්ෂා කිරීමක් බව ද අමාත්යවරයා ප්රකාශ කළේය.
මෙලොව එළිය දැකීමටත් පෙර ජීවිතය අහිමි වීමේ අවදානමකට මුහුණ දී සිටි බිලිඳකු වුවද, සුවසැරිය කණ්ඩායමේ කඩිනම් මැදිහත්වීම හේතුවෙන් අද වන විට සමාජයේ ජීවත්වන දරුවකු බවට පත්ව සිටිය හැකි බවත්, එවැනි ජීවිත කතා රැසක් මෙම සේවාව සමඟ බැඳී පවතින බවත් අමාත්යවරයා අවධාරණය කළේය.
වසර දහයක් පුරා 1990 සුවසැරිය සේවාව ශ්රී ලංකාවේ සෞඛ්ය සේවා ඉතිහාසය තුළ සුවිශේෂී පරිච්ඡේදයක් සනිටුහන් කර ඇති බවත්, දුරකතන ඇමතුමකින් ආරම්භ වන එම සේවාවේ සෑම මැදිහත්වීමක්ම මනුෂ්ය ජීවිතයක් ආරක්ෂා කිරීමේ උතුම් මෙහෙවරක් බවත් අමාත්යවරයා පැවසුවේය.
එක් එක් ජීවිතයක් බේරා ගැනීම තුළින් එම ජීවිතයේ වටිනාකම පමණක් නොව, එය වටා ගොඩනැඟුණු පවුලක, සමාජයක සහ රටක අනාගතය ද සුරක්ෂිත වන බවත්, ඒ අනුව සුවසැරිය සේවාව මනුෂ්යත්වය වෙනුවෙන් ඉටුකරන අතිශය වැදගත් ජාතික මෙහෙවරක් බවත් අමාත්යවරයා පැවසීය.
2016 වසරේදී මෙම සංකල්පය යථාර්ථයක් බවට පත් කිරීම සඳහා කැපවී කටයුතු කළ පාර්ලිමේන්තු මන්ත්රී හර්ෂ ද සිල්වා මහතා ඇතුළු ඒ සඳහා දායක වූ සියලු දේශපාලන නියෝජිතයන්ටත්, විවිධ අභියෝග හමුවේ මෙම සේවාව අඛණ්ඩව පවත්වාගෙන යෑම සඳහා දායක වූ හිටපු සෞඛ්ය අමාත්යවරුන්ටත්, සෞඛ්ය අමාත්යාංශයේ ලේකම්වරුන් ඇතුළු සියලු නිලධාරීන්ටත් ජාතියේ ගෞරවය හිමි විය යුතු බව ද අමාත්යවරයා අවධාරණය කළේය.
සුවසැරිය සේවාව ආරම්භ කිරීමේ සිට මේ දක්වා එහි සාර්ථකත්වය වෙනුවෙන් ඉන්දියානු රජය ලබාදුන් සහයෝගය ශ්රී ලංකාව කෘතඥතාවයෙන් සිහිපත් කළ යුතු බවද අමාත්යවරයා පැවසීය.
වසර දහයක් පුරා 1990 සුවසැරිය විසින් ගොඩනඟා ඇති පූර්ව රෝහල් හදිසි ප්රතිකාර සේවාවේ අත්දැකීම් සහ දැනුම උපයෝගී කරගනිමින්, දැනට පවතින ගිලන්රථ සේවාව තවදුරටත් විධිමත් හා ශක්තිමත් කර ජාතික ගිලන්රථ සේවාවක් බවට පරිවර්තනය කිරීම සඳහා අවශ්ය වැඩපිළිවෙළ සෞඛ්ය අමාත්යාංශය විසින් ක්රියාත්මක කරමින් පවතින බව ද ඇමැතිවරයා ප්රකාශ කළේය.
මෙහිදී අදහස් දැක්වූ පාර්ලිමේන්තු මන්ත්රී ආචාර්ය හර්ෂ ද සිල්වා මහතා සඳහන් කළේ, නව දේශපාලන සංස්කෘතියක් ලෙස යහපත් වැඩපිළිවෙළක් ආරම්භ කළ පසු එය කවුරුන් විසින් ආරම්භ කළේද යන්න මත නතර කිරීමට හෝ වෙනස් කිරීමට අවශ්ය නොවන බවය.
සුවසැරිය ගිලන් රථ සේවාව එයට කදිම උදාහරණයක් බවද ඒ මහතා පෙන්වා දුන්නේය.
මෛත්රීපාල සිරිසේන ජනාධිපතිවරයාගේ පාලන සමයේදී ආරම්භ කළ මෙම ජනතා හිතවාදී සේවාව, ඉන් අනතුරුව ගෝඨාභය රාජපක්ෂ, රනිල් වික්රමසිංහ සහ වත්මන් ජනාධිපති අනුර කුමාර දිසානායක මහතාගේ පාලන සමයන් තුළදී අඛණ්ඩව සංවර්ධනය වෙමින් ජනතාවට වඩාත් පුළුල් සේවාවක් ලබාදෙන තත්ත්වයට පත්ව ඇති බව ද ඒ මහතා පැවසුවේය.
සුවසැරිය සේවාවේ දස වසරක සැමරුම් උත්සවයට තමන් වෙත ආරාධනා කිරීම සම්බන්ධයෙන් සිය කෘතඥතාව පළ කළ පාර්ලිමේන්තු මන්ත්රී ආචාර්ය හර්ෂ ද සිල්වා මහතා, මෙම සේවාව අතිශය අභියෝගාත්මක කාලපරිච්ඡේදයක් පසුකරමින් වර්තමානය දක්වා පැමිණ ඇති බව ද වැඩිදුරටත් ප්රකාශ කළේය.
ශ්රී ලංකාවේ ඉන්දීය මහ කොමසාරිස් සන්තෝෂ් ජා මහතා මෙහිදී අදහස් දක්වීය.
මෙම අවස්ථාවට සෞඛ්ය හා ජනමාධ්ය අමාත්යාංශ ලේකම් විශේෂඥ වෛද්ය අනිල් ජාසිංහ, අතිරේක ලේකම් විශේෂඥ වෛද්ය කුමාර වික්රමසිංහ, 1990 සුවසැරිය පදනමේ සභාපති විශ්රාමික මේජර් නිරෝෂන් රත්නායක මහත්වරුන් ඇතුළු සුවසැරිය පදනමේ අධ්යක්ෂ මණ්ඩල සාමාජිකයන්, සේවයේ නියුතු හදිසි වෛද්ය තාක්ෂණික නිලධාරීන්, ගිලන්රථ නියමුවන්, හදිසි ප්රතිචාර නිලධාරීන් ඇතුළු 1990 සුවසැරිය පදනමේ සියලු කාර්ය මණ්ඩලය නියෝජනය කරමින් පිරිසක් එක්ව සිටියහ.
2026 අගෝස්තු 04, පෙ.ව. 12:33
2026 අගෝස්තු 04, පෙ.ව. 12:28
2026 අගෝස්තු 04, පෙ.ව. 12:17
2026 අගෝස්තු 04, පෙ.ව. 12:15
2026 අගෝස්තු 04, පෙ.ව. 12:13
